କେନ୍ଦ୍ରାପଡ଼ା (ଓଡ଼ିଶା ତାଜା ନ୍ୟୁଜ୍) :- କେନ୍ଦ୍ରାପଡା ଜିଲ୍ଲାର ଡେରାବିଶ ବ୍ଲକ ଅନ୍ତର୍ଗତ ରାମଚନ୍ଦ୍ର ନୋଡାଲ ହାଇସ୍କୁଲ କ୍ଲଷ୍ଟରରେ ଅବସ୍ଥିତ ବାସନ୍ତୀ ମଡେଲ ଅପର ପ୍ରାଥମିକ ବିଦ୍ୟାଳୟର ମୁଖ୍ୟଶିକ୍ଷକଙ୍କ ବିଦାୟ ସମାରୋହ ଶୁକ୍ରବାର ଦିନ ବହୁତ ଆଡମ୍ବର ଓ ଶୋଭାମୟ ପରିବେଶରେ ଅନୁଷ୍ଠିତ ହୋଇଯାଇଛି।
ଏହି କାର୍ଯ୍ୟକ୍ରମରେ ବ୍ଲକ ଉନ୍ନୟନ ଅଧିକାରୀ ଶ୍ରୀମତୀ ମମତା ବାରିକ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଡେରାବିଶ ତହସିଲଦାର ମହୋଦୟା ଗରିମାମୟ ଉପସ୍ଥିତି ଜଣାଇଥିଲେ।
ବିଶିଷ୍ଟ ଅତିଥି ଭାବେ ବିଆରସିସି ଶ୍ରୀ ଦେବଦତ୍ତ ସତପଥୀ, ଏବିଇଓ ଶ୍ରୀ ସଚ୍ଚିକାନ୍ତ ମିଶ୍ର, ଚାଟରାଚକଡା ପଞ୍ଚାୟତର ସରପଞ୍ଚ ଶ୍ରୀମତୀ ମମତା ରାଉତ ଉପସ୍ଥିତ ଥିଲେ । ନିକଟସ୍ଥ ବିଦ୍ୟାଳୟ ମାନଙ୍କର ଶିକ୍ଷକ-ଶିକ୍ଷୟତ୍ରୀ ମାନେ ଏହି ସମାରୋହରେ ଯୋଗଦେଇଥିଲେ । ଓଲଢ଼ି ଉର୍ଦ୍ଦୁ ପ୍ରାଥମିକ ବିଦ୍ୟାଳୟର ଶ୍ରୀ ଏସ୍.କେ. ବରକତୁଲ୍ଲା ଓ ଶ୍ରୀମତୀ ରଶ୍ମିତା ସେଂଧ ଏହି କାର୍ଯ୍ୟକ୍ରମରେ ସକ୍ରିୟ ଭାଗ ନେଇଥିଲେ ।
କାର୍ଯ୍ୟକ୍ରମରେ ମୁଖ୍ୟଶିକ୍ଷକଙ୍କ ସେବାଜୀବନ ଓ ଶିକ୍ଷାକ୍ଷେତ୍ରରେ ତାଙ୍କର ଅବଦାନକୁ ସ୍ମରଣ କରାଯାଇଥିଲା ଏବଂ ସମସ୍ତ ଅତିଥିମାନେ ତାଙ୍କୁ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଥିଲେ । ଶେଷରେ ଓଡିଶା ପ୍ରାଥମିକ ଶିକ୍ଷକ ସଂଘର ଜିଲ୍ଲା ସଚିବ ଶ୍ରୀ ଅଶ୍ୱିନୀ କୁମାର ରାଉତ ସମାପନୀ ଧନ୍ୟବାଦ ଜ୍ଞାପନ କରି ସମସ୍ତ ଅତିଥି, ଶିକ୍ଷକ ଓ ଅଂଶଗ୍ରାହୀଙ୍କୁ ଧନ୍ୟବାଦ ଜଣାଇଥିଲେ । ସମସ୍ତଙ୍କ ସହଯୋଗରେ କାର୍ଯ୍ୟକ୍ରମଟି ସଫଳ ଭାବେ ସମାପ୍ତ ହୋଇଥିଲା ।
