ରଣପୁର (ଓଡ଼ିଶା ତାଜା ନ୍ୟୁଜ୍) ନି. ପ୍ର :- ରଣପୁର ମହୋତ୍ସବର ତୃତୀୟ ସନ୍ଧ୍ୟା ସାଂସ୍କୃତିକ ରଙ୍ଗ, ଐତିହାସିକ ସ୍ମୃତି ଓ ସଙ୍ଗୀତର ମାୟାରେ ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିଥିଲା । ଏହି ସନ୍ଧ୍ୟାର ମୁଖ୍ୟ ଆକର୍ଷଣ ରୂପେ ଐତିହାସିକ ରଣପୁରଗଡ଼ ଫଟୋ ପ୍ରଦର୍ଶନୀ ଦର୍ଶକଙ୍କ ଭାରି ପ୍ରଶଂସା ଅର୍ଜନ କରିଥିଲା । ରଣପୁରର ଗୌରବମୟ ଇତିହାସକୁ ଚିତ୍ରରେ ଦେଖି ଦର୍ଶକମାନେ ଅତୀତ ସ୍ମୃତିରେ ଡୁବିଯାଇଥିଲେ।
ମହୋତ୍ସବର ତୃତୀୟ ସନ୍ଧ୍ୟା ଶହୀଦ ଦିବାକର ପରିଡାଙ୍କ ଉଦ୍ଦେଶ୍ୟରେ ଉତ୍ସର୍ଗୀକୃତ କରାଯାଇଛି l ଅପରାହ୍ନରେ ଆୟୋଜିତ ମୁକ୍ତମଞ୍ଚ କୁଇଜ କାର୍ଯ୍ୟକ୍ରମ ବୁଦ୍ଧିମତା ଓ ଉତ୍ସାହର ସୁନ୍ଦର ସମ୍ମିଶ୍ରଣ ରୂପେ ପ୍ରକାଶ ପାଇଥିଲା । କାର୍ଯ୍ୟକ୍ରମକୁ ଆଇନଜୀବୀ ତଥା ସାହିତ୍ୟିକ ଚନ୍ଦ୍ରବିଜୟୀ ମିଶ୍ର ପରିଚାଳନା କରିଥିବା ବେଳେ ଅତିଥି ଭାବେ ଆଇନଜୀବୀ ପ୍ରିୟବ୍ରତ ପ୍ରହରାଜ,
ବରିଷ୍ଠ ଶିକ୍ଷକ ବିରୁପାକ୍ଷ ମହାପାତ୍ର, ଜ୍ୟୋତି ରଞ୍ଜନ ଦାଶ, ଚିତ୍ତରଞ୍ଜନ ଦାଶ ଓ ସୁଶୀଲ କୁମାର ରଣା ଉପସ୍ଥିତ ରହି ବିଜୟୀ ଛାତ୍ରଛାତ୍ରୀମାନଙ୍କୁ ମେଡାଲ ପ୍ରଦାନ କରି ପୁରସ୍କୃତ କରିଥିଲେ । ସନ୍ଧ୍ୟାରେ ଆୟୋଜିତ ଭବ୍ୟ ସଭାରେ ଉଚ୍ଚ ଶିକ୍ଷା ଓ କ୍ରୀଡା ମନ୍ତ୍ରୀ ସୂର୍ଯ୍ୟବଂଶୀ ସୁରଜ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଶିଳ୍ପ ମନ୍ତ୍ରୀ ସମ୍ପଦ ସ୍ୱାଇଁ ମୁଖ୍ୟ ବକ୍ତା ଭାବେ ଉପସ୍ଥିତ ଥିଲେ ।
ସମ୍ମାନିତ ଅତିଥି ଭାବେ ଚିକିଟି ବିଧାୟକ ମନୋରଞ୍ଜନ ଧ୍ୟାନସାମନ୍ତରାୟ, ନୟାଗଡ ଜିଲ୍ଲା ପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକ, ସମାଜସେବୀ ପ୍ରତ୍ୟୁଷା ରାଜେଶ୍ୱରୀ ସିଂ, ଜିଲ୍ଲା ଉନ୍ନୟନ ଅଧିକାରୀ ଲଗ୍ନଜିତ ରାଉତ, ରଣପୁର ପଞ୍ଚାୟତ ସମିତି ଅଧ୍ୟକ୍ଷା ନିର୍ମଳା ବେହେରା ଓ
ବ୍ଲକ ଉନ୍ନୟନ ଅଧିକାରୀ ମନୋଜ କୁମାର ନାୟକ ପ୍ରମୁଖ ଉପସ୍ଥିତ ରହିଥିଲେ । ଅଧ୍ୟାପକ ସତ୍ୟ ନାରାୟଣ ମହାପାତ୍ର ସଭାକାର୍ଯ୍ୟ ମଞ୍ଚ ସଂଚାଳନ କରିଥିଲେ l ସାଂସ୍କୃତିକ କାର୍ଯ୍ୟକ୍ରମରେ କଳାହାଣ୍ଡିର ପଶ୍ଚିମକିରଣ ସାଂସ୍କୃତିକ ଅନୁଷ୍ଠାନ, ଗଞ୍ଜାମର ଚୈତନ୍ୟ ମୃଦଙ୍ଗ ସଂଘ, ସହିତ ବିଭିନ୍ନ ବିଦ୍ୟାଳୟ ଛାତ୍ରଛାତ୍ରୀଙ୍କ ଲୋକନୃତ୍ୟ ଦର୍ଶକଙ୍କୁ ଆନନ୍ଦିତ କରିଥିଲା l
ବିଶେଷକରି ନରସିଂହପୁର ବିଦ୍ୟାଳୟ ଛାତ୍ରଛାତ୍ରୀଙ୍କ ନୃତ୍ୟ ପରିବେଷଣ ଦର୍ଶକମାନଙ୍କୁ ବେଶ ଆକର୍ଷିତ କରିଥିଲା । ରାତିରେ ପ୍ରସିଦ୍ଧ ଗାୟକ ମଣ୍ଟୁ ଛୁରିଆ ଓ ତାଙ୍କ ଟିମଙ୍କ ମେଲୋଡି କାର୍ଯ୍ୟକ୍ରମ ସମଗ୍ର ପରିବେଶକୁ ସଙ୍ଗୀତମୟ କରି ବିଳମ୍ବିତ ରାତି ପର୍ଯ୍ୟନ୍ତ ଦର୍ଶକମାନଙ୍କୁ ମଞ୍ଚ ସହିତ ବାନ୍ଧି ରଖିଥିଲା l
ଏହି ଅବସରରେ ମହୋତ୍ସବ କମିଟି ତରଫରୁ ଜଣାଇ ଦିଆଯାଇଛି ଯେ, ଚତୁର୍ଥ ଦିବସରେ ପରିବହନ ବିଭାଗର ସହଯୋଗରେ ସଡ଼କ ସୁରକ୍ଷା ସଚେତନତା ଶୋଭାଯାତ୍ରା ପଞ୍ଚୁଦୋଳ ପଡିଆ ଠାରୁ ସ୍କୁଲ ଛକ ପର୍ଯ୍ୟନ୍ତ ଆୟୋଜିତ ହେବ । ଏଥିରେ ସ୍କୁଲ-କଲେଜ ଛାତ୍ରଛାତ୍ରୀ ଓ ଅଞ୍ଚଳବାସୀଙ୍କୁ ଯୋଗଦେବାକୁ ଆହ୍ୱାନ ଜଣାଯାଇଛି l
