ବେଲପଡ଼ା (ଓଡ଼ିଶା ତାଜା ନ୍ୟୁଜ୍) ନି.ପ୍ର :- ବଲାଙ୍ଗୀର କଣ୍ଟାବାଞ୍ଜି ରେ ବେଆଇନ ଦାଦନ ଚାଲାଣ କୁ ରୋକିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ସ୍ୱତନ୍ତ୍ର ଟିମ ଗଠନ କରାଯାଇଛି।ଦାଦନ ଋତୁ ରେ ହଜାର ହଜାର ସଂଖ୍ୟାରେ ଶ୍ରମିକ ମାନେ ପେଟ ପୋଷିବା ପାଇଁ ଦାଦନ ଖଟି ଅନ୍ୟ ସ୍ଥାନ ଓ ଅନ୍ୟ ରାଜ୍ୟ କୁ ଯାଆନ୍ତି । ହେଲେ ବେଆଇନ ଦାଦନ ଚାଲାଣ ହେଉଥିବା ବିଶେଷ ସୂତ୍ରରୁ ଖବର ପାଇ କଣ୍ଟାବାଞ୍ଜି ପୋଲିସର ସ୍ୱତନ୍ତ୍ର ଟିମର ଅଧିକାରୀ ପଞ୍ଚାନନ୍ଦ ନେଗୀ ସହ ଗୋଟିଏ ଟିମ୍ ୮ ଜଣ ଦାଦନ ଶ୍ରମିକ ସହ ୫ ଛୋଟ ଛୁଆଙ୍କୁ ଉଦ୍ଧାର କରିଛି ।
ତେବେ କଣ୍ଟାବାଞ୍ଜି ରେଳଷ୍ଟେସନ୍ ନିକଟରୁ ଏହି ମାନଙ୍କୁ ଉଦ୍ଧାର କରାଯାଇଛି ବୋଲି ଥାନା ଅଧିକାରୀ ଗୋପାଳ ଚନ୍ଦ୍ର କର୍ଣ୍ଣ ସୂଚନା ଦେଇଛନ୍ତି । ଶ୍ରମିକ ମାନେ ସର୍ଦ୍ଦାରଙ୍କ ଠାରୁ ଅଗ୍ରୀମ ଟଙ୍କା ନେଇ ହାଇଦ୍ରାବାଦକୁ ଇଟା ଗଢିବା ପାଇଁ ଯିବା ଯୋଜନା କରିଥିଲେ । ଉଦ୍ଧାର ଦାଦନ ଶ୍ରମିକ ମାନେ ମୁରିବାହାଲ ଥାନା ସରଗୁଲ ଓ ପାଟଣାଗଡ ଥାନା ଖଲିପତର ଅଞ୍ଚଳର ବୋଲି ଜଣାପଡିଛି । ଏହି ଘଟଣାରେ ପୋଲିସ ଗୋଟିଏ ମାମଲା ୪୧୨/୨୦୨୫ ରୁଜୁ କରି ଦାଦନଙ୍କ ସହ ଉପସ୍ଥିତ ସର୍ଦ୍ଦାର ସୁଶୀଲ ବେଣ୍ଟକାରକୁ ଗିରଫ କରି ଅଧିକ ତଦନ୍ତ କରିବା ସହ କୋର୍ଟ ଚାଲାଣ କରିଛି ।
