ହିଞ୍ଜିଳିକାଟୁ (ଓଡ଼ିଶା ତାଜାନ୍ୟୁଜ) (ନିପ୍ର) :- ଛାତ୍ରୀ ଜଣକ ଗ୍ରୀଷ୍ମ ଅବକାଶରେ ଘରକୁ ଯାଇଥିଲେ। ଛୁଟି ଶେଷ ପରେ ବୁଧବାର ଅପରାହ୍ନରେ ସେ ହଷ୍ଟେଲକୁ ଫେରିଥିଲେ। ପହଞ୍ଚିବାର ମାତ୍ର ଅଧଘଣ୍ଟା ପରେ ୯ମ ଶ୍ରେଣୀରେ ପାଠ ପଢୁଥିବା ଛାତ୍ରୀ ଜଣଙ୍କ ହଷ୍ଟେଲ ଫ୍ୟାନରେ ଚୁନି ଲଗାଇ ଆତ୍ମହତ୍ୟା କରିଥିବା ଜଣାପଡ଼ିଛି। ମୃତକ ଜଣଙ୍କ ହେଲେ କୋଦଳା ଥାନା ବେଗୁନିଆପଡା ବ୍ଳକ ତୋଟାପଡା ଗ୍ରାମର ସନ୍ତୋଷ ଦାସଙ୍କ ନାବାଳିକା କନ୍ୟା ବର୍ଷା ଦାସ (୧୪)। ଏଭଳି ଏକ ଦୁଃଖଦ ଓ ସମ୍ବେଦନଶୀଳ ଘଟଣା ବୁଧବାର ଅପରାହ୍ନ ପ୍ରାୟ ତିନିଟା ସମୟରେ ହିଞ୍ଜିଳି ଥାନା ଗୋପିନାଥପୁର କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟ ହଷ୍ଟେଲ ପରିସରରେ ଘଟିଛି ।
ଖବର ପାଇ ହିଞ୍ଜିଳି ପୁଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ହିଞ୍ଜିଳି ଥାନାରେ କେସ ନଂ – ୧୧/୨୬ ରେ ଏକ ଅପମୃତ୍ୟୁ ମାମଲା ରୁଜ୍ଜୁ କରି ପୁଲିସ ଘଟଣାର ତଦନ୍ତ ଚଳାଇଛି। ଗୁରୁବାର ମୃତଦେହ ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ ଡ଼ାକ୍ତରଖାନାକୁ ପଠାଯିବ ବୋଲି ପୁଲିସ କହିଛି। ଆତ୍ମହତ୍ୟାର ପ୍ରକୃତ କାରଣ ଜଣାପଡିନାହିଁ। ଅନ୍ୟପକ୍ଷରେ ହଷ୍ଟେଲର ସୁରକ୍ଷା ବ୍ୟବସ୍ଥା ଓ ଅଧିକ୍ଷକଙ୍କ ମନମୁଖୀ କାର୍ଯ୍ୟକଳାପ ଯୋଗୁଁ ଛାତ୍ରୀ ଜଣଙ୍କ ଆତ୍ମହତ୍ୟା କରିଥିବା ମୃତ ନାବାଳିକାଙ୍କ ମାମୁଁ ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ ବେଗୁନିଆପଡା ବ୍ଳକ ତୋଟାପଡା ଗ୍ରାମର ସନ୍ତୋଷ ଓ ତାଙ୍କ ସ୍ତ୍ରୀ ରେଣୁ ଦାସ କେରଳ ରାଜ୍ୟରେ ଦାଦନ ଶ୍ରମିକ ଭାବେ କାର୍ଯ୍ୟ କରୁଛନ୍ତି। ତାଙ୍କରି ନାବାଳିକା କନ୍ୟା ବର୍ଷା ଦୀର୍ଘ ବର୍ଷ ଧରି ଖଲ୍ଲିକୋଟ ଥାନା ବଳରାମପୁର ଗ୍ରାମରେ ରହି ଆସୁଥିଲେ। ଗତ ୩ ବର୍ଷ ଧରି ବର୍ଷା ହିଞ୍ଜିଳିକାଟୁ ବ୍ଲକ୍ ଗୋପିନାଥପୁର ଗ୍ରାମ କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟ ହଷ୍ଟେଲରେ ରହି ପାଠ ପଢୁଥିଲେ। ଖରା ଛୁଟି ଶେଷ ହେବା ପରେ ବର୍ଷାକୁ ଆଇ ସୁଶିଳା ଦାସ ସାଙ୍ଗରେ ନେଇ ବୁଧବାର ଅପରାହ୍ନ ୨ଘଣ୍ଟା ସମୟରେ ହଷ୍ଟେଲରେ ପହଞ୍ଚିଥିଲେ। ହଷ୍ଟେଲରେ ପହଞ୍ଚିବାର ୧ଘଣ୍ଟା ପରେ ହଷ୍ଟେଲ ବେଡ୍ ଉପରେ ବାଲଟି ରଖି ଫ୍ୟାନରେ ଚୁନି ଲଗାଇ ଆତ୍ମହତ୍ୟା କରିଥିଲେ।
କିଛି ସମୟ ପରେ ସହପାଠୀ ମାନେ ହଷ୍ଟେଲ ଭିତରକୁ ଯାଇ ବର୍ଷାଙ୍କ ମୃତଦେହ ପ୍ରଦାନରେ ଝୁଲନ୍ତା ଅବସ୍ଥାରେ ଦେଖିବାକୁ ପାଇଥିଲେ। ଘଟଣା ସମ୍ପର୍କରେ ସହପାଠୀ ମାନେ ହଷ୍ଟେଲ ଓ୍ବାଡେନ ଓ ଅଧିକ୍ଷକଙ୍କୁ ଜଣାଇଥିଲେ । ଖବର ପାଇ ଗଞ୍ଜାମ ଜିଲ୍ଲା ଅତିରିକ୍ତ ଜିଲ୍ଲା ଶିକ୍ଷାଧିକାରୀ ପ୍ରଭାତୀ ମହାପାତ୍ର, ହିଞ୍ଜିଳିକାଟୁ ଗୋଷ୍ଠୀ ଶିକ୍ଷାଧିକାରୀ ଚାନ୍ଦିନୀ ପଣ୍ଡା, ହିଞ୍ଜିଳି ଥାନା ଆଇଆଇସି ଶ୍ରୀନିବାସ ସେଠୀ ଓ ପୁଲିସ ଟିମ୍ ଘଟଣା ସ୍ଥଳରେ ପହଞ୍ଚି ଘଟଣାର ସରଜମିନ ତଦନ୍ତ ଆରମ୍ଭ କରିଥିଲେ ।
ହଷ୍ଟେଲ ତତ୍ତ୍ୱାବଧାରକଙ୍କ ଦାୟିତ୍ଵ ହୀନତା ଓ ଅଧିକ୍ଷକଙ୍କ ମନମୁଖୀ କାର୍ଯ୍ୟକଳାପ ଯୋଗୁଁ ଛାତ୍ରୀ ଜଣଙ୍କ ଆତ୍ମହତ୍ୟା କରିଛନ୍ତି ବୋଲି ମୃତକଙ୍କ ମାମୁଁ ଅଭିଯୋଗ କରିଛନ୍ତି। ଖବର ଲେଖା ହେବା ସୁଦ୍ଧା ଘଟଣା ନେଇ ପରିବାର ପକ୍ଷରୁ ଥାନାରେ ଲିଖିତ ଅଭିଯୋଗ ହୋଇନଥିବା ପୁଲିସ ସୂତ୍ରରୁ ପ୍ରକାଶ । ଘଟଣାର ତଦନ୍ତ ଚାଲିଛି ଏବଂ ଘଟଣା ସମ୍ପର୍କରେ ପୁଲିସ ହଷ୍ଟେଲ ତତ୍ବାବଧାରକ, ଅଧିକ୍ଷକ ଓ କିଛି ସହପାଠୀଙ୍କୁ ଘଟଣା ସମ୍ପର୍କରେ ପଚରାଉଚୁରା କରୁଛି । ତଦନ୍ତ ପରେ ଆତ୍ମହତ୍ୟାର କାରଣ ଜଣାପଡିବ ବୋଲି ଥାନା ଆଇଆଇସି ଶ୍ରୀନିବାସ ସେଠି କହିଛନ୍ତି । ମୃତ ବର୍ଷା ହିଞ୍ଜିଳିକାଟୁ ବ୍ଳକ ବଡଖଣ୍ଡି ସତ୍ୟଭାମା ବିଦ୍ୟାପୀଠରେ ୯ମ ଶ୍ରେଣୀର ନାମ ଲେଖାଇଥିଲେ ।
