ମୁମ୍ବଇ ଇଣ୍ଡିଆନ୍ସ-ଚେନ୍ନଇ ସୁପର କିଙ୍ଗସ୍ ଉଦ୍ଘାଟନୀ ମ୍ୟାଚ
ଓଡ଼ିଶା ତାଜା ନ୍ୟୁଜ (୧୯ ସେପ୍ଟେମ୍ବର ଶନିବାର) ଭୁବନେଶ୍ୱର :- ଶନିବାରଠାରୁ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ)ରେ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ଶ ସଂସ୍କରଣ ଖେଳାଯିବ । ୟୁଏଇର ୩ଟି ସହର ଦୁବାଇ, ଆବୁଧାବି ଓ ଶାରଜାରେ ଆସନ୍ତା ୫୩ ଦିନରେ ୬୦ଟି ମ୍ୟାଚ୍ ଖେଳାଯିବ । ୮ଟି ଫ୍ରାଞ୍ଚାଇଜି ଏହି ଟୁର୍ଣ୍ଣାମେଣ୍ଟ ଖେଳିବେ । ଆଇପିଏଲ୍ ହେଉଛି ବିଶ୍ୱର ସବୁଠାରୁ ଧନଶାଳୀ ତଥା ଲୋକପ୍ରିୟ ଟ୍ୱେଣ୍ଟି-୨୦ କ୍ରିକେଟ୍ ଲିଗ୍ । ବିଶ୍ୱର ୧୦ରୁ ଅଧିକ ଦେଶର ଖେଳାଳି ଏଥିରେ ଖେଳିବାକୁ ଯାଉଛନ୍ତି । ମରୁଭୂମିରେ ଘୂର୍ଣ୍ଣିଝଡ଼ ପରି ଆସନ୍ତା ୫୩ ଦିନରେ ଚୌକା ଓ ଛକାର ବର୍ଷା ଦେଖିବାକୁ ମିଳିବ । ସାରାବିଶ୍ୱ ମହାମାରୀ କରୋନା କବଳରେ ଥିବା ବେଳେ ବିଦେଶରେ ହେଉ ପଛେ; ଆଇପିଏଲ୍ ପରି ମେଗା ଟୁର୍ଣ୍ଣାମେଣ୍ଟ ଆୟୋଜନ କରିବା ବିସିସିିଆଇ ପାଇଁ ବହୁତ ବଡ଼ ଉପଲବ୍ଧି ।
ଆଇପିଏଲ୍ର ସଫଳ ଆୟୋଜନ ବିଶ୍ୱରେ ଅନ୍ୟ କ୍ରୀଡ଼ା ପ୍ରତିଯୋଗିତା ପାଇଁ ମାର୍ଗଦର୍ଶକ ହେବ ବୋଲି କୁହାଯାଉଛି । ଇଂଲଣ୍ଡ ମାଟିରେ ୩ଟି ଦେଶ ବିପକ୍ଷରେ ଇଂଲଣ୍ଡ ଖେଳିବା ପରେ ବଡ଼ କ୍ରିକେଟ୍ ଟୁର୍ଣ୍ଣାମେଣ୍ଟ ଆୟୋଜନ କରିବାରେ ୟୁଏଇ ୨ୟ ଦେଶ ହେବ । ଶନିବାର ଗତବର୍ଷର ଦୁଇ ଫାଇନାଲିଷ୍ଟ ମୁମ୍ବଇ ଇଣ୍ଡିଆନ୍ସ ଓ ଚେନ୍ନଇ ସୁପର କିଙ୍ଗ୍ସ ମଧ୍ୟରେ ଉଦ୍ଘାଟନୀ ମ୍ୟାଚ୍ ଖେଳାଯିବ । ଆଇପିଏଲ୍ ଇତିହାସରେ ଏଦୁହେଁ ଦୁଇ ସଫଳ ଦଳ । ମୁମ୍ବଇ ସର୍ବାଧିକ ୪ ଥର ଆଇପିଏଲ୍ ଟ୍ରଫି ଜିତିଥିବା ଚେନ୍ନଇ ୩ ଥର ଏହି ସମ୍ମାନଜନକ ଟ୍ରଫି ଜିତିଛି। ଆଇପିଏଲ୍ ଇତିହାସରେ ପ୍ରଥମଥର ପାଇଁ ସଂସ୍କରଣ କେବଳ ଟିଭି ଦର୍ଶକଙ୍କ ପାଇଁ ଉଦ୍ଦିଷ୍ଟ ହେବ। କରୋନା ସଂକ୍ରମଣ ଯୋଗୁଁ ଷ୍ଟାଡିୟମ୍କୁ ଦର୍ଶକଙ୍କୁ ଛଡ଼ାଯିବ ନାହିଁ । କରୋନା ସଂକ୍ରମଣ ହେବା ପରେ ଦର୍ଶକଙ୍କ ପ୍ରଥମ ପସନ୍ଦ ଥିଲା ବଲିଉଡ୍ । ତେବେ ଶନିବାରରୁ ଆଇପିଏଲ୍ ହିଁ ହେବ ଟିଭି ଦର୍ଶକଙ୍କ ପ୍ରଥମ ପସନ୍ଦ । ଏଥର ଉଦ୍ଘାଟନୀ ଉତ୍ସବ ଅନୁଷ୍ଠିତ ହେବନାହିଁ କିମ୍ବା ବିଦେଶୀ ଚିଅରଗାର୍ଲ ଏଥିରେ ନାଚିବେନାହିଁ । ଫଳରେ ଆଇପିଏଲ୍ କିଛି ଚମକ ହରାଇବ ନିଶ୍ଚୟ ।
ହେଲେ କ୍ରିକେଟ୍ ଯାହା ଥିଲା; ତାହା ରହିବ। ବିଦେଶରେ ଆଇପିଏଲ୍ ଆୟୋଜନ ହେବା କିଛି ନୂଆ କଥା ନୁହେଁ । ୨୦୦୯ରେ ସାଧାରଣ ନିର୍ବାଚନ ଯୋଗୁଁ ଦକ୍ଷିଣ ଆଫ୍ରିକାରେ ଆଇପିଏଲ୍ ଅନୁଷ୍ଠିତ ହୋଇଥିଲା । ୨୦୧୪ରେ ସମାନ କାରଣ ଯୋଗୁଁ ଆଇପିଏଲ୍ର ପ୍ରଥମାର୍ଦ୍ଧ ୟୁଏଇରେ ଆୟୋଜନ ହୋଇଥିଲା । ଚଳିତବର୍ଷ କେବଳ ଆଇପିଏଲ୍ର ଆୟୋଜନ ସ୍ଥଳ ବଦଳିନି, ନୂତନ ଟାଇଟଲ ପ୍ରାୟୋଜକ ଭାବେ ଡ୍ରିମ୍୧୧ର ଆବିର୍ଭାବ ଘଟିଛି । ଭାରତ-ଚୀନ୍ ତିକ୍ତତା ଯୋଗୁଁ ଟାଇଟଲ ପ୍ରାୟୋଜକ ଭିଭୋ ଓହରି ଯାଇଥିଲା । ଚଳିତବର୍ଷ ଆଇପିଏଲ୍ ମାର୍ଚ୍ଚ ୨୯ରୁ ଆରମ୍ଭହେବାର ଥିଲା । ତେବେ କରୋନା ସଂକ୍ରମଣ ଯୋଗୁଁ ଏହା ସ୍ଥଗିତ ହେବା ପରେ ୟୁଏଇରେ ଆୟୋଜନ ହେବାକୁ ଯାଉଛି । ତେବେ ଷ୍ଟୋକ୍ସ କେବେ ଦଳରେ ଯୋଗଦେବେ ; ତାହା କହିବା ଅସମ୍ଭବ । (ରିପୋର୍ଟ ରଶ୍ମିତା ମହାପାତ୍ର)
