ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ) (ନିପ୍ର) :- ଶିଶୁ ସ୍ୱାସ୍ଥ୍ୟରେ ଉନ୍ନତି ଆଣିବା, ରକ୍ତହୀନତା (ଆନିମିଆ)ମୁକାବିଲା କରିବା ଏବଂ ପରଜୀବୀ କୃମି ସଂକ୍ରମଣ ବିରୋଧରେ ଲଢ଼ିବା ପାଇଁ, ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ନିର୍ଦ୍ଦେଶାଳୟ, ୟୁନିସେଫ୍ ସହଯୋଗରେ, ଅଗଷ୍ଟ ୧୦, ୨୦୨୬ରେ ସାରା ଓଡ଼ିଶାରେ ଜାତୀୟ କୃମିନାଶକ ଦିବସ (National Deworming Day – NDD) କାର୍ଯ୍ୟକ୍ରମ ଆରମ୍ଭ କରିବାକୁ ଯାଉଛି । ୧୦ ଅଗଷ୍ଟରେ ଯେଉଁମାନେ ଡୋଜ୍ ନେଇପାରିବେ ନାହିଁ ।
ସେମାନଙ୍କ ପାଇଁ ୧୭ ଅଗଷ୍ଟରେ ମପ୍-ଅପ୍ ରାଉଣ୍ଡ ଅନୁଷ୍ଠିତ ହେବ । ଏହି କାର୍ଯ୍ୟକ୍ରମ ଅଧୀନରେ ରାଜ୍ୟର ସମସ୍ତ ୩୦ଟି ଜିଲ୍ଲାରେ ୧ରୁ ୧୯ ବର୍ଷ ବୟସର ୧.୬୧ କୋଟିରୁ ଅଧିକ ଶିଶୁ ଏବଂ ୨୦ରୁ ୨୪ ବର୍ଷ ବୟସର ପ୍ରଜନନକ୍ଷମ ମହିଳାଙ୍କ ମଧ୍ୟରୁ ୧୯ ଲକ୍ଷରୁ ଅଧିକ ମହିଳାଙ୍କୁ ଆଲବେଣ୍ଡାଜୋଲ୍ (Albendazole) ଔଷଧ ପ୍ରଦାନ କରାଯିବ । ଏଥିରେ NDD ଜିଲ୍ଲାଗୁଡ଼ିକରେ ୧ରୁ ୫ ବର୍ଷ ବୟସର ୩୨ଲକ୍ଷ ୯୪ ହଜାର ୬୩୦ ଜଣ ଶିଶୁ ଏବଂ ୬ରୁ ୧୯ ବର୍ଷ ବୟସର ୧ କୋଟି ୨୮ ଲକ୍ଷ ୮୯ ହଜାର ୭୧ ଜଣ ଶିଶୁ ସାମିଲ ଅଛନ୍ତି ।
ସେହିପରି, ଦ୍ୱିବାର୍ଷିକ ଭିଟାମିନ୍-ଏ ସପ୍ଲିମେଣ୍ଟେସନ୍ (Vitamin A Supplementation – VAS) କାର୍ଯ୍ୟକ୍ରମ ଅଧୀନରେ ଅଗଷ୍ଟ ମାସ ମଧ୍ୟରେ ୯ରୁ ୬୦ ମାସ ବୟସର ପ୍ରାୟ ୩୨ ଲକ୍ଷ ଶିଶୁଙ୍କୁ ଭିଟାମିନ୍–ଏ ଦିଆଯିବ। ଏହା ଶିଶୁମାନଙ୍କ ରୋଗ ପ୍ରତିରୋଧକ କ୍ଷମତା ବୃଦ୍ଧି କରିବା ସହ ଶିଶୁ ମୃତ୍ୟୁହାର ଓ ଅସୁସ୍ଥତାକୁ ହ୍ରାସ କରିବାରେ ସହାୟକ ହେବ । ଶିଶୁ ସ୍ୱାସ୍ଥ୍ୟ ଅତିରିକ୍ତ ନିର୍ଦ୍ଦେଶକ ଡା. ଆଦିତ୍ୟ ମହାପାତ୍ର କହିଛନ୍ତି, “ଜାତୀୟ କୃମିନାଶକ ଦିବସ ଏକ ଗୁରୁତ୍ୱପୂର୍ଣ୍ଣ ଜନସ୍ୱାସ୍ଥ୍ୟ କାର୍ଯ୍ୟକ୍ରମ,
ଯାହା ଶିଶୁମାନଙ୍କୁ ଅନ୍ତନଳୀରେ ହେଉଥିବା କୃମି ସଂକ୍ରମଣରୁ ସୁରକ୍ଷା ଦେଇଥାଏ, ଫଳରେ ସେମାନେ ସୁସ୍ଥ ଭାବେ ବଢ଼ି ନିଜର ଶରୀରର ବିକାଶ କରିପାରନ୍ତି । ନିୟମିତ କୃମିନାଶକ ଔଷଧ ସେବନ ଦ୍ୱାରା ଶରୀରରେ ଆବଶ୍ୟକ ପୋଷକତତ୍ତ୍ୱ ଶୋଷଣ କ୍ଷମତା ବୃଦ୍ଧି ପାଏ, ଯାହା ଉତ୍ତମ ପୋଷଣ, ଉନ୍ନତ ଶିକ୍ଷାଗ୍ରହଣ କ୍ଷମତା ଏବଂ ଶିଶୁ ଓ କିଶୋର- କିଶୋରୀଙ୍କ ମଧ୍ୟରେ ରକ୍ତହୀନତା ହ୍ରାସ କରିବାରେ ସହାୟକ ହୁଏ । ଏହା ମହିଳା ଓ କିଶୋରୀମାନଙ୍କ ସ୍ୱାସ୍ଥ୍ୟ ଏବଂ କଲ୍ୟାଣ ପାଇଁ ମଧ୍ୟ ଲାଭଦାୟକ, କାରଣ ଏହା ଆମ ସମାଜ ପାଇଁ ଏକ ସୁସ୍ଥ ଭବିଷ୍ୟତ ଗଠନରେ ସହଯୋଗ କରେ ।”
ଏହାସହ, ୟୁନିସେଫ୍ ଓଡ଼ିଶାର ପୁଷ୍ଟିସାର ବିଶେଷଜ୍ଞ ସୌରଭ ଭଟ୍ଟାଚାର୍ଯ୍ୟ କହିଛନ୍ତି, “କୃମିନାଶକ ଔଷଧ ସହ ଭିଟାମିନ୍–ଏ ପ୍ରଦାନ କରିବା ଦ୍ୱାରା ଶିଶୁମାନେ ଗୋଟିଏ ଥରରେ ଆବଶ୍ୟକୀୟ ସ୍ୱାସ୍ଥ୍ୟ ଓ ପୋଷଣ ସେବା ପାଇପାରୁଛନ୍ତି । ଏହି ସମନ୍ୱିତ ପଦକ୍ଷେପ ଦ୍ବାରା କୁପୋଷଣ ହ୍ରାସ କରିବା, ରୋଗ ପ୍ରତିରୋଧକ କ୍ଷମତା ବୃଦ୍ଧି କରିବା ଏବଂ ଶିଶୁମାନଙ୍କ ସୁସ୍ଥ ଶାରୀରିକ ଓ ମାନସିକ ବିକାଶକୁ ସହାୟତା କରି ପ୍ରତ୍ୟେକ ଶିଶୁଙ୍କୁ ଜୀବନର ଏକ ସୁସ୍ଥ ଆରମ୍ଭ ପ୍ରଦାନ କରୁଛି ।”
ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ସମନ୍ୱୟରେ ପରିଚାଳିତ ଏହି କାର୍ଯ୍ୟକ୍ରମରେ ସରକାରୀ, ସରକାରୀ ଅନୁଦାନପ୍ରାପ୍ତ ଏବଂ ବେସରକାରୀ ବିଦ୍ୟାଳୟ ସହ ଅଙ୍ଗନୱାଡ଼ି କେନ୍ଦ୍ରଗୁଡ଼ିକ ସାମିଲ ହେବେ । ଶିକ୍ଷକ, ଅଙ୍ଗନୱାଡ଼ି କର୍ମୀ ଏବଂ ଆଶା କର୍ମୀମାନେ ଔଷଧ ପ୍ରଦାନ କାର୍ଯ୍ୟରେ ସକ୍ରିୟ ଭାବେ ଅଂଶଗ୍ରହଣ କରିବେ । ଏହି ଅଭିଯାନରେ ୟୁନିସେଫ୍ ସହଯୋଗ ପ୍ରଦାନ କରୁଛି । ଏହି ସାମ୍ବାଦିକ ସମ୍ମିଳନୀରେ ଡକ୍ଟର ସ୍ମୃତିଜିତ୍ ପଟ୍ଟନାୟକ, ଯୁଗ୍ମ ନିର୍ଦ୍ଦେଶକ-ପୁଷ୍ଟିସାର; ଡକ୍ଟର ପ୍ରତିଭା ପ୍ରଧାନ, ଯୁଗ୍ମ ନିର୍ଦ୍ଦେଶକ-ଶିଶୁ ସ୍ୱାସ୍ଥ୍ୟ ଏବଂ ଡକ୍ଟର ସଞ୍ଜୟ କୁମାର ସାହୁ, ପୁଷ୍ଟିସାର କାର୍ଯ୍ୟାଳୟ, ୟୁନିସେଫ୍ ଓଡ଼ିଶାର ମଧ୍ୟ ଉପସ୍ଥିତ ଥିଲେ ।
