ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) (ନି.ପ୍ର ) :- ନ୍ୟାଶନାଲ ଷ୍ଟକ ଏକ୍ସଚେଞ୍ଜ (ଏନଏସଇ) ଓ ଜମ୍ମୁକାଶ୍ମୀର ସରକାରଙ୍କ ମଧ୍ୟରେ ଏକ ଚୁକ୍ତି ସ୍ୱାକ୍ଷର କରାଯାଇଛି । ଜମ୍ମୁକାଶ୍ମୀରର ଏମ୍ଏସଏମଇଗୁଡିକ ମଧ୍ୟରେ, ଏନଏସଇ ଏମର୍ଜର ବ୍ୟବହାର କରି ଆଇପିଓ ମେକାନିଜିମ ମାଧ୍ୟମରେ ପାଣ୍ଠି ହାସଲ କରିବା ସମ୍ପର୍କରେ ସଚେତନତା ସୃଷ୍ଟି କରିବା ପାଇଁ ଏହି ଚୁକ୍ତି ସ୍ୱାକ୍ଷର ହୋଇଛି । ଜମ୍ମୁକାଶ୍ମୀର ମୁଖ୍ୟମନ୍ତ୍ରୀ ଓମାର ଅବ୍ଦୁଲ୍ଲାଙ୍କ ଉପସ୍ଥିତିରେ ଜମ୍ମୁର ଶିଳ୍ପ ଓ ବାଣିଜ୍ୟ ବିଭାଗର ନିର୍ଦ୍ଦେଶକ ଶ୍ରୀ ଅରୁଣ ମନହାସ, କାଶ୍ମୀରର ଶିଳ୍ପ ଓ ବାଣିଜ୍ୟ ବିଭାଗର ନିର୍ଦ୍ଦେଶକ ଖାଲିଦ ମାଜିଦ ଏବଂ ଏନଏସଇର ବରିଷ୍ଠ ଉପାଧ୍ୟକ୍ଷ ଶ୍ରୀ କ୍ରିଷ୍ଣନ ଆୟରଙ୍କ ମଧ୍ୟରେ ଜମ୍ମୁରେ ଏହି ବୁଝାମଣାପତ୍ରର ଆଦାନପ୍ରଦାନ ହୋଇଥିଲା ।
ଏମଓୟୁ ପରେ ଜମ୍ମୁକାଶ୍ମୀର ସରକାରଙ୍କ ସହଯୋଗରେ ଏନଏସଇ ପକ୍ଷରୁ ଏନଏସଇ ଏମର୍ଜ ପ୍ଲାଟଫର୍ମ ମାଧ୍ୟମରେ ପାଣ୍ଠି ସଂଗ୍ରହ କରିବା ଉପରେ ରାଜ୍ୟର କର୍ପୋରେଟଗୁଡିକୁ ମାର୍ଗଦର୍ଶନ ପ୍ରଦାନ କରିବା ପାଇଁ ସେମିନାର, ଏମଏସଏମଇ କ୍ୟାମ୍ପ, ନଲେଜ ସେଶନ, ରୋଡଶୋ’ ଓ ୱର୍କସପ ଦ୍ୱାରା ସଚେତନତା ଅଭିଯାନଗୁଡିକୁ ପରିଚାଳନା କରାଯିବ । ଏସମ୍ପକରେ ଶିଳ୍ପ ଓ ବାଣିଜ୍ୟ ବିଭାଗର ସଚିବ ଶ୍ରୀ ବିକ୍ରମଜିତ ସିଂହ କହିଛନ୍ତି, “ଜମ୍ମୁକାଶ୍ମୀର ମୁଖ୍ୟମନ୍ତ୍ରୀ ଓମାର ଅବ୍ଦୁଲ୍ଲାଙ୍କ ନେତୃତ୍ୱାଧୀନରେ ଆମେ ଆମର କେନ୍ଦ୍ରଶାସିତ ଅଂଚଳର ଏମଏସଏମଇଗୁଡିକ ପାଇଁ ଏକ ସମାବେଶୀ ଇକୋସିଷ୍ଟମ ପ୍ରଦାନ କରିବାକୁ ପ୍ରୟାସ କରୁଛୁ ଯାହା ସେମାନଙ୍କର ବ୍ୟବସାୟ ବୃଦ୍ଧି କରିବ ଏବଂ ଆକର୍ଷଣୀୟ ବ୍ୟବସାୟ ମଡେଲ ସୃଷ୍ଟି କରିବ ।
ଏହି ଅଭିବୃଦ୍ଧି କାହାଣୀକୁ ଆଗକୁ ବଢାଇବା ପାଇଁ ଏକ ପଦକ୍ଷେପ ଭାବେ ଆମେ ଜମ୍ମୁକାଶ୍ମୀରର ଏମ୍ଏସଏମଇଗୁଡିକୁ ଏନଏସଇ ଏମର୍ଜ ପ୍ଲାଟଫର୍ମ ମାଧ୍ୟମରେ ପୁଞ୍ଜି ବଜାରର ଉପଯୋଗ କରିବା ଓ ଆଇପିଓ ମାଧ୍ୟମରେ ଫଣ୍ଡ ହାସଲ କରିବା ପାଇଁ ପ୍ରୋତ୍ସାହିତ କରିବା ଲାଗି ନ୍ୟାଶନାଲ ଷ୍ଟକ ଏକ୍ସଚେଞ୍ଜ ସହ ଏକ ଏମ୍ଓୟୁ ସ୍ୱାକ୍ଷର କରିଛୁ । ଏନଏସଇ ଏମର୍ଜ ହେଉଛି ଏକ ପ୍ଲାଟଫର୍ମ ଯାହା ବିକଶିତ ଏସଏମଇଗୁଡିକ ପାଇଁ ନିବେଶ ବୃଦ୍ଧି ସୁଯୋଗର ଏକ ବିକଳ୍ପ ଉତ୍ସ ପ୍ରଦାନ କରୁଛି । ଏମଓୟୁର ଅଂଶ ଭାବେ ଜମ୍ମୁକାଶ୍ମୀର ସରକାର ଓ ଏନଏସଇ ମିଳିତ ଭାବେ ଏମ୍ଏସଏମଇଗୁଡିକରେ ସଚେତନତା ଅଧିବେଶନ ଓ କ୍ୟାମ୍ପେନର ପରିଚାଳନା କରିବେ ।
” ସେହିପରି ଏନଏସଇର ମୁଖ୍ୟ ବାଣିଜ୍ୟ ବିକାଶ ଅଧିକାରୀ ଶ୍ରୀରାମ କ୍ରିଷ୍ଣନ କହିଛନ୍ତି, “ଏନଏସଇ ଏମର୍ଜ ପ୍ଲାଟଫର୍ମ ମାଧ୍ୟମରେ ଏମଏସଏମଇଗୁଡିକର ଅଭିବୃଦ୍ଧିକୁ ସମର୍ଥନ କରିବା ଓ ସହଭାଗିତା କରିବା ପାଇଁ ଜମ୍ମୁକାଶ୍ମୀର ଓ ଏନଏସଇ ଏକ ଏମ୍ଓୟୁରେ ପ୍ରବେଶ କରିଛନ୍ତି । ଏନଏସଇ ଏମର୍ଜ, ଏସଏମଇଗୁଡିକୁ ଏକ ଦକ୍ଷ ଶୈଳୀରେ ପୁଞ୍ଜି ହାସଲ କରିବା ଏବଂ ଷ୍ଟକ ଏକ୍ସଚେଞ୍ଜରେ ତାଲିକାଭୁକ୍ତ ହୋଇ ସେମାନଙ୍କର ଦୃଶ୍ୟମାନତା ବୃଦ୍ଧି କରିବା ପାଇଁ ସକ୍ଷମ କରିଥାଏ । ଆମେ ଜମ୍ମୁକାଶ୍ମୀର ସରକାରଙ୍କ ସହଯୋଗରେ ସ୍ଥାନୀୟ ଏମଏସଏମଇଗୁଡିକ ପାଇଁ ସଚେତନତା ଅଧିବେଶନର ପରିଚାଳନା କରିବୁ । ଆମେ ଏହି କେନ୍ଦ୍ରଶାସିତ ଅଂଚଳର ଏମଏସଏମଇଗୁଡିକୁ ଆଗକୁ ଆସିବା ଓ ଏନଏସଇ ଏମର୍ଜ ମାଧ୍ୟମରେ ନିଜର ନୂତନ ଆର୍ଥିକ ଉତ୍ସର ଲାଭ ଉଠାଇବାକୁ ଆବେଦନ କରୁଛୁ ।”
