ହିଞ୍ଜିଳିକାଟୁ (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ଗଞ୍ଜାମ ଜିଲ୍ଲା ପ୍ରଶାସନ ଓ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଓ ଜନସ୍ବାସ୍ଥ୍ୟ ଅଧିକାରୀଙ୍କ ନିର୍ଦ୍ଦେଶ କ୍ରମେ ବରିଷ୍ଠ ନାଗରିକଙ୍କ ପାଇଁ ସପ୍ତାହ ଟିଏ କାର୍ଯ୍ୟକ୍ରମ ଆନୁକୁଲ୍ୟରେ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟ ତରଫରୁ ବୁଧବାର ବରିଷ୍ଠ ନାଗରିକଙ୍କ ସ୍ଵାସ୍ଥ୍ୟ ପରୀକ୍ଷା ଶିବିର ଅନୁଷ୍ଠିତ ହୋଇଛି । ବିଶ୍ଵ ସାମାଜିକ ନ୍ୟାୟ ଦିବସ ପାଳନ ଉପଲକ୍ଷେ ଉପଖଣ୍ଡ ଚିକିତ୍ସାଳୟ ଅଧୀକ୍ଷକ ଡାକ୍ତର ଶ୍ରୀକାନ୍ତ ସାହୁଙ୍କ ତତ୍ତ୍ୱାବଧାନରେ ସମ୍ମିଳନୀ କକ୍ଷରେ ଆୟୋଜିତ ଶିବିରରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଓ ଜନସ୍ବାସ୍ଥ୍ୟ ଅଧିକାରୀ ଡାକ୍ତର ଭବାନୀ ଶଙ୍କର ମିଶ୍ର,
ଜିଲ୍ଲା କାର୍ଯ୍ୟକ୍ରମ ଅଧିକାରୀ ବୁଲୁ ନାଥ ସାହୁ ଓ ବରିଷ୍ଠ ନାଗରିକ ସଂଘ ସଭାପତି ତଥା ପୌର ପରିଷଦ ଅଧ୍ୟକ୍ଷ ସୁବାସ ଚନ୍ଦ୍ର ପୋଲେଇ ପ୍ରମୁଖ ଯୋଗ ଦେଇଥିଲେ । ଏହି ଅବସରରେ ଅଣ ସଂକ୍ରମିତ ରୋଗ ଓ ଯକ୍ଷ୍ମା ରୋଗର ଯାଞ୍ଚ, ରକ୍ତ ଶର୍କରା, ଥାଇରଏଡ ପରୀକ୍ଷା ଓ ରକ୍ତ ଶର୍କରା ପରିମାଣରେ ଏଚବିଏୱାନ୍ସି ପରୀକ୍ଷା ନିରୀକ୍ଷା କରାଯାଇ ଥିଲା । ସ୍ଥାନୀୟ ସହର ସମେତ ଆଖ ପାଖ ଅଞ୍ଚଳରୁ ପାଖାପାଖି ୭୦ ଜଣ ବରିଷ୍ଠ ନାଗରିକ ଓ ବୟସ୍କା ମହିଳାଙ୍କ ସ୍ଵାସ୍ଥ୍ୟ ପରୀକ୍ଷା ସୂଚାରୁ ରୂପେ ସମ୍ପାଦିତ ହୋଇଥିଲା ।
ଆୟୋଜିତ କାର୍ଯ୍ୟକ୍ରମରେ ଡାକ୍ତର ସ୍ଵୟମ୍ବୁ ପ୍ରସାଦ ରାଏ, ସ୍ଵାସ୍ଥ୍ୟ ପର୍ଯ୍ୟବେକ୍ଷକ ଅଶୋକ କୁମାର ମିଶ୍ର,ଫାର୍ମାସୀ ଅଧିକାରୀ ସାଗର ସାହୁ, ଶୁଭଶ୍ରୀ ସ୍ଵାଇଁ, ରଜତ ସେଠୀ, ମହେଶ୍ୱତା ପାତ୍ର, ସତ୍ୟ ନାରାୟଣ ପଟ୍ଟନାୟକ ଓ ମିଲି କୁମାରୀ ପଣ୍ଡା ପ୍ରମୁଖ ସହଯୋଗ କରିଥିଲେ । ଏଲ ଆଣ୍ଡ କେ ସର୍ଭିସର ସୁପର ଭାଇଜର ଅସେଶ କୁମାର ବେହେରାଙ୍କ ନେତୃତ୍ବରେ ପରିଷ୍କାର ପରିଚ୍ଛନ୍ନ ସମ୍ପାଦିତ ହୋଇଥିଲା ।
