ପରମ୍ପରାକୁ ବଞ୍ଚାଇ ରଖିବାକୁ ପରିବାରୁ ଅଭିଯାନ ଆରମ୍ଭ ହେଉ : ବାବୁ ସିଂ

ପାରମ୍ପାରିକ ନୃତ୍ୟ ଓ ରଜ ଗୀତରେ ଝୁମିଲେ ଦର୍ଶକ

ମହମହ ବାସିଲା ରଜ ପୋଡ଼ ପିଠା

ଭୁବନେଶ୍ୱର (ଓଡିଶା ତାଜା ନ୍ୟୁଜ) ନି. ପ୍ର :-  ଓଡ଼ିଶା ତାର କଳା, ସଂସ୍କୃତି ଓ ପରମ୍ପରା ପାଇଁ ବିଶ୍ବରେ ପରିଚିତ । ହେଲେ କେଉଁଠି ନା କେଉଁଠି ଓଡ଼ିଶାର ପ୍ରକୃତ ପରିଚୟକୁ ଆମେ ଭୁଲି ଭୁଲି ଯାଉଛେ । ଗଣପର୍ବ ରଜ ଆସିଲେ ଆଗ ଭଳି ଆଉ ସେ ସରାଗ ଦେଖିବାକୁ ମିଳୁନାହିଁ । ରଜରେ ପୋଡ଼ ପିଠା ହେଉନି, ରଜ ଦୋଳି ବି ଲାଗୁନି ।

ଆମ ପରମ୍ପରାକୁ ଭୁଲିଯିବା ଶୁଭ ଲକ୍ଷଣ ନୁହେଁ । ପିଢ଼ି ପରେ ପିଢ଼ି ଆମ ପରମ୍ପରାକୁ ବଞ୍ଚାଇ ରଖିବା ପାଇଁ ପୁଣି ଥରେ ପରିବାରୁ ଅଭିଯାନ ଆରମ୍ଭ ହେବା ଜରୁରୀ । ଉଦୟ ଓଡ଼ିଶା ଫାଉଣ୍ଡେସନ ପକ୍ଷରୁ ଓଡ଼ିଶାର ଗଣପର୍ବ ରଜ ଉପଲକ୍ଷେ ଆୟୋଜିତ ‘ରଜ ମହୋତ୍ସବ’ରେ ଯୋଗ ଦେଇ ଅତିଥିମାନେ ଏହା କହିଛନ୍ତି ।

ମୁଖ୍ୟ ଅତିଥି ଭାବେ ବିଧାୟକ ବାବୁ ସିଂ, ବିଶିଷ୍ଟ ଅତିଥି ଭାବେ ମେୟର ସୁଲୋଚନା ଦାସ, ପଦ୍ମଶ୍ରୀ ଅଦ୍ୱୈତ ଗଡ଼ନାୟକ, ବିଶିଷ୍ଟ ଲେଖିକା ଓ ଆକାଶବାଣୀ କଟକର ବରିଷ୍ଠ ସ୍ଵରଶିଳ୍ପୀ ପ୍ରଫେସର ଚିନ୍ମୟୀ ମହାନ୍ତି, ପ୍ରଖ୍ୟାତ ଚିତ୍ରଶିଳ୍ପୀ ଓ ଅଭିନେତା ଡ. ଚିନ୍ତାମଣି ବିଶ୍ବାଳ, ଅଭିନେତ୍ରୀ ଡ. ମେଘନା ମିଶ୍ର, ବିଶିଷ୍ଟ ଚିତ୍ରଶିଳ୍ପୀ ସୁଶାନ୍ତ ସିଂ ସାମନ୍ତ, ପ୍ରସିଦ୍ଧ ରନ୍ଧନଶିଳ୍ପୀ ସ୍ମୃତିଶ୍ରୀ ସିଂ ପ୍ରମୁଖ ଯୋଗଦେଇଥିଲେ ।

ଉଦୟ ଓଡ଼ିଶାର ସଭାପତି କମଳାକାନ୍ତ ନାୟକ ସ୍ବାଗତବକ୍ତବ୍ୟ ଦେଇଥିବା ବେଳେ ସମ୍ପାଦକ ସୋମନାଥ ପରିଡ଼ା ଉତ୍ସବ ସମ୍ପର୍କରେ ବକ୍ତବ୍ୟ ରଖିଥିଲେ । ଏହି ଅବସରରେ ବିଶିଷ୍ଟ ଲେଖିକା ଓ ଆକାଶବାଣୀ କଟକର ବରିଷ୍ଠ ସ୍ଵରଶିଳ୍ପୀ ପ୍ରଫେସର ଚିନ୍ମୟୀ ମହାନ୍ତିଙ୍କ ଗଳ୍ପ ସଙ୍କଳନ ‘ଗଳ୍ପ ପରି ଲାଗେ’ର ଇଂରାଜୀ ଅନୁବାଦ ‘ଇକୋଜ୍ ଅଫ୍ ଲାଇଫ୍’କୁ ଅତିଥିମାନେ ଉନ୍ମୋଚନ କରିଥିଲେ ।

ଏଥିସହ ‘ଆମ ପରମ୍ପରା ଆମ ରଜ’ ବିଷୟ ବସ୍ତୁକୁ ନେଇ ରାଜ୍ୟସ୍ତରୀୟ ଚିତ୍ରାଙ୍କନ ପ୍ରତିଯୋଗିତା ‘କାନ୍ଭାସ୍ରେ ରଜ’ର ଅନୁଷ୍ଠିତ ହୋଇଥିଲା । ରାଜ୍ୟର ବିଭିନ୍ନ ଜିଲ୍ଲାରୁ ଶତାଧିକ ପ୍ରତିଯୋଗୀ ଭାଗନେଇ ଚିତ୍ର ଆଙ୍କିଥିଲେ । ଏଥିରେ କନିଷ୍ଠ ବର୍ଗରେ ରଶ୍ବିରଂଜନ ବେହେରା, ଚେତନା ପାଢ଼ୀ ଓ ସୁଶ୍ରୀ ଦିବ୍ୟାଂଶୀ ଏବଂ ବରିଷ୍ଠ ବର୍ଗରେ ସାଇ ପ୍ରସାଦ ରାୟ, ପ୍ରିୟଙ୍କା ପ୍ରିୟଦର୍ଶିନୀ ଦାସ,

ପ୍ରତୀକ୍ ପ୍ରଦୀପ୍ ବାରିକ ଯଥାକ୍ରମେ ପ୍ରଥମ, ଦ୍ବିତୀୟ ଓ ତୃତୀୟ ସ୍ଥାନ ଅଧିକାର କରି ପୁରସ୍କୃତ ହୋଇଥିଲେ । ସେହିପରି ପୋଡ଼ ପିଠା ପ୍ରତିଯୋଗିତାରେ ମହିଳା ସ୍ବୟଂ ସହାୟିକା ଗ୍ରୁପ୍ର ମା’ ମାନେ ପୋଡ଼ ପିଠା ପ୍ରତିଯୋଗତାରେ ଭାଗ ନେଇଥିଲେ । ପାରମ୍ପରିକ ପିଠା ସମେତ ଜାମୁକୋଳି, ବେଲ, ଆମ୍ବ ରସର ପୋଡ଼ ପିଠା ମନ ଜିଣିଥିଲା ।

ଏଥିରେ ମା’ତାରେଣୀ ଏସ୍ଏଚ୍ଜି ପ୍ରଥମ, ମହାଦେବ ଏସ୍ଏଚ୍ଜି ଦ୍ବିତୀୟ ଓ ଶ୍ରୀ ରାଧାକାନ୍ତ ଏସ୍ଏଚ୍ଜି ତୃତୀୟ ସ୍ଥାନ ଅଧିକାର କରିଥିଲେ । ସମସ୍ତ ପ୍ରତିଯୋଗୀଙ୍କୁ ଟ୍ରଫି ସହ ଅର୍ଥରାଶି ପ୍ରଦାନ କରାଯାଇଥିଲା । ପ୍ରତିଯୋଗିତା ସହ ସାଂସ୍କୃତିକ କାର୍ଯ୍ୟକ୍ରମକୁ ଭରପୁର ଉପଭୋଗ କରିଥିଲେ ଦର୍ଶକ ।

ଓଡ଼ିଶାର ପାରମ୍ପରିକ ନୃତ୍ୟକୁ ନେଇ ଦୁଃଖିରାମ ସ୍ବାଇଁ କଳା ପ୍ରତିଷ୍ଠାନର କଳାକାର ଚମତ୍କାର ନୃତ୍ୟ ପରିବେଷଣ କରିଥିଲେ। ତା‘ ସହ ସମେତ ରଜ ଗୀତରେ ଝୁମାଇଥିଲେ କଣ୍ଠଶିଳ୍ପୀ ଅରୁତୋଷ ଓ ବିଷ୍ଣୁ ପ୍ରିୟା । ଅନୁଷ୍ଠାନର ସହ ସମ୍ପାଦିକା ଅର୍ପିତା ନାଥଶର୍ମା,

ଉପସଭାପତି ଏରିକା ପ୍ରିୟଦର୍ଶିନୀ ଅତିଥିଙ୍କୁ ସମ୍ମାନିତ କରିଥିବା ବେଳେ କୋଷାଧ୍ୟକ୍ଷ ଚିନ୍ମୟୀ ଅର୍ପିତା ଧନ୍ୟବାଦ ଦେଇଥିଲେ । ଅନୁଷ୍ଠାନ ସୁଦିପ୍ତ ପରିଡ଼ା, ବିଶ୍ବଜିତ୍ ବରାଳ, ତପସ୍ବିନୀ ନାୟକ, ଶୁଭାଶିଷ ବେହେରା, କମଲ ଲୋଚନ ପରିଡ଼ା, ଶୁଭଦର୍ଶିନୀ ବେହେରା, ଚିରଂଜିତ୍ ପ୍ରମୁଖ ସହଯୋଗ କରିଥିଲେ ।