କଟକ (ଓଡିଶା ତାଜାନ୍ୟୁଜ) ନି. ପ୍ର :- ମରଣ ଯନ୍ତା ପାଲଟିଛି ଫୁଲନଖରା ନିଆଳି ମାଧବ ୬୦ ନମ୍ୱର ରାଜ୍ୟ ରାଜପଥ। ଏହାକୁ ୪ ଲେନ ରାସ୍ତା ତୁରନ୍ତ କରିବା ପାଇଁ ଦାବୀ କରାଯାଇଛି । ଫୁଲନଖରା ଛକ ଠାରୁ ପଞ୍ଚବଟି ବଜାର ପର୍ଯ୍ୟନ୍ତ ବଡ ବଡ ଖାଲ ସୃଷ୍ଟି ହୋଇ ବର୍ଷାରେ ପାଣି ଜମି ରହିବା ଦ୍ବାରା ଦିନକୁ ଦିନ ଛୋଟ ବଡ ଦୁର୍ଘଟନା ଘଟୁଛି । ରାସ୍ତାଟି ଫୁଲନଖରା ଠାରୁ ନିଆଳି ମାଧବ ପର୍ଯ୍ୟନ୍ତ ୩୫ କିଲୋମିଟର ଦୂରକୁ ସମ୍ପ୍ରସାରଣ କରି ୪ ଲେନ କରିବା ପାଇଁ ପୂର୍ବ ସରକାର ସମୟରେ ୩୫୮ କୋଟି ଟଙ୍କା ଟେଣ୍ଡର ହୋଇଥିଲା ।
ସରକାର ବଦଳିବା ପରେ ପୁରୁଣା ଟେଣ୍ଡରକୁ ବାତିଲି କରି ପୁନର୍ବାର ସର୍ଭେ କରି ୩୫ କିଲୋମିଟର ଦୂର ରାସ୍ତା ପାଇଁ ୨୨୪ କୋଟି ୪୬ ଲକ୍ଷ ଟଙ୍କାର ଟେଣ୍ଡର ଆହ୍ବାନ କରି ୨ ବର୍ଷ ହେଲା ବାରମ୍ବାର ଟେଣ୍ଡର ପକାଇବା ତାରିଖ ଘୁଞ୍ଚାଇ ଚାଲିଛନ୍ତି । ଯାହା ଦ୍ୱାରା ଅଧାରୁ ଅଟକିଛି ରାସ୍ତା କାମ । ଜୁଲାଇ ୨୧ ତାରିଖ ୨୦୨୬ ଟେଣ୍ଡରର ଶେଷ ତାରିଖ ଥିବାବେଳେ ପୁଣି ଆସନ୍ତା ମାସ ୫ ତାରିଖକୁ ଟ୍ଟେଣ୍ଡର ଘୁଞ୍ଚାଇ ଦିଆଯାଇଛି । ଲଗାଣ ବର୍ଷା ଯୋଗୁଁ ଫୁଲନଖରା ନିଆଳି ମାଧବ ୬୦ ନମ୍ୱର ରାଜ୍ୟ ରାଜପଥର ବିଭିନ୍ନ ସ୍ଥାନରେ ରାସ୍ତା ଶୋଚନୀୟ ଅବସ୍ଥାକୁ ପହଞ୍ଚିଛି ।
ରାସ୍ତାରେ ସୃଷ୍ଟି ହୋଇଥିବା ବଡ ବଡ ଖାଲ ଓ ଜମି ରହିଥିବା ବର୍ଷା ପାଣି ଯୋଗୁଁ ଗତ ଦୁଇ ଦିନ ତଳେ ଏହି ଖାଲ ଥିବା ସ୍ଥାନ ଜାଣି ନ ପାରି ଏକ ମାଲ୍ ବୋଝେଇ ଟାଟା ଏସି ଗାଡି ଜଗତପୁରରୁ କଣ୍ଟାପଡ଼ା ଓଲଟପୁର ଯାଉଥିବାବେଳେ ଭାରଶ୍ୟାମ ହରାଇ ଓଲଟି ପଡିଥିଵା ଘଟଣା ସ୍ଥାନୀୟ ଲୋକମାନଙ୍କ ମଧ୍ୟରେ ଭୟର ବାତାବରଣ ସୃଷ୍ଟି କରିଛି । ଏବେ ପ୍ରବଳ ବର୍ଷା ଯୋଗୁଁ ଗାତ ଗୁଡିକ ପାଣି ପୂର୍ଣ୍ଣ ହୋଇଥିବାରୁ ଏହି ରାସ୍ତା ଜଣା ନ ପଡିବାରୁ ଏବେ ଯାତ୍ରୀଙ୍କ ପାଇଁ ସିଧା ସଳଖ ମରଣ ଯନ୍ତା ପାଲଟିଛି । ଏହି ରାଜପଥର ବିଶେଷ କରି ଫୁଲନଖରା ଛକ, ବଜାର ସାହି, ପଞ୍ଚବଟି ଛକ, ବ୍ରାହ୍ମଣ ଝରିଲୋ ବଜାର, କୁରାଂଗ ବଜାର, ନଡିଆ ଗୁରୁଡି, କଣ୍ଟାପଡ଼ା, ଅଡଶପୁର, ଅପୂଜା ହରିଡାପଡ଼ା,ଆମନାକୁଦ୍, ମାଧବ ପନିମାଲ ଛକ ସ୍ଥାନ ପର୍ଯ୍ୟନ୍ତ ବଡ ବଡ ଖାଲ ସୃଷ୍ଟି ହୋଇ ମରଣ ଯନ୍ତା ପାଲଟିଛି।
ଏହି ରାସ୍ତା ମଧ୍ୟ ଦେଇ ଯାଉଥିବା ମଟର ସାଇକଲ, ରୋଗୀ ନେଇ ଯାଉଥିବା ଜରୁରୀକାଳୀନ ଆମ୍ବୁଲାନ୍ସ, ସ୍କୁଲଗାଡି ପ୍ରତି ବିପଦ ସୃଷ୍ଟି କରିଛି। ଏହି ରାଜପଥ ଉପରେ କଟକ, ଭୁବନେଶ୍ଵର, ପୁରୀ, ଚାରିଛକ, କୋଣାର୍କ, ଅସ୍ତରଙ୍ଗ ସ୍ଥାନ ପର୍ଯ୍ୟନ୍ତ ଶହ ଶହ ସଂଖ୍ୟାର ବସ, ଟ୍ରକ, ସମେତ ଛୋଟ ବଡ ବିଭିନ୍ନ ଯାନବାହାନ ଚଳାଚଳ କରୁଛି। ମାତ୍ର ରାସ୍ତାର ଏପରି ବଡ ବଡ ଖାଲ ସୃଷ୍ଟି ହୋଇ ବିପଦପୂର୍ଣ୍ଣ ପାଲଟିଥିବାରୁ ଏହା ଲୋକମାନଙ୍କ ପାଇଁ ମରଣଯନ୍ତା ପାଲଟିଛି । ସେଥିନେଇ ସାଧାରଣରେ ତୀବ୍ର ଅସନ୍ତୋଷ ଓ ପ୍ରତିକ୍ରିୟା ଦେଖା ଦେଇଛି ।
ରାଜପଥର ଏପରି ଅବସ୍ଥା ଯୋଗୁଁ ପ୍ରତିଦିନ ଛୋଟବଡ ଦୁର୍ଘଟଣା ଘଟି ଚାଲିଛି । ଏଣୁ ରାଜ୍ୟ ସରକାର ତଥା ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥି ପ୍ରତି ତୁରନ୍ତ ଦୃଷ୍ଟି ଦେଇ ଏହି ୬୦ ନମ୍ୱର ରାଜ୍ୟ ରାଜପଥକୁ ଶୀଘ୍ର ୪ ଲେନ ରାସ୍ତାରେ ପରିଣତ କରିବାକୁ ସାଧାରଣରେ ଦାବି କରାଯାଇଛି । ସରକାର ଏଥି ପ୍ରତି ତୁରନ୍ତ ଦୃଷ୍ଟି ନ ଦେଲେ ଅଞ୍ଚଳ ବାସୀଙ୍କ ପକ୍ଷରୁ ବ୍ୟାପକ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ସତର୍କ କରାଇ ଦିଆଯାଇଛି ।
