ପୁରୀ (ଓଡ଼ିଶା ତାଜା ନ୍ୟୁଜ) (ନିପ୍ର) :- ପୁରୀ ବିଶ୍ୱ ପ୍ରସିଦ୍ଧ ରଥଯାତ୍ରାକୁ ଚଳିତ ବର୍ଷ ପ୍ରାୟ ୫୦ ଲକ୍ଷ ଶ୍ରଦ୍ଧାଳୁ, ଭକ୍ତ ଏବଂ ଦର୍ଶନାର୍ଥୀ ଆସିଥିବା କଥା ସରକାରୀ ଭାବରେ ଘୋଷଣା ହୋଇଛି । ଏମାନେ ଭଲରେ ଆସି ସୁସ୍ଥ ବାତାବରଣ ଭିତରେ ଐତିହ୍ୟ ସହର ପୁରୀରୁ ଫେରି ଯାଇଛନ୍ତି । ଏମାନଙ୍କ ଆସିବା, ରହିବା, ବୁଲିବା ଭିତରେ ସହରରେ ଯାହା ଯେମିତି ସ୍ବଚ୍ଛତା ରଖିବା କଥା, ସେକଥା ପୌର ସଫେଇ କର୍ମଚାରୀ କରିଛନ୍ତି । ଏଭଳି ଯାତ୍ରା ସମୟରେ ଯଦି ସବୁଠୁ ଅଧିକ ଶାରୀରିକ ଶ୍ରମ କାର୍ଯ୍ୟ କିଛି ଥାଏ ତାହା ଥିଲା ସଫେଇ । ପୁରୀ ପୌର ନିଗମ ସଫେଇ କର୍ମଚାରୀ ଉକ୍ତ କାର୍ଯ୍ୟକୁ ନିଷ୍ଠାର ସହିତ କରିଥିଲେ । ଆପଣ କହିପାରନ୍ତି, ଏ କାର୍ଯ୍ୟ ତ ତାଙ୍କର, ସେ କଲେ l
ଏଥିରେ ବଡ଼ କଥା କଣ ଅଛି । ସତ କହିଲେ ବଡ଼ କଥା ଅଛି। ତାହା ହେଉଛି ସେମାନଙ୍କ ଆନ୍ତରିକତା । ଏହି ଆଗ୍ରହ ଓ ଆନ୍ତରିକତାକୁ ଆଉଟିକେ ହୋସଲା ଦରକାର ହେଉଛି। ସେତିକି କରିବା ପାଇଁ ଆମେ କଣ ସତରେ ଏତେ ଦୁର୍ବଳ l ଦୁର୍ବଳ ନୁହେଁ ତ! ଯଦି ଆମେ ବଡ଼ ବଡ଼ ଅଧିକାରୀ ଓ ମନ୍ତ୍ରୀଙ୍କ କାର୍ଯ୍ୟର ଭୂୟସୀ ପ୍ରଶଂସା କରିପାରୁଛନ୍ତି, ସେଥିରେ ଆମେ ଆଦୌ ଥକୁ ନାହାଁନ୍ତି, ତେବେ ଆମ ସହରକୁ ପରିସ୍କାର ପରିଚ୍ଛନ୍ନ ଏବଂ ଜୀବାଣୁ ମୁକ୍ତ ରଖିବା ପାଇଁ ଅହର୍ନିସି ପରିଶ୍ରମ କରୁଥିବା ସଫେଇ କର୍ମଚାରୀ ପ୍ରତି ସହାନୁଭୂତି ଦେଖେଇ ଦୁଇ ପଦ ପ୍ରଶଂସା କରିବାକୁ କୁଣ୍ଠାବୋଧ କରିବା କାହିଁକି ? କ’ଣ କେବଳ ବଡ଼ ବଡ଼ିଆ ଅଧିକାରୀ ପ୍ରଶଂସା ପାଇବେ,
ଏମାନେ ତଳିଆ କର୍ମଚାରୀ ହୋଇଥିବା କାରଣରୁ ପ୍ରଶଂସା ପାଇବାକୁ ହକଦାର ନୁହନ୍ତି ଏମିତି ବିଚାର ପ୍ରତିପୋଷଣ କରିବା ଠିକ୍ ହେବ କି ? ବଡ଼ ହୋଟେଲରେ ବଡା ଖାନ୍ନା ଖିଆ ହେଲା। ଚାରି ପାଞ୍ଚଜଣ ଅଧିକାରୀଙ୍କ ଯୋଗୁଁ ରଥଯାତ୍ରା ଭଲରେ ହେଲା ସଫଳ ଭାବରେ ହେଲା ବୋଲି କିଛି ନେତା, ବୁଦ୍ଧିଜୀବୀ ଓ ସାମ୍ବାଦିକ ଫେସବୁକ୍ ରେ ଫଟୋ ପୋଷ୍ଟ କରି ପ୍ରଂଶସାରେ ପୋତି ପକାଇଲେ, ହେଲେ ସେମାନଙ୍କ ନିଷ୍ଠାପର ସେବାପାଇଁ ଜଣେ ଦୁଇ ଜଣଙ୍କୁ ଛାଡ଼ିଲା ପରେ ଅନ୍ୟମାନେ କାଇଁ କେଉଁଠି ଦୁଇ ଧାଡ଼ି ଦୁଇପଦ ଲେଖିଥିବା ପୋଷ୍ଟ ଦେଖିବାକୁ ମିଳିଲାନି ।
ଅନ୍ୟ ଦିଗରେ ରଥଯାତ୍ରା ସମୟରେ ଯେଉଁ ସବୁ ବିଭ୍ରାଟ ହେଲା, ତାହା ମହାପ୍ରଭୁ ଶ୍ରୀଜଗନ୍ନାଥଙ୍କ ଲୀଳା କହି ମହାପ୍ରଭୁଙ୍କ ଉପରେ ଦୋଷ ଲଦି ଦିଆଗଲା । ମହାପ୍ରଭୁ ବିନା ଟାହିଆରେ ପହଣ୍ଡି ହୋଇ ରଥକୁ ଆସିଲେ ତାହା ତାଙ୍କରି ଲୀଳା ବୋଲି କୁହାଗଲା । ଏଥିପାଇଁ ନାନା ପ୍ରକାର ଯୁକ୍ତି ଉପସ୍ଥାପନ କରାଗଲା । ନୀତିକାନ୍ତି ଠାରୁ ଆରମ୍ଭ କରି ଆଉ ଯେଉଁଠି ଅସୁବିଧା ହୋଇଛି ସେ ଉପରେ ମଧ୍ୟ ଆଲୋଚନା ନାହିଁ ।
ଠିକ୍ ଅଛି, ସେସବୁ ବିଷୟରେ ଆଲୋଚନା ନହେଲେ ନାହିଁ, ଏସବୁ ଭିତରେ ଯେଉଁମାନଙ୍କ ଯୋଗୁଁ ସହର ଚିକ୍କଣ ରହିଲା ସେମାନଙ୍କୁ ବି ଦୁଇ ପଦ ପ୍ରଶଂସା ଆବଶ୍ୟକ । ରାତିଦିନ ଖଟି ଖଟି ସହରକୁ ଯେଭଳି ପରିସ୍କାର ସଫେଇ କର୍ମଚାରୀ ରଖିଥିଲେ ତାଙ୍କ କଥା ପୂରା ଭୁଲିଯିବା ଠିକ୍ ହବନି । ପୁରୀ ସହରବାସୀଙ୍କ ତରଫରୁ ବୁଦ୍ଧିଜୀବୀ ଓ ବରିଷ୍ଠ ନାଗରିକମାନଙ୍କ ପ୍ରସ୍ତାବକ୍ରମେ ସମସ୍ତ କର୍ମଚାରୀଙ୍କୁ ଅନ୍ତରିକ କୃତଜ୍ଞତା ସହିତ ଧନ୍ୟବାଦ ଜ୍ଞାପନ କରୁଛି। ସେମାନଙ୍କ ଆଗାମୀ ଯାତ୍ରା ଶୁଭଙ୍କର ହେଉ ଜୟ ଶ୍ରୀ ଜଗନ୍ନାଥ ।
