କଟକ (ଓଡିଶା ତାଜାନ୍ୟୁଜ) (ନି. ପ୍ର) :- ନିଯୁକ୍ତି ପ୍ରଦାନ କ୍ଷେତ୍ରରେ ପ୍ରଥମେ ST ବର୍ଗ ତାପରେ SC ବର୍ଗଙ୍କୁ ପ୍ରଥମେ ଅଗ୍ରାଧିକାର ଦିଆଯିବାର ସରକାରଙ୍କର ସମସ୍ତ ନୀତି ନିୟମ ତଥା ଆଇନ ବ୍ୟବସ୍ଥା ରହିଥିବାବେଳେ କିନ୍ତୁ କଟକ ଜିଲ୍ଲା ନିଆଳି ବ୍ଲକର ଶିକ୍ଷା ବିଭାଗ ପକ୍ଷରୁ ନୀଳମଣି ବାଳିକା ବିଦ୍ୟାଳରେ ଖାଲିଥିବା ଶିଶୁ ସେଵିକା ପଦବୀ ନିଯୁକ୍ତି କ୍ଷେତ୍ରରେ ସରକାରୀ ନିୟମକୁ ଗୁରୁତ୍ବ ନଦେଇ ଏହାକୁ ସମ୍ପୂର୍ଣ୍ଣ ଉପେକ୍ଷା କରି SC ବର୍ଗର ମହିଳାଙ୍କୁ ନିଯୁକ୍ତି ଦିଆନଯାଇ ବେଆଇନ ଭାବେ ଜଣେ ସାଧାରଣ ବର୍ଗର ମହିଳାଙ୍କୁ ନିଯୁକ୍ତି ଦିଆଯାଇଥିବା ବିଷୟ ଘଟଣାକୁ ନେଇ ନିଯୁକ୍ତି ପାଇଁ ଆବେଦନ କରିଥିବା ପ୍ରାର୍ଥୀନୀ ଝିନା କାଣ୍ଡୀ ନାମକ ଜଣେ ଅସହାୟ ମହିଳା ନ୍ୟାୟ ଭିକ୍ଷା ପାଇଁ ନିଆଳି ବ୍ଳକରେ ଆୟୋଜିତ ହୋଇଥିବା କଟକ ଜିଲ୍ଲାପାଳଙ୍କ ଜନଶୁଣାଣୀ ଶିବିରରେ ଜିଲ୍ଲାପାଳଙ୍କୁ ଏକ ଦରଖାସ୍ତ ମାଧ୍ୟମରେ ଅଭିଯୋଗ କରିଥିବାର ଜଣାପଡିଛି ।
କଟକ ଜିଲ୍ଲାପାଳଙ୍କ ଜନଶୁଣାଣୀ ଶିବିରଠାରେ ହୋଇଥିବା ଅଭିଯୋଗରୁ ପ୍ରକାଶ ଯେ କଟକ ଜିଲ୍ଲା ନିଆଳି ବ୍ଳକ ଶିକ୍ଷା ବିଭାଗ ଅଧିନରେ ଥିବା ନିଆଳି ନିଳମଣି ବାଳିକା ବିଦ୍ୟାଳୟର ଶିଶୁ ସେବୀକା ପଦବୀ ନିଯୁକ୍ତି ପାଇଁ SC ବର୍ଗର ନିଆଳି ଗ୍ରାମର ଝିନା କାଣ୍ଡି, ସ୍ବାମୀ ନିରଞ୍ଜନ ଭୋଇ ଏବଂ ସାଧାରଣ ବର୍ଗର ଜଣେ ମହିଳା ଆବେଦନ କରିଥିଲେ । କିନ୍ତୁ ସରକାରଙ୍କ ନିୟମ ଅନୁଯାୟୀ ନିଯୁକ୍ତି କ୍ଷେତ୍ରରେ ପ୍ରଥମେ ଜଣେ ST ବର୍ଗର ମହିଳାଙ୍କୁ ନିଯୁକ୍ତି ଦିଆଯିବାର ନିୟମ ଥିଲାବେଳେ ଯଦି ST ବର୍ଗର ମହିଳା ନ ମିଳନ୍ତି ତେବେ SC ବର୍ଗର ମହିଳାଙ୍କୁ ନିଯୁକ୍ତି ଦିଆଯିବାର ବ୍ୟବସ୍ଥା ରହିଛି ।
ଆଉ ମଧ୍ୟ ଯଦି SMC ଙ୍କ ପରିବାରର ସଦସ୍ୟ କିମ୍ବା ନିକଟାତ୍ମୀୟ ପ୍ରାର୍ଥୀ ସେମାନେ ଶିଶୁ ସେବିକା ଭାବେ ନିଯୁକ୍ତି ହେବାକୁ ଅଯୋଗ୍ୟ ହେବେ ବୋଲି ନିୟମରେ ଉଲ୍ଲେଖ ରହିଛି । ଶ୍ରୀମତୀ ଝିନା କାଣ୍ଡି ଜିଲ୍ଲାପାଳଙ୍କ ଠାରେ ଲିଖିତ ଅଭିଯୋଗ କରି କହିଛନ୍ତି ଯେ ଶିଶୁ ସେବିକା ଭାବେ ନିଯୁକ୍ତି ପାଇଥିବା ସାଧାରଣ ବର୍ଗର ପ୍ରାର୍ଥୀନୀ ଜଣକ ହେଉଛନ୍ତି SMC ସଭ୍ୟାଙ୍କ ପରିବାରର ଜଣେ ସଦସ୍ୟା । ତାଙ୍କୁ ଶିଶୁ ସେବିକା ଭାବେ କେଉଁ ନିୟମରେ ନିଆଳି ବ୍ଳକର ଶିକ୍ଷା ବିଭାଗ ଅଧିକାରୀ ତଥା ପ୍ରଧାନ ଶିକ୍ଷକ କିପରି ନିଯୁକ୍ତି ଦେଲେ ବୋଲି ସେ ଏବେ ପ୍ରଶ୍ନବାଚୀ ସୃଷ୍ଟି କରିଛନ୍ତି ? ।
ଶ୍ରୀମତୀ ଝିନା କାଣ୍ଡି ଏହି ଶିଶୁ ସେବିକା ନିଯୁକ୍ତିର ଅନିୟମିତତା ବିଷୟରେ ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକଙ୍କ ଠାରେ ବହୁ ବାର ଅଭିଯୋଗ କରୁଥିଲେ ମଧ୍ୟ ତାଙ୍କ ଦୁଃଖ କେହି ଶୁଣୁ ନାହାନ୍ତି । କଟକ ଜିଲ୍ଲାପାଳ ମହୋଦୟ ଏହି ନିଯୁକ୍ତିରେ ହୋଇଥିବା ବ୍ୟାପକ ଅନିୟମିତତା ତଥା ଦୁର୍ନୀତିର ତଦନ୍ତ କରି କେବେ ଏହି ଗରୀବ,ଅସହାୟ SC ବର୍ଗର ମହିଳାଙ୍କୁ ନ୍ୟାୟ ପ୍ରଦାନ କରିବେ ବୋଲି ବିଭିନ୍ନ ମହଲରେ ଏବେ ପ୍ରଶ୍ନବାଚୀ ସୃଷ୍ଟି କରିଛି । ଏଣୁ ରାଜ୍ୟ ସରକାର ତଥା ବିଭାଗୀୟ ମନ୍ତ୍ରୀ ଏଥି ପ୍ରତି ତୁରନ୍ତ ଦୃଷ୍ଟି ଦେବାକୁ ବିଭିନ୍ନ ଦଳିତ ସଂଘ ପକ୍ଷରୁ ଦାବି କରାଯାଇଛି ।
