ହିଞ୍ଜିଳିକାଟୁ (ଓଡ଼ିଶା ତାଜା ନ୍ୟୂଜ୍) (ନିପ୍ର) :- ହିଞ୍ଜିଳିକାଟୁ ତହସିଲ ଅଧିନ କଞ୍ଚୁରୁ ରାଜସ୍ୱ ମଣ୍ଡଳ ସରଧାପୁର – ଶଙ୍କର ଚକ୍ଷୁ ଚିକିତ୍ସାଳୟ ରାସ୍ତା ନିକଟରୁ ଗତ ଚାରି ଦିନ ଧରି ବେଧଡକ ଭାବେ ପ୍ରଚୁର ପରିମାଣରେ ମାଟି ଚାଲାଣ ହେଉଥିବା ଦେଖିବାକୁ ମିଳିଛି। ମାଟି ମାଫିଆଙ୍କ ପ୍ରତ୍ୟକ୍ଷ ସହଯୋଗ ଓ ସମର୍ଥନ ବଳରେ ଦୈନିକ ଶତାଧିକ ଟ୍ରାକ୍ଟର ନିୟୋଜିତ ହୋଇଥିବା ଜଣା ପଡ଼ିଛି। ଗତ ଚାରି ଦିନ ଧରି ଭୋର୍ ସକାଳୁ ବିଳମ୍ବିତ ରାତି ଯାଏଁ ସମ୍ପୃକ୍ତ ସ୍ଥାନରୁ ଅତି କମରେ ଶହେ ଟ୍ରିପ ମାଟି ଚାଲାଣ ହେଉଥିବା ଦେଖାଯାଇଛି। ମାଫିଆ ମାନେ ଜେସିବି ମେସିନ ଲଗାଇ ଖୁଲମ୍ ଖୋଲା ମାଟି ଚାଲାଣ କରୁଥିବା ବେଳେ ସ୍ଥାନୀୟ ଅଞ୍ଚଳର ଲୋକେ ଭୟ ଓ ଆଶଙ୍କାରେ ରହି ପ୍ରଶାସନ ନିକଟରେ ଅଭିଯୋଗ କରିବା ପାଇଁ ସାହସ କରି ନ ଥିଲେ ।
ଏପରି ସ୍ଥଳେ ଗତ ଚାରି ଦିନ ଧରି ମାଟି ମାଫିଆ ମାନେ ନିର୍ଭୟରେ ଓ ବେଧଡକ ଭାବେ ପ୍ରଚୁର ପରିମାଣରେ ମାଟି ଚାଲାଣ କରିଥିବା ଜଣାପଡ଼ିଛି। ଏ ବିଷୟରେ ଆମ ପ୍ରତିନିଧି ହିଞ୍ଜିଳିକାଟୁ ତହସିଲଦାର ତପନ କୁମାର ମହାପାତ୍ରଙ୍କୁ ଯୋଗାଯୋଗ କରିଥିଲେ। ପ୍ରତ୍ୟୁତ୍ତରରେ ତହସିଲଦାର କନିଷ୍ଠ ଖଣିଜ ଅଧିକାରୀ ବିପ୍ରବର ସିଂଙ୍କୁ ଅବଗତ କରିବି ବୋଲି କହିଥିଲେ । ମାଟି ଚୋରା ଚାଲାଣ ଉପରେ କନିଷ୍ଠ ଖଣିଜ ଅଧିକାରୀଙ୍କ ସହ ଯୋଗାଯୋଗ ବେଳେ କୌଣସି ପ୍ରତିକ୍ରିୟା ମିଳିପାରି ନ ଥିଲା।
ଏ ବିଷୟରେ ମଧ୍ଯ କଞ୍ଚୁରୁ ରାଜସ୍ବ ମଣ୍ଡଳରେ ଦୀର୍ଘ ଚାରି ବର୍ଷ ଧରି ଗାଦି ମାଡ଼ି ବସିଥିବା ରାଜସ୍ବ ନୀରିକ୍ଷକ ରାମଚନ୍ଦ୍ର ମହାନ୍ତିଙ୍କ ସହ ଯୋଗାଯୋଗ କରା ଯାଇଥିଲା। କିନ୍ତୁ ସେ ଏହାକୁ ହାଲକା ଭାବେ ଗ୍ରହଣ କରିଥିଲେ। ସୁଚନା ଯୋଗ୍ୟ,ଜିଲ୍ଲା ରାଜସ୍ବ ସମୀକ୍ଷା ବୈଠକରେ ଅଞ୍ଚଳରେ ମାଟି, ମୋରମ, ପଥର,ବାଲି ଆଦି ଲଘୁ ଖଣିଜ ପଦାର୍ଥ ଚୋରା ଚାଲାଣ ଉପରେ ନିୟମିତ ଭାବେ ଚଢ଼ଉ ଓ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଉପ ଜିଲ୍ଲାପାଳଙ୍କ ସ୍ପଷ୍ଟ ନିର୍ଦ୍ଦେଶ ରହିଛି। ଏହା ବ୍ୟତୀତ ବିଡ଼ିଓ, ତହସିଲଦାର, ଥାନା ଅଧିକାରୀ ଓ ଖଣିଜ ଅଧିକାରୀଙ୍କୁ ନେଇ ଏକ ତଦାରଖ କମିଟି ଗଠନ ହୋଇଛି।
ଏତେ ସବୁ ନିୟମ କାନୁନ ଓ ବିଧିବ୍ୟବସ୍ଥା ଥିଲେ ମଧ୍ୟ ମାଟି ମାଫିଆ ମାନେ ଚାରି ଦିନରେ ଆନୁମାନିକ ପ୍ରାୟ ୧୨୦୦ ଘନ ଫୁଟ ମାଟି ଜେସିବି ଲଗାଇ ବେଶ ଆରାମରେ ଖୋଳି ଖୁଲମଖୁଲା ଟ୍ରାକ୍ଟରରେ ବୋହି ନେଇଗଲେ । ଉପ ଜିଲ୍ଲାପାଳଙ୍କ ନିର୍ଦ୍ଦେଶକୁ ବାଏଁ ବାଏଁ ଉଡ଼ାଇ ଦେଇ ସ୍ଥାନୀୟ ପ୍ରଶାସନର ଧଜିଆ ଉଡ଼ାଇ ମାଫିଆ ମାନେ ରାଜସ୍ଵ ଗିଳିବାରେ ସକ୍ଷମ ହୋଇଥିବା ଜଣା ପଡିଛି। ପ୍ରଶାସନିକ ଅଧିକାରୀଙ୍କ ମଧ୍ୟରେ ଉପଯୁକ୍ତ ସମନ୍ଵୟ ଅଭାବରୁ ସରକାର ବିପୁଳ ରାଜସ୍ଵ ହରାଉଥିବା ବେଳେ ମାଫିଆ ସକ୍ରିୟ ହୋଇ ପ୍ରଶାସନିକ ସ୍ଥାଣୁତା ଓ ଅପାରଗତାରୁ ବେଶ ଲାଭବାନ ହେଉଥିବା ଜଣା ପଡିଛି।
କେବେ କେମିତି ଧର୍ମକୁ ଆଖିଠାର ଭଳି ଗୋଟେ ଦୁଇଟି ବାଲି, ପଥର ବୋଝେଇ ଗାଡ଼ି ଧରି କନିଷ୍ଠ ଖଣିଜ ଅଧିକାରୀ, ତହସିଲଦାର ଏବଂ ପୁଲିସ ବାହାବା ନେଉଥିବା ବେଳେ କିନ୍ତୁ ଗଳା ବାଟ ଦେଇ ନକଲି କିମ୍ବା ଅନ୍ୟ ବାଲି ଘାଟର ଟ୍ରାଞ୍ଜିଟ ପାସ ଯୋଗେବହୁ ଲଘୁ ଖଣିଜ ପଦାର୍ଥ ସ୍ୱାଭାବିକ ଓ ବେଆଇନ ଭାବେ ଦିନ ରାତି ଚାଲାଣ ହେଉଥିବା ଦେଖାଯାଇଛି। ଏଭଳି ବେଆଇନ ଚାଲାଣ ଉପରେ ସ୍ଥାନୀୟ ପ୍ରଶାସନର କେବେ ଦୃଷ୍ଟି ପଡିବ ଓ କାର୍ଯ୍ୟନୁଷ୍ଠାନ ଗ୍ରହଣ କରିବାରେ ତତ୍ପରତା ପ୍ରକାଶ କରିବ ତାହା ଦେଖିବାକୁ ବାକି ରହିଲା।
