କଣ୍ଟାବାଞ୍ଜି (ଓଡିଶା ତାଜା ନ୍ୟୁଜ) ନି. ପ୍ର :- ବଲାଙ୍ଗୀର ଜିଲ୍ଲା ତୁରେକେଲା ଥାନା ବୁଡ଼ିବାହାଲ ଗାଁରେ ଦାଦନ ଦୁଃଖ ଦେଖିବାକୁ ମିଳିଛି I ପରିବାର ପ୍ରତିପୋଷଣ ପାଇଁ ଦାଦନ ଖଟିବାକୁ ଯାଇଥିବା ବୁଡ଼ିବାହାଲ ଗାଁର ବରୁଣ ମାଝୀ (୩୫)ଙ୍କ ମୃତ୍ୟୁ ହୋଇଛି I ସୂଚନା ମୁତାବକ, ବରୁଣଙ୍କ ବାପା ବସେଝୁ ମାଝୀଙ୍କ ପ୍ରାୟ ୧୫ ବର୍ଷ ତଳେ ମୃତ୍ୟୁ ହୋଇସାରିଛି I ପରିବାର କହିଲେ, ବୃଦ୍ଧା ମା’ ଅମ୍ବିକା ମାଝୀ (୬୦)ବର୍ଷ ଏବଂ ବଡ଼ ଭାଈ ଦୁର୍ଯ୍ୟୋଧନ ମାଝୀ I ବଡ଼ ଭାଈ ଦୁର୍ଯ୍ୟୋଧନ ଏକ ଅଜଣା ରୋଗରେ ଆକ୍ରାନ୍ତ ହୋଇ ଦୀର୍ଘ ଦିନ ହେବ ଶଯ୍ୟାଶାୟୀ ରହିଛନ୍ତି I ଏଭଳି ପରିସ୍ଥିତିରେ ଅସହାୟ ମା’ ଏବଂ ବଡ଼ ଭାଇର ଏକାମାତ୍ର ସାହାରା ଥିଲେ ସାନ ପୁଅ ବରୁଣ I
ଘରର ଆର୍ଥିକ ଅବସ୍ଥା ସୁଧାରିବା ଏବଂ ବଡ଼ ଭାଈର ଚିକିତ୍ସା ପାଇଁ ଡ଼ିସେମ୍ବର ମାସରେ ସେ ଖଡ଼ିଆଳ ଅଞ୍ଚଳର ଜଣେ ଦାଦନ ସର୍ଦ୍ଦାରଙ୍କ ଠାରୁ ଅଗ୍ରିମ ଟଙ୍କା ଆଣି ଆନ୍ଧ୍ରପ୍ରଦେଶର ଏକ ଇଟାଭାଟିକୁ କାମ କରିବାକୁ ଯାଇଥିଲେ I କିଛିଦିନ ତଳେ ବରୁଣ ନିଜ ମା’ଙ୍କ ସହ ଫୋନ୍ ରେ କଥା ହୋଇଥିଲେ I କାମ ସାରି ଖୁବଶୀଘ୍ର ଘରକୁ ଯିବି ବୋଲି କହିଥିଲେ I ହେଲେ ହଠାତ୍ ବରୁଣଙ୍କ ଦେହ ଅସୁସ୍ଥ ଥିବା ଏବଂ ଆନ୍ଧ୍ରପ୍ରଦେଶର ଏକ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ତାଙ୍କର ମୃତ୍ୟୁ ଘଟିଥିବା ଖବର ଜଣାପଡିଥିଲା I ଖବର ଶୁଣିବା ପରେ ବୃଦ୍ଧା ମା’ଙ୍କ ପାଦତଳୁ ମାଟି ଖସିଯାଇଛି I
ଇଟାଭାଟି ମାଲିକ ଆମ୍ବୁଲାନ୍ସ ଯୋଗେ ବରୁଣଙ୍କ ମୃତ ଦେହକୁ ଆଣି ଗାଁରେ ଛାଡ଼ି ଦେଇ କାହାରିକୁ କିଛି ନକହି ତରବରିଆ ଭାବେ ସେଠାରୁ ଫେରାର ହୋଇଯାଇଛି I ତେବେ ବରୁଣଙ୍କ ମୃତ୍ୟୁକୁ ନେଇ ସନ୍ଦେହ ବଢ଼ିବାରେ ଲାଗିଥିବା ବେଳେ ଘଟଣାକୁ ଚାପି ଦେବା ପାଇଁ ଏବଂ ଦାଦନ ମାଫିଆଙ୍କୁ ସୁରକ୍ଷା ଦେବାପାଇଁ ପ୍ରଶାସନ ପକ୍ଷରୁ କରାଯାଉଥିବା ଆଲୋଚନା ହେଉଛି I ଅପରପକ୍ଷରେ ଅସହାୟ ଗରିବ ପରିବାର ଏକମାତ୍ର ରୋଜଗାରିଆ ପୁଅକୁ ହରାଇବା ପରେ ବୃଦ୍ଧା ମା’ ଓ ଅସୁସ୍ଥ ବଡ଼ ଭାଈ ଭାଙ୍ଗି ପଡ଼ିଛନ୍ତି I ତେବେ ତୁରନ୍ତ ଘଟଣାର ନିରେପକ୍ଷ ଭାବେ ତଦନ୍ତ କରିବା ସହ ଅସହାୟ ପରିବାରକୁ ଆର୍ଥିକ ସହାୟତା ଯୋଗାଇ ଦେବା ନେଇ ଦାବି ହେଉଛି I
