ବାଙ୍କୀ (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ବାଙ୍କୀ ମାଟିରେ ଜନ୍ମିତ ରାଜ୍ୟର ବିଶିଷ୍ଟ ଅର୍ଥନୀତିଜ୍ଞ ଡ.ଦେବେନ୍ଦ୍ର ଚନ୍ଦ୍ର ମିଶ୍ରଙ୍କ ୧୦୫ତମ ଜନ୍ମ ଜୟନ୍ତୀ ସାମାଜିକ ଅନୁଷ୍ଠାନ ଅସ୍ତିତ୍ୱ ପକ୍ଷରୁ ବାଙ୍କୀରେ ପାଳିତ ହୋଇଯାଇଛି । ଅନୁଷ୍ଠାନର ସଂପାଦକ ସାମାଜିକ କର୍ମୀ, ପ୍ରକୃତିବନ୍ଧୁ ତଥା ସାମ୍ବାଦିକ ଗୌତମ ମିଶ୍ର ଉଦ୍ଘାଟନ କରି କହିଥିଲେ ଡକ୍ଟର ମିଶ୍ର ଭାରତରେ ଉଚ୍ଚଶିକ୍ଷା ଶେଷ କରି ଆମେରିକାର ପ୍ରଖ୍ୟାତ ବିଶ୍ୱବିଦ୍ୟାଳୟ ହାୱାର୍ଡ ବିଶ୍ୱବିଦ୍ୟାଳୟରେ ଅର୍ଥନୀତିରେ ଡକ୍ଟରରେଟ୍ କରିଥିଲେ ।
ଏହି ବିଶ୍ୱବିଦ୍ୟାଳୟରେ ଜନ୍.ଏଫ୍.କେନେଡି ଡକ୍ଟର ମିଶ୍ରଙ୍କ ସହପାଠୀ ଥିଲେ । ଜନ୍.ଏଫ୍.କେନେଡି ଆମେରିକାର ରାଷ୍ଟ୍ରପତି ହେବା ପରେ ଡ.ମିଶ୍ରଙ୍କୁ ଆମେରିକା ଅର୍ଥନୀତିର ଉନ୍ନତି ପାଇଁ ଏକ ଉଚ୍ଚପଦବୀରେ ଯୋଗଦେବା ପାଇଁ ଅନୁରୋଧ କରିଥିଲେ । କିନ୍ତୁ ଡ.ମିଶ୍ର କେନେଡିଙ୍କ ଅନୁରୋଧକୁ ଅଗ୍ରାହ୍ୟ କରି କହିଥିଲେ ମୁଁ ମୋ ଅର୍ଥନୀତି ଜ୍ଞାନ ମୋ ରାଜ୍ୟ ଏବଂ ଦେଶ ପାଇଁ ବିନିଯୋଗ କରିବି । ଡକ୍ଟର ମିଶ୍ର ରେଭେନ୍ସାରେ ଅର୍ଥନୀତି ବିଭାଗରେ ପ୍ରଫେସର ଓ ପରବର୍ତ୍ତୀ ସମୟରେ ସମ୍ବଲପୁର ବିଶ୍ୱବିଦ୍ୟାଳୟରେ କୁଳପତି ଆସନ ଅଳଙ୍କୃତ କରିଥିଲେ ।
ସାଧାରଣଲୋକଙ୍କର କିପରି ଅର୍ଥନୀତିର ଉନ୍ନତିକରଣ ହୋଇପାରିବ ସେ ସଂପର୍କରେ ଡକ୍ଟର ମିଶ୍ର ବହୁ ଆଲେଖ୍ୟ ଲେଖିଥିଲେ । ଏହି କାର୍ଯ୍ୟକ୍ରମରେ ବାଙ୍କୀ ପୂଜ୍ୟପୂଜା ସାରଥୀ ତଥା ବାଙ୍କୀ ସ୍ୱୟଂଶାସିତ ମହାବିଦ୍ୟାଳୟର ପୂର୍ବତନ ଉପାଧ୍ୟକ୍ଷ ମନୋଜ କୁମାର ମହାପାତ୍ର ଯୋଗଦେଇ ଡକ୍ଟର ମିଶ୍ରଙ୍କୁ ନିଜ ଶ୍ରଦ୍ଧାସୁମନ ଜ୍ଞାପନ କରିଥିଲେ । ଏହି କାର୍ଯ୍ୟକ୍ରମରେ ରାଜ୍ୟ ସରକାରଙ୍କ ସ୍ୱୀକୃତି ପ୍ରାପ୍ତ ସମାଜସେବୀ ଅମୀତ୍ କୁମାର ସାହୁ , ଉଲ୍ଲାସ କୁମାର ବେହେରା, ଦେବୀପ୍ରସାଦ ପଣ୍ଡାଙ୍କ ସମେତ ବହୁବ୍ୟକ୍ତି ଯୋଗଦେଇଥିଲେ ।
