ପାର୍ଶ୍ବଦେବାଦେବୀ ଓ ଅଶରୀରମାନେ ପ୍ରୀତ ହେଲେ
ପୁରୀ (ଓଡିଶା ତାଜାନ୍ୟୁଜ) ନି. ପ୍ର :- ରବିବାର ଆଷାଢ ଶୁକ୍ଳ ଦ୍ଵାଦଶୀ ତିଥିରେ ରଥାରୁଢ ଶ୍ରୀବିଗ୍ରହଙ୍କ ସମ୍ମୁଖରେ ଅଧରଚୁମ୍ବୀ ତୁମ୍ବାକୃତି ମାଟିହାଣ୍ଡିରେ ଅଧରପଣା ପୂଜା ନୀତି ସମ୍ପନ୍ନ ହୋଇଛି । ପୂଜା ପରେ ପ୍ରତି ରଥର ତିନୋଟି ଲେଖାଁଏ ପୂର୍ଣ୍ଣ ପଣାହାଣ୍ଡିକୁ ସେବକ ମାନେ ଭାଙ୍ଗି ଦେଇଥିଲେ । ଅଧରରୁ ନିର୍ଗତ ଏହି ଅଧରପଣାକୁ ରଥ ସୁରକ୍ଷାରେ ଥିବା ପାର୍ଶ୍ବ ଦେବାଦେବୀ ଓ ଅଶରୀରମାନେ ପଣା ପାଇ ପ୍ରୀତ ହୋଇଥିଲେ । ଗତକାଲି ଶନିବାର ସୁନାବେଶ ବିଳମ୍ବିତ ରାତ୍ର ପର୍ଯ୍ୟନ୍ତ ଦର୍ଶନ ଚାଲିଥିଲା ।
ମହାପ୍ରଭୁଙ୍କ ପହୁଡ ନୀତି ରବିବାର ସକାଳ ୫ଟା୫୦ରେ ହୋଇଥିଲା । ସକାଳ ୮ଟା୩୫ରେ ମଙ୍ଗଳଆଳତି ପରେ ପରେ ତିନିରଥରେ ମଇଲମ ଓ ତଡପଲାଗି ୯ଟା ୫୦ରେ ଅବକାଶ ନୀତି ଶେଷ ହୋଇଥିଲା । ୧୦ଟା ୨୦ରେ ବେଶ ଶେଷ, ୧୦ଟା ୪୫ ଗୋପାଳବଲ୍ଲଭ ହୋଇ ୧ଟା୫୦ରେ ସକାଳଧୂପ ହୋଇଥିଲା । ୨ଟା ୨୦ରେ ମଇଲମ, ୨ଟା୪୦ରେ ମହାସ୍ନାନ, ଅପରାହ୍ନ ୩ଟାରେ ସର୍ବାଙ୍ଗ ହୋଇ ୩ଟା୨୫ରେ ବେଶ ଶେଷ ହୋଇଥିଲା ।
୩ଟା୩୦ରୁ ୪ଟା ୫ରେ ତିନିରଥରେ ମଧ୍ଯାହ୍ନ ଧୂପ ନୀତି ଶେଷ ହେବାପରେ ଅଧରପଣା ନୀତି ଆରମ୍ଭ ହୋଇଥିଲା । କୁମ୍ଭକାରଙ୍କ ମାନଙ୍କ ଦ୍ବାରା ପ୍ରସ୍ତୁତ ହୋଇଥିବା ଶ୍ରୀବିଗ୍ରହଙ୍କ ଅଧର ସ୍ପର୍ଶ କରୁଥିବା ତୁମ୍ବାକାର ମାଟିହାଣ୍ଡି ତିନିରଥରେ ତିନୋଟି ଲେଖାଏଁ ୯ଟି ରଖାଯାଇଥିଲା । ପାଣିଆଆପଟ ସେବକମାନେ ତିନିରଥରେ ପିତ୍ତଳ ହଣ୍ଡା ରଖି ସିଂହଦ୍ୱାର ଛାଉଣୀ ମଠ କୁଅରୁ ପାଣି ଆଣି ରଖିଥିଲେ ।
ଶ୍ରୀମନ୍ଦିର ପ୍ରଶାସନ, ରାଘବ ଦାସ ମଠ ଓ ଓଡ଼ିଆ ମଠ ପଣା ପ୍ରସ୍ତୁତି ସାମଗ୍ରୀ ଯୋଗାଇ ଦେଇଥିଲେ । ଛେନା, କଦଳୀ, ସର,ଛାଚି, କର୍ପୂର, ଜାଇଫଳ, ଗୋଲମରିଚ ଗୁଣ୍ଡ ପକାଯାଇ ପଣା ପ୍ରସ୍ତୁତ ହୋଇଥିଲା । ହଣ୍ଡାରେ ପଣା ପ୍ରସ୍ତୁତ ପ୍ରତି ରଥରେ ରଖାଯାଇଥିବା ତିନୋଟି ଅଧରହାଣ୍ଡିରେ ପୂର୍ଣ୍ଣ କରାଯାଇଥିଲା । ପରେ ମହାସୁଆର ମାନଙ୍କ ଉପସ୍ଥିତିରେ ଭିତରଚ୍ଛ, ତଳୁଚ୍ଛ ଓ ସୁଭଦ୍ରାଙ୍କ ରଥରେ ପାଳିଆ ପୁଷ୍ପାଳକ ଅଧର ସମ୍ମୁଖରେ ଖଣ୍ଡେ ନୂଆ ଗାମୁଛା ଟେରା ବନ୍ଧାଯାଇଥିଲା ।
ଅଧରପଣା ହାଣ୍ଡି ଉପରେ ମଧ୍ୟ ଖଣ୍ଡେ ଲେଖାଏଁ ଧଳାକରିଆ ଘୋଡାଇ ଦିଆଯାଇଥିଲା । ଏହାପରେ ପତ୍ରିବଡ଼ୁ, ସୁଆରବଡ଼ୁ ଓ ଗରାବଡ଼ୁ ପାଳିଆ ସେବକମାନେ ତିନି ରଥ ଉପରେ ପୂଜା ଠା କରିଥାନ୍ତି । ପରେ ପାଳିଆ ପୂଜାପଣ୍ଡା ପଞ୍ଚୋପଚାରରେ ପୂଜା କରିଥିଲେ। ମହାପ୍ରଭୁଙ୍କ ଅଧରାମୃତ ଅଧରପଣାରକୁ ଭଙ୍ଗା ଯିବା ପରେ ରଥରେ ଥିବା ପାର୍ଶ୍ବ ଦେବଦେବୀ ଓ ଚଣ୍ଡୀଚାମୁଣ୍ଡା ମାନେ ପାଇଥିଲେ । ଆଜି ଦିନତମାମ ଶ୍ରଦ୍ଧାଳୁଙ୍କ ଭିଡ ଲାଗିରହିଥିଲା । ମହାପ୍ରଭୁଙ୍କ ଅଧରପଣା ନୀତି ଦର୍ଶନ ଭକ୍ତମାନେ ଦର୍ଶନ କରିଥିଲେ ।
