ଖୋର୍ଦ୍ଧା-ଜଟଣୀ (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ପୂର୍ବ ତଟ ରେଳବାଇ ସ୍ପୋର୍ଟ୍ସ ଆସୋସିଏସନ୍ (ଇକୋର୍ଷା) ଖୋର୍ଦ୍ଧାରୋଡ୍ ଦ୍ୱାରା ଆଇଆଇଟି ଭୁବନେଶ୍ୱରର ସହଯୋଗରେ ୦୧ ଫେବୃଆରୀ ୨୦୨୬ ରେ ଇକୋର୍ଷା କ୍ରିକେଟ୍ ଷ୍ଟାଡିୟମ, ଖୋର୍ଦ୍ଧାରୋଡ୍ ଠାରେ‘ଖୋର୍ଦ୍ଧା ରୋଡ୍ ହାଫ୍ ମାରାଥନ୍ ଭୁବନେଶ୍ୱର ୨.୦’ ସଫଳତାର ସହିତ ଆୟୋଜିତ ହୋଇଥିଲା।
ଏହି କାର୍ଯ୍ୟକ୍ରମରେ ୮ ବର୍ଷ ଓ ତଦୁର୍ଦ୍ଧ୍ୱ ବୟସର ପୁରୁଷ,ମହିଳା ଓ ପିଲାମାନଙ୍କ ସହିତ ବିଭିନ୍ନ ବୟସ, ଶ୍ରେଣୀର ୨,୦୦୦ ରୁ ଅଧିକ ଅଂଶ ଗ୍ରହଣକାରୀ ଭାଗ ନେଇଥିଲେ । ଏହି କାର୍ଯ୍ୟକ୍ରମରେ ଈକୋର୍ଷା ସଭାପତି ଏବଂ ଖୋର୍ଦ୍ଧାରୋଡ୍ ମଣ୍ଡଳର ମଣ୍ଡଳ ରେଳ ପ୍ରବନ୍ଧକ ଶ୍ରୀ ଆଲୋକ ତ୍ରିପାଠୀ ମୁଖ୍ୟ ଅତିଥି ଭାବେ ଉପସ୍ଥିତ ଥିଲେ l ଓ ଆଇଆଇଟି ଭୁବନେଶ୍ୱରର ନିର୍ଦ୍ଦେଶକ ପ୍ରଫେସର ଶ୍ରୀପଦ କର୍ମଲକର ସମ୍ମାନିତ ଅତିଥି ଭାବେ ଯୋଗ ଦେଇଥିଲେ ।
ଏହି ଅବସରରେ ଈକୋର୍ଷା ଉପାଧ୍ୟକ୍ଷ ଏବଂ ଏ ଡି ଆର୍ ଏମ (ଅପରେସନ୍ସ) ଖୋର୍ଦ୍ଧାରୋଡ୍ ଶ୍ରୀ ପି.କେ. ବେହେରା, ଈକୋର୍ଷା ଉପାଧ୍ୟକ୍ଷ ଏବଂ ଏ ଡି ଆର୍ ଏମ (ଇନ୍ଫ୍ରାଷ୍ଟ୍ରକ୍ଚର) ଖୋର୍ଦ୍ଧାରୋଡ୍ ଶ୍ରୀ ଶୁଭ୍ର ଜ୍ୟୋତି ମଣ୍ଡଳ, ଆଇଆଇଟି ଭୁବନେଶ୍ୱରର ଛାତ୍ର ବ୍ୟାପାର ଡିନ୍ ପ୍ରଫେସର ରାଜେଶ ରୋଶନ ଦାଶ ଏବଂ କାନାରା ବ୍ୟାଙ୍କର ମହାପ୍ରବନ୍ଧକ ଶ୍ରୀଯୁକ୍ତ ସୁମନ ଚକ୍ରବର୍ତ୍ତୀ ଉପସ୍ଥିତ ଥିଲେ ।
ଏହି କାର୍ଯ୍ୟକ୍ରମ ଈକୋର୍ଷା ର କ୍ରୀଡା ଅଧିକାରୀ ଏବଂ ଖୋର୍ଦ୍ଧା ରୋଡ୍ ମଣ୍ଡଳର ବରିଷ୍ଠ ବିଭାଗୀୟ ବାଣିଜ୍ୟିକ-ସହ-କ୍ରୀଡା ଅଧିକାରୀ ଶ୍ରୀଯୁକ୍ତ ଅନିଲ କୁମାର ଏସ୍.ଙ୍କ ଦକ୍ଷ ମାର୍ଗଦର୍ଶନରେ ଆୟୋଜିତ ହୋଇଥିଲା । ମହମ୍ମଦ ଜାକିରୁଦ୍ଦିନ, କ୍ରୀଡା ସଚିବ ଓ ଶ୍ରୀ ଜେ. ଏସ୍.ପାତ୍ର, ସହାୟକ କ୍ରୀଡା ସଚିବଙ୍କ ସକ୍ରିୟ ସମନ୍ୱୟ ସହ ଇକୋର୍ଷା, ଖୋର୍ଦ୍ଧାରୋଡ୍ ସଦସ୍ୟମାନଙ୍କ ଅବଦାନ କାର୍ଯ୍ୟକ୍ରମକୁ ସଫଳ କରିଥିଲା ।
କାର୍ଯ୍ୟକ୍ରମର ସୁଗମ ପରିଚାଳନା ପାଇଁ ଖୋର୍ଦ୍ଧା ରୋଡ୍ ସ୍କାଉଟ୍ସ ଏବଂ ଗାଇଡ୍ସ ଙ୍କ ସ୍ୱେଚ୍ଛାସେବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା । ସୁସ୍ଥ ଓ ସକ୍ରିୟ ଜୀବନ ଶୈଳୀକୁ ପ୍ରୋତ୍ସାହିତ କରିବା ଏହି ମାରାଥନ୍ ର ମୂଳ ଉଦ୍ଦେଶ୍ୟ ଥିଲା । ଅଂଶ ଗ୍ରହଣ କାରୀମାନଙ୍କୁ ଟି-ସାର୍ଟ, ପଦକ, ପାନୀୟ ଜଳ ଏବଂ ଜଳପାନ ପ୍ରଦାନ କରାଯାଇଥିଲା । ସମଗ୍ର କାର୍ଯ୍ୟକ୍ରମ ସମୟରେ ଚିକିତ୍ସା ସୁବିଧା, ପ୍ରାଥମିକ ଚିକିତ୍ସା ଏବଂ ଯାତାୟାତ ପରିଚାଳନା ସୁନିଶ୍ଚିତ କରାଯାଇଥିଲା ।
ଦୌଡ଼ ପଥରେ ରେଳବାଇ ଷ୍ଟାଡିୟମ– ଆଇଆଇଟି ଭୁବନେଶ୍ୱର (୨୧.୧ କିମି ଓ ୧୦ କିମି),ବ୍ଲକ ଛକ (୫କିମି) ଏବଂ ପୋଷ୍ଟ ଅଫିସ୍ ଛକ (୨ କିମି) ଅନ୍ତର୍ଭୁକ୍ତ ଥିଲା ଏବଂ ସମସ୍ତ ଦୌଡ଼ ରେଳବାଇ ଷ୍ଟାଡିୟମରେ ସମାପ୍ତ ହୋଇଥିଲା । ୨୧କିମି ଏବଂ ୧୦କିମି ଦୌଡ଼ରେ ପୁରୁଷ ଓ ମହିଳା ବର୍ଗର ପ୍ରଥମ,ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରିଥିବା ବିଜେତା ମାନଙ୍କୁ ପୁରସ୍କୃତ କରାଯାଇଥିଲା ।
ଏହି ଅବସରରେ ଶ୍ରୀ ଆଲୋକ ତ୍ରିପାଠୀ ସମସ୍ତ ବିଜେତା ଓ ଅଂଶ ଗ୍ରହଣକାରୀ ମାନଙ୍କୁ ଅଭିନନ୍ଦନ ଜଣାଇ ଏପରି କାର୍ଯ୍ୟକ୍ରମ ଦ୍ୱାରା କର୍ମଚାରୀ ଏବଂ ସାଧାରଣ ଲୋକମାନଙ୍କ ମଧ୍ୟରେ ଫିଟନେସ୍ ସଚେତନତା ବୃଦ୍ଧି ପାଇବ ବୋଲି ଆଶା ପ୍ରକାଶ କରିଥିଲେ। କାର୍ଯ୍ୟକ୍ରମକୁ ଏକ ବିଶାଳ ସଫଳତା ଦେବା ପାଇଁ ଆୟୋଜକ ମାନେ ସମସ୍ତ ଅଂଶ ଗ୍ରହଣକାରୀ, ଅଧିକାରୀ, ସ୍ୱେଚ୍ଛାସେବକ ଏବଂ ସହଯୋଗୀ ସଂସ୍ଥାମାନଙ୍କୁ ହୃଦୟରୁ କୃତଜ୍ଞତା ଜଣାଇଥିଲେ ।
