“ଆଜି ମହାପ୍ରଭୁ ଆଡାପ ମଣ୍ଡପରେ ଭକ୍ତମାନଙ୍କୁ ଦର୍ଶନ ଦେଉଛନ୍ତି। ଏହା ଭକ୍ତଙ୍କ ପାଇଁ ଅପାର ଆନନ୍ଦ ଓ ଆଧ୍ୟାତ୍ମିକ ଆସ୍ଥାର ଦିନ। କିନ୍ତୁ ସେହି ସମୟରେ ପୁରୀବାସୀଙ୍କ ପୂର୍ବପରି ଦର୍ଶନ ଅଧିକାର ଏପର୍ଯ୍ୟନ୍ତ ପୂର୍ଣ୍ଣ ଭାବେ ପୁନଃସ୍ଥାପିତ ହୋଇନାହିଁ ।
ସେଥିପାଇଁ ଆଜିର ନୀରବ ପଦଯାତ୍ରା ମହାପ୍ରଭୁଙ୍କ ଚରଣରେ ଗୋଟିଏ ଶାନ୍ତ, ଅହିଂସକ ଓ ନୀରବ ପ୍ରାର୍ଥନା ସମର୍ପଣ କରୁଛି-ସମସ୍ତ ଭକ୍ତଙ୍କୁ ସମାନ ଅଧିକାର, ସମାନ ସମ୍ମାନ ଓ ସମାନ ସୁଯୋଗ ମିଳୁ।”
ପୁରୀ (ଓଡିଶା ତାଜାନ୍ୟୁଜ ) (ନି. ପ୍ର) :- ଶ୍ରୀଗୁଣ୍ଡିଚା ମନ୍ଦିରର ଆଡାପ ମଣ୍ଡପରେ ଆଜି ମହାପ୍ରଭୁ ଶ୍ରୀଜଗନ୍ନାଥ, ବଡ଼ଭାଇ ବଳଭଦ୍ର ଓ ମା’ ସୁଭଦ୍ରା ଭକ୍ତମାନଙ୍କୁ ପବିତ୍ର ଦର୍ଶନ ଦେଉଛନ୍ତି। ଏହି ପବିତ୍ର ଅବସରରେ ପୁରୀ ସହରବାସୀଙ୍କ ପୂର୍ବପରି ଦର୍ଶନ ଅଧିକାର ପୁନଃସ୍ଥାପନ ଦାବିରେ ଚାଲିଥିବା ନୀରବ ସଚେତନତା ପଦଯାତ୍ରା ଆଜି କ୍ରମାଗତ ୧୧୦ତମ ଦିନରେ ପହଞ୍ଚିଛି। ୧୦୯ ଦିନ ଧରି ଅବିରତ ଭାବେ ଚାଲିଥିବା ଏହି ଅହିଂସକ ଅଭିଯାନ ଆଜି ମଧ୍ୟ ସମତା, ମାନବିକତା ଓ ଜଗନ୍ନାଥ ସଂସ୍କୃତିର ସାର୍ବଜନୀନ ଆଦର୍ଶକୁ ସାମ୍ନାରେ ରଖି ନିଜର ସଂକଳ୍ପକୁ ଜାରି ରଖିଛି। ଆଡାପ ମଣ୍ଡପରେ ମହାପ୍ରଭୁଙ୍କ ଦର୍ଶନ ଭକ୍ତଙ୍କ ମନରେ ଆନନ୍ଦ ଭରିଦେଉଥିବା ବେଳେ, ପୁରୀବାସୀଙ୍କ ପୂର୍ବପରି ଦର୍ଶନ ଅଧିକାର ଏପର୍ଯ୍ୟନ୍ତ ପୂର୍ଣ୍ଣ ଭାବେ ପୁନଃସ୍ଥାପିତ ନହେବାର ବେଦନା ଏହି ନୀରବ ପଦଯାତ୍ରାରେ ପ୍ରତିଫଳିତ ହୋଇଛି ।
ଆଜିର ପଦଯାତ୍ରାରେ ଯୋଗଦେଇଥିବା ଭକ୍ତମାନେ ମହାପ୍ରଭୁଙ୍କ ଚରଣରେ ଏକମାତ୍ର ପ୍ରାର୍ଥନା ସମର୍ପଣ କରିଛନ୍ତି “ହେ କାଳିଆ ସାଆନ୍ତ, ତୁମେ ସମସ୍ତଙ୍କ ଜଗନ୍ନାଥ। ତୁମ ଦ୍ୱାରରେ କୌଣସି ଭକ୍ତ ଅବହେଳିତ କିମ୍ବା ବଞ୍ଚିତ ନହେଉ। ପୁରୀବାସୀଙ୍କ ପୂର୍ବପରି ଦର୍ଶନ ଅଧିକାର ପୁନଃସ୍ଥାପିତ ହେଉ ଏବଂ ସମସ୍ତ ଭକ୍ତ ସମାନ ସମ୍ମାନ ଓ ସୁଯୋଗ ପାଆନ୍ତୁ।” ଏହି ନୀରବ ପଦଯାତ୍ରା କୌଣସି ବ୍ୟକ୍ତି କିମ୍ବା ପ୍ରତିଷ୍ଠାନ ବିରୋଧରେ ନୁହେଁ; ବରଂ ଜଗନ୍ନାଥ ସଂସ୍କୃତିର ସମତା, ସାର୍ବଜନୀନତା ଓ ମାନବିକତାର ମୂଳ ଆଦର୍ଶକୁ ସୁରକ୍ଷିତ ରଖିବା ପାଇଁ ଏକ ଶାନ୍ତ, ଅହିଂସକ ଓ ଆଧ୍ୟାତ୍ମିକ ପ୍ରୟାସ ।
ଆଜିର ପଦଯାତ୍ରାରେ ସର୍ବଶ୍ରୀ ଶିବସୁନ୍ଦର ମିଶ୍ର, ଚକ୍ରଧର ମହାପାତ୍ର, ସୁକାନ୍ତ ପଣ୍ଡା, ଶିଶିରକାନ୍ତ ଶତପଥୀ, ପ୍ରଫୁଲ୍ଲ କୁମାର ସାହୁ, ସନ୍ଧ୍ୟାରାଣୀ ମିଶ୍ର, ସାଧନା ମହାନ୍ତି, ମମତା ଦାସ, ଅରୁଣା ପଟ୍ଟନାୟକ, ମମତା ସ୍ବାଇଁ, ସୁବାଷ ପଟ୍ଟନାୟକ, ପ୍ରକାଶ ଚନ୍ଦ୍ର ନାୟକ, ନୃସିଂହନାଥ ନାୟକ, ମନୋରଞ୍ଜନ ରଣସିଂହ, ସନ୍ତୋଷ ସେନାପତି ପ୍ରମୁଖ ଯୋଗଦେଇ ଏହି ନୀରବ ଅଭିଯାନ ପ୍ରତି ସମର୍ଥନ ଜଣାଇଥିଲେ । ପଦଯାତ୍ରାର ଆବାହକ ଶ୍ରୀ ସ୍ୱାଧୀନ କୁମାର ପଣ୍ଡା କହିଛନ୍ତି ଯେ,
ପୁରୀ ସହରବାସୀଙ୍କ ପୂର୍ବପରି ଦର୍ଶନ ଅଧିକାର ସମ୍ପୂର୍ଣ୍ଣ ଭାବେ ପୁନଃସ୍ଥାପିତ ନହେବା ପର୍ଯ୍ୟନ୍ତ ଏହି ନୀରବ ପଦଯାତ୍ରା ଅବ୍ୟାହତ ରହିବ । ଏହା ପ୍ରତିବାଦର ନୁହେଁ, ବରଂ ମହାପ୍ରଭୁଙ୍କ ଚରଣରେ ଜଣେ ଭକ୍ତର ନୀରବ ନିବେଦନ । ଆଡାପ ମଣ୍ଡପରେ ମହାପ୍ରଭୁଙ୍କ ଦର୍ଶନର ଏହି ପବିତ୍ର ଦିନରେ ମଧ୍ୟ “ପୁରୀବାସୀ ବଞ୍ଚିତ ନରହୁନ୍ତୁ, ପୂର୍ବପରି ଦର୍ଶନ ଅଧିକାର ଫେରାଇ ଦିଆଯାଉ”— ଏହି ନୀରବ ଆହ୍ୱାନ ସହ ୧୧୦ ଦିନର ନୀରବ ପଦଯାତ୍ରା ନିଜର ସଂକଳ୍ପକୁ ଆହୁରି ଦୃଢ଼ କରି ଆଗେଇ ଚାଲିଛି ।
