ବୋଲଗଡ (ଓଡ଼ିଶା ତାଜା ନ୍ୟୁଜ୍) :- ବୋଲଗଡ ବ୍ଲକ ପିଚୁକୁଳିସ୍ଥିତ କଲ୍ୟାଣୀ ମଣ୍ଡପରେ ବୋଲଗଡ ଠିକାଦାର ସଂଘର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ଠିକାଦାରମାନଙ୍କ ଦୂରାବସ୍ଥା ଓ ବର୍ତ୍ତମାନର ଟେଣ୍ଡର ପ୍ରଣାଳୀ ସମ୍ପର୍କରେ ଗଭୀର ଆଲୋଚନା କରାଯାଇଥିଲା ।
ବୈଠକରେ ବିଶେଷକରି ୧୪.୯୯ ପ୍ରତିଶତ କମ୍ରେ କାମ କରାଯିବା ପ୍ରଣାଳୀକୁ ସମସ୍ତ ଠିକାଦାର ସର୍ବସମ୍ମତି କ୍ରମେ ବିରୋଧ କରିଥିଲେ । ନିଷ୍ପତି ଅନୁଯାୟୀ, ଆଗାମୀଦିନରେ ୧୪.୯୯% କମ୍ରେ କେହି ମଧ୍ୟ କାମ କରିବେନି। ଯଦି କେହି ଏପରି କରନ୍ତି, ତେବେ ସଂଘ ତରଫରୁ ତୀବ୍ର ବିରୋଧ କରାଯିବ ବୋଲି ଚେତାବନୀ ଦିଆଯାଇଛି ।
ଆବଶ୍ୟକ ପଡିଲେ ସଂଘ ତରଫରୁ ଦୁର୍ନୀତି ନିବାରଣ ବିଭାଗକୁ ଅଭିଯୋଗ କରାଯିବ ବୋଲି ମଧ୍ୟ ନିଷ୍ପତି ହୋଇଛି । ଆଗାମୀଦିନରେ ବିଭିନ୍ନ ବିଭାଗର ଯେଉଁସବୁ ନିର୍ମାଣ କାର୍ଯ୍ୟ ପାଇଁ ଟେଣ୍ଡର ଡାକାଯିବ, ସେଥିରେ କେହି ମଧ୍ୟ ୧୪.୯୯% କମ୍ରେ ଟେଣ୍ଡର ନପକାଇବାକୁ ସଂଘ ସର୍ବସମ୍ମତି କ୍ରମେ ନିଷ୍ପତି ନେଇଛି । ବିଶେଷତଃ ସ୍ପେଶାଲ ଶ୍ରେଣୀଭୂକ୍ତ ଏ, ବି, ସି ଓ ଡି ଠିକାଦାରମାନେ ସରକାରଙ୍କ ନିର୍ଦ୍ଧାରିତ ସିଡ୍ୟୁଲ ରେଟ୍ରେ ଟେଣ୍ଡର ପକାଇବେ ବୋଲି ନିଷ୍ପତି ହୋଇଛି ।
ଏହା ଦ୍ୱାରା ଅଞ୍ଚଳରେ ହେଉଥିବା ନିର୍ମାଣ କାର୍ଯ୍ୟର ଗୁଣବତ୍ତା ରହିବ ବୋଲି ଆଶା ପ୍ରକାଶ କରାଯାଇଛି । ଏହା ସହିତ ମାସକୁ ଥରେ ବୈଠକ କରିବା ଓ ପ୍ରତ୍ୟେକ ବୈଠକରେ କାର୍ଯ୍ୟଗୁଡ଼ିକର ପୁଙ୍ଖାନୁପୁଙ୍ଖ ସମୀକ୍ଷା କରି ପ୍ରସ୍ତାବ ଗୃହୀତ କରାଯିବ ବୋଲି ନିଷ୍ପତି ହୋଇଛି । ବୈଠକରେ ଅକ୍ଷୟ ପ୍ରଧାନ ଅଧ୍ୟକ୍ଷତା କରିଥିବା ବେଳେ କମିଟି ସଦସ୍ୟ ଭାବେ ପ୍ରସନ୍ନ ସାହୁ, ଶିବାଜୀ ମଙ୍ଗରାଜ,
ସୁଶାନ୍ତ କୁମାର ସାହୁ, ଇସାକ ଖାଁ, ଆକବର ଅଲ୍ଲୀ ଖାଁ, ଦିଲ୍ଲୀପ କୁମାର ସାହୁ, ଗୋପାଳ ବେହେରା ଓ ଅବଦୁଲ ଅବିଦ ଖାଁଙ୍କୁ ମନୋନୀତ କରାଯାଇଛି । ଏହି ବୈଠକରେ ଅଭିଜ୍ଞ ଠିକାଦାର ଗୋପାଳ କୃଷ୍ଣ ଫତେସିଂହ, ବିଶ୍ୱରଂଜନ ବିଶ୍ୱାଳ, ବାନାମ୍ବର ଧଳ ଓ ଅଜିତ୍ ପାହାଡ଼ସିଂହ ପ୍ରମୁଖଙ୍କ ସହ ୩୦ରୁ ଅଧିକ ଠିକାଦାର ଯୋଗଦେଇ ସଂଗଠନକୁ ସୁଦୃଢ କରିବା ପାଇଁ ପ୍ରତିଜ୍ଞା କରିଥିଲେ । କାର୍ଯ୍ୟକ୍ରମକୁ ଶୁଭକାନ୍ତ ମହାପାତ୍ର ଓ ସାଗର ବରାଳ ସୁଚାରୁ ଭାବେ ପରିଚାଳନା କରିଥିଲେ ।
