ଗୋପ (ଓଡ଼ିଶା ତାଜା ନ୍ୟୂଜ୍) (ନିପ୍ର ) :- ପୁରୀ ଜିଲ୍ଲା ନିମାପଡ଼ା ବାସିନ୍ଦା ଶ୍ରୀ କୃଷ୍ଣ ଚନ୍ଦ୍ର ବେହେରା (ବୟସ୍ ୫୧ ବର୍ଷ), ଯିଏ ଆର୍ଥିକ ଭାବେ ଦୁର୍ବଳ ପରିବାରର ହୋଇଥିବା ସତ୍ତ୍ୱେ ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ପାଇଁ ଯୋଗ୍ୟ ଥିଲେ ମଧ୍ୟ ତାଙ୍କ ନାମ ତାଲିକାରେ ନଥିବାରୁ ସେ ଚିକିତ୍ସା ସୁବିଧାରୁ ବଞ୍ଚିତ ହୋଇଥିଲେ । ଏହାକୁ ଗୁରୁତ୍ୱ ଦେଇ ବିଜେପି କୃଷକ ମୋର୍ଚ୍ଚା ଓଡ଼ିଶାର ପୂର୍ବତନ ରାଜ୍ୟ ସଂପାଦକ ଶ୍ରୀ ପ୍ରଶାନ୍ତ ସ୍ୱାଇଁ ଗତ ୨୧ ତାରିଖରେ ସମ୍ପୃକ୍ତ କର୍ତ୍ତୃପକ୍ଷଙ୍କ ନିକଟକୁ ଏକ ଲେଖିତ ଆବେଦନ ପତ୍ର ପ୍ରେରଣ କରିଥିଲେ । ତାଙ୍କ ସକ୍ରିୟ ହସ୍ତକ୍ଷେପ ଓ ପ୍ରୟାସରେ ବର୍ତ୍ତମାନ ଶ୍ରୀ ବେହେରାଙ୍କୁ ଆୟୁଷ୍ମାନ କାର୍ଡ ଜାରି କରାଯାଇଛି ।
ବର୍ତ୍ତମାନ ଶ୍ରୀ ବେହେରା ଭୁବନେଶ୍ୱରସ୍ଥିତ କିମ୍ସରେ ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି। ତାଙ୍କର ମୁଣ୍ଡରେ ଗୁରୁତର ଆଘାତ (ଏସ.ଡି.ଏଚ, ଏସ.ଏ.ଏଚ ଓ ଖପର ଭାଙ୍ଗିବା) ହୋଇଥିବାରୁ ତୁରନ୍ତ ଓ ଲାଗାତାର ଉତ୍ତମ ଚିକିତ୍ସା ଅତ୍ୟନ୍ତ ଆବଶ୍ୟକ । ଏହି ପରିସ୍ଥିତିରେ ଆୟୁଷ୍ମାନ କାର୍ଡ ମିଳିଥିବା ସତ୍ତ୍ୱେ ଯଦି ଯୋଜନାର ଲାଭ ସଠିକ୍ ଭାବେ ମିଳିବାରେ ବିଳମ୍ବ ହୁଏ, ତେବେ ଏହା ଗରିବ ଲୋକଙ୍କ ପାଇଁ ଗଭୀର ଚିନ୍ତାର ବିଷୟ ।
ସେଥିପାଇଁ ଶ୍ରୀ ସ୍ୱାଇଁ ସମ୍ପୃକ୍ତ ହସ୍ପିଟାଲ୍ ଓ କର୍ତ୍ତୃପକ୍ଷଙ୍କୁ ତୁରନ୍ତ ନିର୍ଦ୍ଦେଶ ଦେଇ ଆୟୁଷ୍ମାନ ଯୋଜନା ଅନୁସାରେ ନିଶୁଳ୍କ ଚିକିତ୍ସା ସୁବିଧା ଯୋଗାଇବାକୁ କର୍ତ୍ତୃପକ୍ଷ ଙ୍କୁ କହିଛନ୍ତି । ସେ କହିଛନ୍ତି ଯେ, ସରକାରଙ୍କ ଏହି ଲୋକକଳ୍ୟାଣମୂଳକ ଯୋଜନାର ଲାଭ ଯଥାର୍ଥ ହିତାଧିକାରୀଙ୍କୁ ସଠିକ୍ ସମୟରେ ମିଳିବା ଦରକାର ଏବଂ ଏପରି ଘଟଣାରେ କୌଣସି ଅବହେଳା ସହ୍ୟ କରାଯିବ ନାହିଁ । ସ୍ଥାନୀୟ ଅଞ୍ଚଳର ଲୋକମାନେ ମଧ୍ୟ ଏହି ପଦକ୍ଷେପକୁ ସ୍ୱାଗତ କରି ଶ୍ରୀ ସ୍ୱାଇଁଙ୍କ ପ୍ରତି କୃତଜ୍ଞତା ପ୍ରକାଶ କରିଛନ୍ତି ।
