ରଣପୁର (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ନୟାଗଡ ଜିଲ୍ଲା ରଣପୁର ବ୍ଲକ ଅନ୍ତର୍ଗତ ମୟୂରଝାଲିଆ ଗାଁର ଯୁବ ଚାଷୀ ବେଲେଶ୍ୱର କଳସ ।ନିଜ ଇଛା ଶକ୍ତି ବଳରେ ଫଳାଇଛନ୍ତି ସୁନାର ଫସଲ । ଚାକିରି ପଛରେ ନପଡ଼ି ପ୍ରଥମେ ଅଧା ଏକର ଜମିରେ ମକା ଚାଷ ଆରମ୍ଭ କରିଥିଲେ । ଏଥରୁ ଭଲ ଲାଭ ମିଳୁଥିବା ବେଳେ ସ୍ଥାନୀୟ ଅଂଚଳରେ ଏବେ ସେ ଜଣେ ସଫଳ ଚାଷୀ ଭାବେ ନିଜର ପରିଚୟ ସୃଷ୍ଟି କରିଛନ୍ତି । ନିଜେ ୧. ୫ଲକ୍ଷ ରୁ ୨ଲକ୍ଷ ଟଙ୍କା ଖର୍ଚ୍ଚ କରି ଚାଷରୁ ବର୍ଷକୁ ପାଖାପାଖୁ ୫ରୁ ୬ ଲକ୍ଷ ଟଙ୍କାର ରୋଜଗାର କରିପାରୁଛନ୍ତି । ନିଜେ ଆତ୍ମନିର୍ଭରଶୀଳ ହେବା ସହ ଅନ୍ୟ ୭ଟି ପରିବାରକୁ ସେ ରୋଜଗାର ଦେଇପାରୁଛନ୍ତି ।
ଏବେ ସେ ୪ଏକର ଜମିରେ ଉନ୍ନତ ଜ୍ଞାନ କୌଶଳରେ , କାକୁଡ଼ି, ଫୁଲକୋବି, ବନ୍ଧା କୋବି,ବୋଦୀ, ,କଖାରୁ ଓ ମକା ଚାଷ କରିଛନ୍ତି । ତାଙ୍କ ଜମିରୁ ଉତ୍ପାଦିତ ହେଉଥିବା ପନିପରିବା ସେ ସ୍ଥାନୀୟ ବଜାର ସହ ଅନ୍ୟ ଅଞ୍ଚଳକୁ ମଧ୍ୟ ପଠାଉଛନ୍ତି । ତାଙ୍କ ଜମିରେ ୭ରୁ ୮ଜଣ ଶ୍ରମିକ କାମ କରି ରୋଜଗାର କରିପାରୁଛନ୍ତି । ପୂର୍ବରୁ ଏହି ଶ୍ରମିକମାନଙ୍କୁ ରୋଜଗାର କରିବା ପାଇଁ ବାହାର ରାଜ୍ୟକୁ ଯିବାକୁ ପଡୁଥିଲା । ବେଲେଶ୍ୱରଙ୍କ ଜମିରେ କାମ କରି ରୋଜଗାର କରିପାରୁଥିବାରୁ ସେମାନେ ଖୁସି ପ୍ରକାଶ କରିଛନ୍ତି ।ନିଜ ପୁଅର ସଫଳତା ଦେଖି ବେଶ ଖୁସି ଅଛନ୍ତି ବେଲେଶ୍ୱର କଳାସଙ୍କ ମାଆ ।
ଚାଷ କରି ସଫଳତା ପାଇଥିବାରୁ ଯୁବ ଶ୍ରୀ କଳସଙ୍କୁ ସାଧୁବାଦ ଜଣାଇଛନ୍ତି ସ୍ଥାନୀୟ ବୁଦ୍ଧିଜୀବୀ ଓ ମୟୂରଝାଲିଆ ଗ୍ରାମପଞ୍ଚୟତ ସରପଞ୍ଚ ସୁଶାନ୍ତ କୁମାର କଳସ ! ବେଲେଶ୍ୱର କଳସଙ୍କ କହିବା ଅନୁସାରେ ଯଦି ରଣପୁର କୃଷି ବିଭାଗ ତରଫୁରୁ ଆର୍ଥିକ ସହାୟତା ସହିତ ସମନ୍ଵୟରକ୍ଷା କରି ସମସ୍ତ ସରକାରୀ ସୁବିଧା ସୁଯୋଗ ମିଳନ୍ତା ତେବେ ଚାଷରୁ ମଧ୍ୟ ଜଣେ ଚାକିରିଆଙ୍କ ଭଳି ଭଲ ଅର୍ଥ ଉପାର୍ଜନ କରିପାରିବେ । ଆଜି ସେ ମୟୂରଝାଲିଆ ଅଞ୍ଚଳର ଅନ୍ୟ ଚାଷୀଙ୍କ ପାଇଁ ଜଣେ ସଫଳ ପଥପ୍ରଦର୍ଶକ ସାଜିଛନ୍ତି ।
