ଭୁବନେଶ୍ୱର (ଓଡ଼ିଶା ତାଜା ନ୍ୟୂଜ୍) (ନିପ୍ର ) :- ରାଜଧାନୀ ଭୁବନେଶ୍ୱରର ଟଙ୍କପାଣି ରୋଡ଼ ସ୍ଥିତ ସାଇଁ ମନ୍ଦିର ନିକଟରେ ବାସୁଦେବ ନଗରରେ ଭକ୍ତି ଓ ଆସ୍ଥାର ଅନନ୍ୟ ମେଳ ଦେଖିବାକୁ ମିଳିଛି । ଏଠାରେ ସ୍ଥାନୀୟ ନିବାସୀ ବନମାଳା ମୈତୀ ଓ ତାଙ୍କ ପୁତ୍ର, ସମାଜସେବୀ ଲକ୍ଷ୍ମୀକାନ୍ତ ମୈତୀଙ୍କ ପ୍ରୟାସରେ ଶ୍ରୀଶ୍ରୀ ଅଷ୍ଟପ୍ରହର ନାମଯଜ୍ଞର ଭବ୍ୟ ଆୟୋଜନ ହେଉଛି ।
ଲକ୍ଷ୍ମୀକାନ୍ତ ମୈତୀ କହିଛନ୍ତି ଯେ, ପରମ କରୁଣାମୟ ଶ୍ରୀଗୁରୁ ବୈଷ୍ଣବ ଓ ଶ୍ରୀ ଶଚୀନନ୍ଦନ ଗୌରହରିଙ୍କ କୃପାରେ ପ୍ରତିବର୍ଷ ଏପ୍ରିଲ୍ ମାସର ପ୍ରଥମ ସପ୍ତାହରେ ଏହି ପବିତ୍ର ନାମଯଜ୍ଞ ଆୟୋଜିତ ହୋଇଆସୁଛି । ଏହିବର୍ଷ ମଧ୍ୟ ୮ ରୁ ୧୦ ଏପ୍ରିଲ୍ ପର୍ଯ୍ୟନ୍ତ ତିନି ଦିନିଆ ଧାର୍ମିକ କାର୍ଯ୍ୟକ୍ରମ ଚାଲିଛି, ଯେଉଁଥିରେ ବହୁ ସଂଖ୍ୟକ ଶ୍ରଦ୍ଧାଳୁ ଯୋଗଦେଉଛନ୍ତି ।
ବୁଧବାର ଦିନ ଶ୍ରୀହରି ନାମଯଜ୍ଞର ବିଧିବତ୍ ସ୍ଥାପନା ସହ କାର୍ଯ୍ୟକ୍ରମର ଆରମ୍ଭ ହୋଇଥିଲା । ଗୁରୁବାର ପ୍ରାତଃକାଳରୁ ଅଷ୍ଟପ୍ରହର (୨୪ ଘଣ୍ଟିଆ) ଶ୍ରୀନାମ ସଂକୀର୍ତନ ଆରମ୍ଭ ହୋଇ ଅବିରତ ଚାଲିଥିଲା । ଏହି ସମୟରେ ‘ହରେ କୃଷ୍ଣ ହରେ କୃଷ୍ଣ, କୃଷ୍ଣ କୃଷ୍ଣ ହରେ ହରେ-ହରେ ରାମ ହରେ ରାମ, ରାମ ରାମ ହରେ ହରେ’ ମହାମନ୍ତ୍ରର ଧ୍ୱନିରେ ସମଗ୍ର ଅଞ୍ଚଳ ଭକ୍ତିମୟ ହୋଇଉଠିଥିଲା ।
ଚାରିପାଖରେ ଗୁଞ୍ଜିଉଠୁଥିବା ହରିନାମ ସଂକୀର୍ତନ ଭକ୍ତମାନଙ୍କୁ ଭକ୍ତିରସରେ ମଗ୍ନ କରିଦେଇଥିଲା । ଦିନଭରି ଭଜନ-କୀର୍ତନ, ସଂକୀର୍ତନ ମଣ୍ଡଳୀ ଓ ବିଭିନ୍ନ ଧାର୍ମିକ ଅନୁଷ୍ଠାନ ଆୟୋଜିତ ହୋଇଥିଲା । ଗୁରୁବାର ସନ୍ଧ୍ୟାରେ ପ୍ରାୟ ୨ ହଜାର ଶ୍ରଦ୍ଧାଳୁ ଓ ସ୍ଥାନୀୟ ଲୋକ ମହାପ୍ରସାଦ ଗ୍ରହଣ କରିଥିଲେ । ଏହି ଆୟୋଜନରେ ସମସ୍ତ ଶ୍ରେଣୀର ଲୋକଙ୍କ ସକ୍ରିୟ ଭାଗିଦାରି ଦେଖିବାକୁ ମିଳିଥିଲା,
ଯାହା ସାମାଜିକ ସମରସତା ଓ ଧାର୍ମିକ ସାମ୍ପ୍ରୀତିର ଦୃଷ୍ଟାନ୍ତ ପ୍ରଦାନ କରିଛି । ଆୟୋଜକମାନଙ୍କ କହିବା ଅନୁଯାୟୀ, ଶୁକ୍ରବାର ପ୍ରାତଃକାଳରେ ନଗର କୀର୍ତନ ସହ ଏହି ଅଷ୍ଟପ୍ରହର ନାମଯଜ୍ଞର ସମାପନ କରାଯିବ । ଏହି ଭବ୍ୟ ଧାର୍ମିକ ଆୟୋଜନ ନ କେବଳ ଅଞ୍ଚଳକୁ ଆଧ୍ୟାତ୍ମିକ ଶକ୍ତିରେ ଭରିଦେଇଛି, ବରଂ ଲୋକମାନଙ୍କୁ ଭକ୍ତି, ଶାନ୍ତି ଓ ସମୂହିକତାର ସନ୍ଦେଶ ମଧ୍ୟ ପ୍ରଦାନ କରିଛି ।
