ଓଡ଼ିଶା ତାଜା ନ୍ୟୁଜ ( ୨୪ ସେପ୍ଟେମ୍ବର ଗୁରୁବାର ) ହିଞ୍ଜିଳିକାଟୁ :- ଗଞ୍ଜାମ ଜିଲ୍ଲାରେ କରୋନା ସଂକ୍ରମିତଙ୍କ ସଂଖ୍ୟା ହ୍ରାସ ପାଇଥିଲେ ମଧ୍ୟ ସମ୍ପୁର୍ଣ୍ଣ ବିପଦ ମୁକ୍ତ ହୋଇନାହିଁ । କରୋନାକୁ ହଟାଇବା ପାଇଁ ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେଙ୍କ ନିର୍ଦ୍ଦେଶକ୍ରମେ ଗୁରୁବାର ଠାରୁ ଅକ୍ଟେବାର ୧ ତାରିଖ ପର୍ଯ୍ୟନ୍ତ ସପ୍ତାହେ ଧରି ସାରା ଗଞ୍ଜାମ ଜିଲ୍ଲାରେ କୋଭିଡ଼ ସପ୍ତାହ ପାଳନ କରିବା ସକାଶେ ଆହ୍ୱାନ ଜଣାଇଛନ୍ତି । ଜନସାଧାରଣଙ୍କୁ ସଚେତନତା ସହ ଭୟମୁକ୍ତ ରହିବା, କୋଭିଡ଼ ନିୟମକୁ ପାଳନ କରିବା ଓ ସର୍ତକତା ପାଳନ କରିବା ପାଇଁ ଆହ୍ୱାନ ଦିଆଯାଇଛି । ଏହି ପରିପ୍ରେକ୍ଷୀରେ ଗୁରୁବାର କୋଭିଡ଼ ସପ୍ତାହ ପାଳନର ପ୍ରଥମ ଦିବସରେ ପୌର ପରିଷଦ ପକ୍ଷରୁ ଏକ କରୋନା ସଚେତନତା ରଥର ଶୁଭାରମ୍ଭ କରାଯାଇଥିଲା ।
ପୌର କାର୍ଯ୍ୟାଳୟ ପରିସରରେ କରୋନା ସଚେତନତା ରଥର ଶୁଭାରମ୍ଭ କରାଯାଇଥିଲା । ପୌର କାର୍ଯ୍ୟ ନିର୍ବାହୀ ଅଧିକାରୀ ଡ଼ଃ. ମନୋରଞ୍ଜନ ସାହୁଙ୍କ ତତବାବଧାନରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଉପ ଜିଲ୍ଲାପାଳ ପ୍ରିୟରଞ୍ଜନ ପୃଷ୍ଟି ସବୁଜ ପତକା ଦେଖାଇ ସଚେତନତା ରଥର ଶୁଭାରମ୍ଭ କରିଥିଲେ । ସମ୍ମାନିତ ଅତିଥି ଭାବେ ବିଡ଼ିଓ ପ୍ରସନ କୁମାର ପାତ୍ର, ତହସିଲଦାର ଗୋପିନାଥ କୁଅଁର, ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସ ପ୍ରମୁଖ ଯୋଗ ଦେଇଥିଲେ । ଏହି ଅବସରରେ ଡ଼ାକବାଜି ଯନ୍ତ୍ର ସହାୟତାରେ ପୌରାଂଚଳର ବିଭିନ୍ନ ୱାର୍ଡ଼ରେ ସଚେତନ କରାଯିବା ସହ ପୌରାଂଚଳ ହିଞ୍ଜିଳି ଦୁର୍ଗା ମନ୍ଦିର, ପାଟଣା ସାହି ନୃସିଂହ ମନ୍ଦିର, ପାଟଣା ସାହି, ରଜାତୋଟା ସାହି, ବଇଁଚବଣିଆ, ଆଙ୍କୋରଡ଼ା ପ୍ରଭୃତି ଅଂଚଳରେ ଜନ ସାଧାରଣଙ୍କୁ ନେଇ କରୋନାର ସମସ୍ତ ନିୟମକୁ ପାଳନ କରିବା ସକାଶେ ଶପଥ ପାଠ କରାଯାଇଥିଲା ।
ଅନ୍ୟପକ୍ଷରେ ସମ୍ମନିତ ଶିଶୁ ବିକାଶ ପ୍ରକଳ୍ପ ଅଧିକାରୀ ଶୁଭଶ୍ରୀ ପାତ୍ରଙ୍କ ତତ୍ୱାଧାନରେ କୋଭିଡ଼ ସଖୀ ମାନଙ୍କୁ ନେଇ ବ୍ଳକର ବିଭିନ୍ନ ଗ୍ରାମାଂଚଳରେ କରୋନା ମୁକ୍ତ ହିଞ୍ଜିଳି ସକାଶେ କୋଭିଡ଼ ନିୟମକୁ ପାଳନ କରିବା ନେଇ ରାଲି କରାଯିବା ସହ ପ୍ଳାକାର୍ଡ଼ ଧରି ଓ ସ୍ଳେଗାନ ଦେଇ ସଚେତନତା କରାଯାଇଥିଲା । ପଂଚସୂତ୍ରୀ ନିୟମକୁ କଡ଼ାକଡ଼ି ପାଳନ କରିବା ସହ ମାସ୍କ ବ୍ୟବହାର, ସାମାଜିକ ଦୂରତ୍ୱ ରକ୍ଷାକୁ ପାଳନ କରିବା ସହ କରୋନା ମୁକ୍ତ ହିଞ୍ଜିଳି ଗଠନ ସକାଶେ ଉପ ଜିଲ୍ଲାପାଳ ଶ୍ରୀ ପୃଷ୍ଟି ସହରବାସୀଙ୍କ ସହଯୋଗ କାମନା କରିଥିଲେ । ଆୟୋଜିତ କାର୍ଯ୍ୟକ୍ରମରେ ସ୍ୱଚ୍ଛ ସାଥୀ, ସୁପରଭାଇଜର, ଅଙ୍ଗନୱାଡ଼ି କର୍ମୀ, ଆଶା କର୍ମୀ, ମହିଳା ସ୍ୱଂୟ ସହାୟିକା ଗୋଷ୍ଠୀଙ୍କ ସମେତ ସହରର ବହୁ ବୁଦ୍ଧିଜୀବି ଅଂଶ ଗ୍ରହଣ କରିଥିଲେ ।
ପୌର ପରିଷଦ କନିଷ୍ଠ ଯନ୍ତ୍ରୀ ମାନସ ରଞ୍ଜନ ଦାଶ, ଦିଲ୍ଲିପ କୁମାର ମିଶ୍ର, ରାମକୃଷ୍ଣ ଦାଶ, ଅଶ୍ୱିନି କୁମାର ପାୟକ, ଭାସ୍କର ସାହୁ, ସୁରେନ୍ଦ୍ର ଗୌଡ଼, ଏ. ମୋହନ ଆଚାରୀ, କିରଣ ନାହାକ, ଇ.କିଶାନ କୁମାର ପାତ୍ର, ଲାଲ ମୋହନ ସେଠି, ରବିନ୍ଦ୍ର ନାହାକ, ସୁବାଷ ପଟ୍ଟନାୟକ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ । ଅନ୍ୟ ପକ୍ଷରେ କୋଭିଡ଼ ସପ୍ତାହ ପାଳନ ନେଇ ବିଭିନ୍ନ ସରକାରୀ କାର୍ଯ୍ୟାଳୟରେ କର୍ମଚାରୀ ମାନେ କୋଭିଡ଼ ନିୟମ ପାଳନ କରିବା ନେଇ ଶପଥ ପାଠ କରିଥିଲେ । ( ହିଞ୍ଜିଳି /ଶୁସାନ୍ତ ପ୍ରଧାନ )
