୨୭୦୮ଟି ନୂଆ ପଦବୀ ଜରୁରୀ – ସମବାୟ ରେଜିଷ୍ଟ୍ରାର

ଭୁବନେଶ୍ୱର (ଓଡିଶା ତାଜା ନିଉଜ୍) ଭୁବନେଶ୍ୱର 1.1.2020 :- ଭୁବନେଶ୍ୱର ଗ୍ରାମାଞ୍ଚଳରେ ଚାଷୀମାନଙ୍କ ମଧ୍ୟରେ ବୃଦ୍ଧି ପାଉଥିବା ଅସନ୍ତୋଷକୁ ପ୍ରଶମିତ କରି ସମବାୟ ନିର୍ବାଚନରେ ସଫଳ ହେବାକୁ କ୍ଷମତାସୀନ ବିଜେଡି ସରକାର ଏବେ ନୂଆ ବ୍ଲୁ-ପ୍ରିଣ୍ଟ୍ ପ୍ରସ୍ତୁତ କରିଛି । ଗ୍ରାମାଞ୍ଚଳରେ ଚାଷୀଙ୍କ ସମସ୍ୟା ଓ ଅସନ୍ତୋଷକୁ ତ୍ୱରିତ୍ ସମାଧାନ ସହ ରାଜ୍ୟ ସରକାରଙ୍କ ଭାବମୂର୍ତ୍ତି ସୁଧାରିବା ପାଇଁ ୨୭୦୮ଟି ନୂଆ ପଦବୀ ( ମୁଖ୍ୟ କାର୍ଯ୍ୟନିର୍ବାହୀ ଅଫିସର) ସୃଷ୍ଟି କରାଯିବ । ଏଥିପାଇଁ ବାର୍ଷିକ ପ୍ରାୟ ୧୧୫ କୋଟି ଟଙ୍କା ଖର୍ଚ୍ଚ ହେବ । ଯଦି ସବୁକିଛି ଠିକଠାକ୍ ରୁହେ ଓ ରାଜ୍ୟ ସମବାୟ ସୋସାଇଟି ରେଜିଷ୍ଟ୍ରାରଙ୍କ ପ୍ରସ୍ତାବକୁ ମୁଖ୍ୟମନ୍ତ୍ରୀଙ୍କ ଅନୁମୋଦନ ମିଳେ ତା’ହେଲେ ଖୁବଶୀଘ୍ର ପ୍ରାଥମିକ କୃଷି ସମବାୟ ସମିତି, ଲ୍ୟାମ୍ପସ୍ ଓ କୃଷି ସେବା ସମବାୟ ସମିତି (ଏଫଏସସିଏସ୍) ଗୁଡ଼ିକରେ ଜଣେ ଲେଖାଏ ପ୍ରିନ୍ସିପାଲ ଚିଫ ଏକଜ୍ୟୁକିଟିଭ ଅଫିସର (ପିସିଇଓ) ନିଯୁକ୍ତି ପାଇବେ ଓ ସେମାନଙ୍କ ମାଧ୍ୟମରେ ଏସବୁ ସଂସ୍ଥା ଉପରେ ସିଧାସଳଖ ସରକାରଙ୍କ ନିୟନ୍ତ୍ରଣରେ ରହିବ ।