ରାଜ୍ୟସଭା ନିର୍ବାଚନ : ନବୀନଙ୍କ ପାଇଁ ପ୍ରତିଶୋଧ – ଦିଲ୍ଲୀପଙ୍କ ପାଇଁ କ୍ଷମତା !

ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ରାଜ୍ୟସଭା ନିର୍ବାଚନ ଏହି ମାସ ୧୬ ତାରିଖରେ ଅନୁଷ୍ଠିତ ହେବ l ଓଡିଶାରୁ ଖାଲି ପଡୁଥିବା ଚାରୋଟି ଆସନ ପାଇଁ ନିର୍ବାଚନ ଅନୁଷ୍ଠିତ ହେବ l ବିଜେଡି ସଂତୃପ୍ତ ମିଶ୍ରଙ୍କୁ ପ୍ରାର୍ଥୀ କରିଛି l ବିଜେପି ନିଜ ସଂଖ୍ୟା ଦୃଷ୍ଟିରୁ ମନମୋହନ ସାମଲ ଓ ସୁଜିତ କୁମାରଙ୍କୁ ପ୍ରାର୍ଥୀ କରିଛି l ଚତୁର୍ଥ ଆସନ ପାଇଁ ଦିଲ୍ଲୀପ ରାୟଙ୍କୁ ସମର୍ଥନ କରୁଛି ବିଜେପି ଓ ଡାକ୍ତର ଦତ୍ତ୍ୱେଶ୍ୱର ହୋତାଙ୍କୁ ସମର୍ଥନ କରୁଛନ୍ତି ଉଭୟ ବିଜେଡି ଓ କଂଗ୍ରେସ l ତେଣୁ ରୋଚକ ସ୍ଥିତିରେ ଅଛି ରାଜ୍ୟସଭା ନିର୍ବାଚନ l ଓଡ଼ିଶାରେ ଏବେ ଡବଲ ଇଂଜିନ ସରକାର l ବିଜେପି ଦିଲ୍ଲୀପ ରାୟଙ୍କୁ ସମର୍ଥନ କରୁଛି l

ଦିଲ୍ଲୀପ ରାୟ ହେଉଛନ୍ତି ବିଜୁ ଜନତା ଦଳର ଜଣେ ପ୍ରତିଷ୍ଠିତ ସଦସ୍ୟ l ମୂଳତଃ ସେ ଅଣ କଂଗ୍ରେସ ରାଜନୀତିରୁ ନିଜର ରାଜନୈତିକ ଜୀବନ ଆରମ୍ଭ କରିଥିଲେ l ରାଉଲକେଲା ମ୍ୟୁନିସିପାଲିଟିର ଚେୟାରମ୍ୟାନ ଭାବରେ ରାଜନୈତିକ ଯାତ୍ରା ଆରମ୍ଭ କରିଥିଲେ l ୧୯୯୦ ମସିହାରେ ବିଜୁ ପଟନାୟକଙ୍କ ଜନତା ଦଳ ସରକାରରେ ସେ ଶିଳ୍ପ ମନ୍ତ୍ରୀ ହେଇଥିଲେ l ଏହା ପର ଠାରୁ ସେ ଆଉ ପଛକୁ ଫେରି ଚାହିଁ ନାହାନ୍ତି l ବିଜୁ ପଟନାୟକଙ୍କ ଅତି ଘନିଷ୍ଠ ହେବା ସହିତ ତାଙ୍କରି ସୁପାରିଶ କ୍ରମେ କେନ୍ଦରେ ଯେତେ ଅଣ କଂଗ୍ରେସ ସରକାର ଗଠନ ହେଇଛି ସବୁଥିରେ ସେ ମନ୍ତ୍ରୀ ହେଇ ପାରିଥିଲେ l

ଏଚ. ଡି. ଦେବଗୌଡ଼ , ଆଇ. କେ. ଗୁଜରାଲ ଓ ଅଟଳ ବିହାରୀ ବାଜପେୟି ସରକାରରେ ସେ କେନ୍ଦ୍ରମନ୍ତ୍ରୀ ଥିଲେ l ବିଜୁ ବାବୁ ଓଡ଼ିଶାରେ ଗୋଟିଏ ଆଞ୍ଚଳିକ ଦଳ ତିଆରି କରିବାର ସ୍ବପ୍ନ ଦେଖୁଥିଲେ l ଉତ୍କଳ କଂଗ୍ରେସ ପ୍ରତିଷ୍ଠା କରି ସେ ବିଫଳ ମଧ୍ୟ ହେଇଥିଲେ l ସେ ସର୍ବଦା ଦିଲ୍ଲୀପ ରାୟଙ୍କୁ ତାଙ୍କ ମନର କଥା କହୁଥିଲେ l ଯେହେତୁ ଦିଲ୍ଲୀପ ତାଙ୍କର ଅତି ଘନିଷ୍ଠ ଥିଲେ l  ବିଜୁ ବାବୁଙ୍କ ମୃତ୍ୟୁ ପରେ ଗୋଟିଏ ଆଞ୍ଚଳିକ ଦଳ ଗଠନର ପ୍ରସ୍ତାବ ଆସିଲା  ଓ ଭାରତୀୟ ଜନତା ପାର୍ଟିର ସହଯୋଗରେ ଓଡ଼ିଶାରେ ଗୋଟିଏ ନୂଆ ଆଞ୍ଚଳିକ ଦଳ ଗଠନ ହେଲା ଯାହାର ନାମ ରହିଲା ବିଜୁ ଜନତା ଦଳ l

ଏହି ଦଳର ମୂଳ ଆଭିମୁଖ୍ୟ ଥିଲା କଂଗ୍ରେସ ବିରୁଦ୍ଧରେ ଲଢେଇ l ଏହି ଦଳର ନେତୃତ୍ୱ ନେଲେ ବିଜୁ ବାବୁଙ୍କ ପୁତ୍ର ନବୀନ ପଟନାୟକ l ଦିଲ୍ଲୀପ ରାୟ, ବିଜୟ ମହାପାତ୍ର, ରାମକୃଷ୍ଣ ପଟନାୟକ, ପ୍ରସନ୍ନ ପାଟଶାଣି, ପ୍ରସନ୍ନ ଆଚାର୍ଯ୍ୟ, ଦେବୀ ମିଶ୍ର, ରାଜା ସ୍ୱାଇଁ ପରି ଅନେକ ଅଣ କଂଗ୍ରେସ ନେତା ଏହି ଅଭିମୁଖ୍ୟରେ ସାମିଲ ହେଲେ l ଏହି ଆଭିମୁଖ୍ୟ ସଫଳ ହେଲା l ଦୀର୍ଘ ବର୍ଷ ପରେ ଓଡ଼ିଶାରେ ଅଣ କଂଗ୍ରେସ ସରକାର ଗଠନ ହେଲା l

ବିଜେଡି – ବିଜେପି ମିଳିତ ଭାବରେ ସରକାର ଗଢିଲେ  ଓ ନବୀନ ପଟନାୟକ ଏହି ମେଣ୍ଟ ସରକାରର ମୁଖ୍ୟମନ୍ତ୍ରୀ ହେଲେ l ଦିଲ୍ଲୀପ ରାୟ କେନ୍ଦ୍ରରେ ବାଜପେୟୀ ସରକାରରେ ମନ୍ତ୍ରୀ ହେଲେ l ସବୁ ଠିକ ଠାକ ଥିଲା କିନ୍ତୁ ଅଚାନକ ୨୦୦୨ ମସିହାରେ ଦିଲ୍ଲୀପ ରାୟଙ୍କୁ କେନ୍ଦ୍ର ମନ୍ତ୍ରୀମଣ୍ଡଳରୁ ବହିଷ୍କାର କରାଗଲା l ଦଳର ସଭାପତି ନବୀନ ପଟନାୟକଙ୍କ ସୁପାରିଶରେ କେନ୍ଦ୍ର ମନ୍ତ୍ରୀମଣ୍ଡଳ ସହିତ ବିଜୁ ଜନତା ଦଳରୁ ବି ବିତାଡିତ ହେଇଥିଲେ  ଦିଲ୍ଲୀପ l ଏହା ପରଠାରୁ ଆଉ ବିଜେଡିକୁ ପ୍ରତ୍ୟାବର୍ତ୍ତନ କରି ନାହାନ୍ତି ଦିଲ୍ଲୀପ l ସେହି ବର୍ଷ ଅର୍ଥାତ ୨୦୦୨ ମସିହାରେ ଓଡ଼ିଶାରେ ରାଜ୍ୟସଭା ନିର୍ବାଚନ ଅନୁଷ୍ଠିତ ହେଇଥିଲା l

ଦିଲ୍ଲୀପ ରାୟ ସ୍ୱାଧୀନ ପ୍ରାର୍ଥୀ ଭାବରେ ନିର୍ବାଚନ ଲଢ଼ିଲେ l ନବୀନ ପଟନାୟକ ମେଣ୍ଟ ସରକାରର ମୁଖ୍ୟମନ୍ତ୍ରୀ l ସମସ୍ତ ପ୍ରକାର କଳବଳ କୌଶଳ ପ୍ରୟୋଗ କରାଗଲା l ଶେଷରେ ବାଜିମାତ କଲେ ଦିଲ୍ଲୀପ ଓ ତାଙ୍କ ପ୍ରତି ନବୀନ କରିଥିବା ଅନ୍ୟାୟର ପ୍ରତିଶୋଧ ନେଲେ ବୋଲି ସେହି ସମୟରେ ଆଲୋଚନା ହେଲା l ଦିଲ୍ଲୀପ କିନ୍ତୁ କେନ୍ଦ୍ରରେ ମନ୍ତ୍ରୀ ହେଇ ପାରିଲେ ନାହିଁ l ୨୦୦୪ ମସିହାରେ କେନ୍ଦ୍ରରେ ସତ୍ତା ପରିବର୍ତ୍ତନ ହେଲା ଓ ୟୁପିଏ କ୍ଷମତାକୁ ଆସିଲା ! ସମୟକ୍ରମେ ଦିଲ୍ଲୀପ ରାଜନୈତିକ ବିକଳ୍ପ ଭାବରେ କଂଗ୍ରେସରେ ଯୋଗ ଦେଇଥିଲେ କିନ୍ତୁ ସଫଳତା ପାଇ ନ ଥିଲେ l

ପରେ ବିଜେପିରେ ଯୋଗ ଦେଇ ୨୦୧୪ ମସିହାରେ ରାଉଲକେଲା ରୁ ବିଧାୟକ ନିର୍ବାଚିତ ହେଇଥିଲେ l ୨୦୧୯ ମସିହାରେ ସେ ଟିକଟ ପାଇ ନ ଥିଲେ ଓ ୨୦୨୪ ମସିହାରେ ସେ ପୁନର୍ବାର ବିଜେପି ଟିକଟ ପାଇ ରାଉଲକେଲାରୁ ନିର୍ବାଚନ ଲଢ଼ିଥିଲେ ଏବଂ ନିର୍ବାଚନ ହାରି ଯାଇଥିଲେ l ଅଟଳ ବିହାରୀ ବାଜପେୟୀ ସରକାରରେ କୋଇଲା ମନ୍ତ୍ରୀ ଥିବା ସମୟରେ କୋଇଲା ବ୍ଲକ ଆବଣ୍ଟନରେ ଘୋର ଅନିୟମିତତା ହେଇଥିଲା ଓ ସିବିଆଇ କେଶ ହେଇଥିଲା l ୬ ଅକ୍ଟୋବର, ୨୦୨୦ ମସିହାରେ ସିବିଆଇ ଏହି ଘଟଣାରେ ଦିଲ୍ଲୀପ ରାୟଙ୍କୁ ଦୋଷୀ ସାବ୍ୟସ୍ତ କରିଥିଲା l

ଦିଲ୍ଲୀପ ଏହି କେଶରେ ତୁରନ୍ତ ଜାମିନ ପାଇଥିଲେ ଓ ଏହି କେଶ ଏବେ ମଧ୍ୟ ବିଚରାଧୀନ ଅଛି l ପୁଣି ଥରେ ଇତିହାସର ପୁନରାବୃତ୍ତି ଘଟିଛି l ନବୀନ ଓ ଦିଲ୍ଲୀପ ପୁଣି ଥରେ ରାଜନୈତିକ ଲଢେଇରେ ମୁହାଁ ମୁହିଁ ହେଇଛନ୍ତି l ୨୦୦୨ ମସିହା ରାଜ୍ୟସଭା ନିର୍ବାଚନରେ ସିକ୍ରେଟ ଵାଲାଟରେ ନିର୍ବାଚନ ଅନୁଷ୍ଠିତ ହେଇଥିଲା l ଏବେ ବହୁତ ପରିବର୍ତ୍ତନ ଘଟିଛି l କୋଉ ବିଧାୟକ କାହାକୁ ମତଦାନ କଲେ ସବୁ ସ୍ପଷ୍ଟ ଜଣା ପଡିବ l ଏବେ ନିର୍ବାଚନ ଜିତିବା ବହୁତ କଷ୍ଟ ହେବ ଦିଲ୍ଲୀପଙ୍କ ପାଇଁ l ଦ୍ଵିତୀୟରେ ବିଜେଡି ଏବେ କ୍ଷମତାରେ ନାହିଁ l ବିରୋଧୀ ଦଳ ଆସନରେ ବସିଛି l

ନବୀନ ଏବେ ବିରୋଧୀ ଦଳ ନେତା l ଉଭୟ ବିଜେପି ଓ କଂଗ୍ରେସ ଠାରୁ ସମଦୂରତା ବଜାୟ ରଖୁଥିବା କଥା କହୁଥିଲେ ନବୀନ l କିନ୍ତୁ ଦିଲ୍ଲୀପ ଓ ବିଜେପିକୁ ଚେକ ଦେବା ପାଇଁ କଂଗ୍ରେସ ସହିତ ହାତ ମିଳାଇଛନ୍ତି ନବୀନ l ମିଳିତ ପ୍ରାର୍ଥୀ ଭାବେ ଡାକ୍ତର ଦତ୍ତ୍ୱେଶ୍ୱର ହୋତାଙ୍କୁ ଛିଡା କରାଇଛନ୍ତି ନବୀନ l ଯଦି ଏହି ରାଜନୈତିକ ଖେଳରେ ନବୀନ ସଫଳ ହୁଅନ୍ତି ତେବେ ବିଜେଡି ଓ ନବୀନଙ୍କ ପାଇଁ ପ୍ରତ୍ୟାବର୍ତ୍ତନର ବାଟ ଫିଟିବ ବୋଲି ଆଶା କରାଯାଉଛି l  ଯଦି ଦିଲ୍ଲୀପ ରାୟ ବାଜିମାତ କରନ୍ତି ତେବେ ଓଡ଼ିଶାରେ ବିଜେଡି ଯୁଗର ସୂର୍ଯ୍ୟାସ୍ତ ଏକ ପ୍ରକାର ନିଶ୍ଚିନ୍ତ ବୋଲି ରାଜନୀତି ମହଲରେ ଚର୍ଚ୍ଚା  l