ବାଲିଗୁଡା (ଓଡ଼ିଶା ତାଜା ନ୍ୟୁଜ୍) ନି.ପ୍ର :- କନ୍ଧମାଳ ଜିଲ୍ଲା ବାଲିଗୁଡା ସ୍ଥିତ ୟୁକୋ ବ୍ୟାଙ୍କ ର ସୁନା ମୂଲ୍ୟାଙ୍କନକାରୀ ଭାବେ ଥିବା ପି.ସତ୍ୟରାମ ଆଚାରୀ ଓରଫ ବଣ୍ଟି ନକଲି ସୁନା ଜମା କରି ୟୁକୋ ବ୍ୟାଙ୍କ ବାଲିଗୁଡ଼ା ଶାଖାରୁ ସ୍ୱର୍ଣ୍ଣ ଋଣ ହାତେଇଥିଲେ। ଏ ଘଟଣା ଜଣାପଡିବା ପରେ ଶ୍ରୀ ଆଚାରୀ ଉକ୍ତ ଦିନ ଠାରୁ ଫେରାର ହୋଇଥିଲେ, କୌଣସି ପ୍ରକାରେ ବାଲିଗୁଡା ପୋଲିସ ଖବର ପାଇ ଅଭିଯୁକ୍ତ ପି. ସତ୍ୟରାମ ଆଚାରୀଙ୍କ ଦ୍ୱାରା ଜାଲିଆତି ଏବଂ ଠକେଇ ସମ୍ପର୍କିତ ଦସ୍ତାବିଜ ଆଧାରରେ ବ୍ରହ୍ମପୁର ପୋଲିସ ସହାୟତାରେ ଶୁକ୍ରବାର ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି ।
ଘଟଣା ରୁ ପ୍ରକାଶ ଯେ, ୨୦୨୫ ମସିହା ମଇ ମାସ ୨୧ ତାରିଖ ରେ କନ୍ଧମାଳ ଜିଲ୍ଲା ବାଲିଗୁଡ଼ା ସ୍ଥିତ ୟୁକୋ ବ୍ୟାଙ୍କର ଶାଖା ପରିଚାଳକ ମାନସ ରଞ୍ଜନ ନାୟକ ଲିଖିତ ଭାବରେ ବାଲିଗୁଡା ଥାନାରେ ଏତଲାରେ ଦର୍ଶାଇଥିଲେ ଯେ, ପି.ସତ୍ୟରାମ ଆଚାରୀ ବାଲିଗୁଡ଼ା ଶାଖା ୟୁକୋ ବ୍ୟାଙ୍କର ସୁନା ମୂଲ୍ୟାଙ୍କନକାରୀ ଭାବରେ କାର୍ଯ୍ୟ କରୁଥିଲେ। ପି. ସତ୍ୟରାମ ଆଚାରୀ ଓରଫ ବଣ୍ଟି ଙ୍କ ବାଲିଗୁଡ଼ା ବଜାରରେ ଗୋଟିଏ ଅଳଙ୍କାର ଦୋକାନ ଅଛି । ପି. ସତ୍ୟରାମ ଆଚାରୀ ଙ୍କ ଅଳଙ୍କାର ଦୋକାନରେ ଜି. ସୀମାଞ୍ଚଳ ରେଡ୍ଡୀ, ମିସ୍ ରୁନୁବାଳା ପ୍ରଧାନ ଏବଂ ମିସ୍ ସୁଦୀପ୍ତ ନାୟକ ନାମକ ତିନି ଜଣ ବ୍ୟକ୍ତି କାମ କରୁଥିଲେ ।
ଅଭିଯୁକ୍ତ ପି. ସତ୍ୟରାମ ଆଚାରୀ ତାଙ୍କ କର୍ମଚାରୀ ଜି. ସୀମାଞ୍ଚଳ ରେଡ୍ଡୀ, ମିସ୍ ରେଣୁବାଳା ପ୍ରଧାନ ଏବଂ ମିସ୍ ସୁଦୀପ୍ତ ନାୟକଙ୍କ ମାଧ୍ୟମରେ ସିକ୍ୟୁରିଟି ଭାବରେ ନକଲି ସୁନା ଜମା କରି ୟୁକୋ ବ୍ୟାଙ୍କ, ବାଲିଗୁଡ଼ା ଶାଖାରୁ ସ୍ୱର୍ଣ୍ଣ ଋଣ ପାଇଥିଲେ। ସେମାନେ ଜି. ସୀମାଞ୍ଚଳ ରେଡ୍ଡୀ, ମିସ୍ ରୁନୁବାଳା ପ୍ରଧାନ ଏବଂ ମିସ୍ ସୁଦୀପ୍ତ ନାୟକଙ୍କ ନାମରେ ୧୪ଟି ସ୍ୱର୍ଣ୍ଣ ଋଣ ମଞ୍ଜୁର କରିଛନ୍ତି ଯାହାର ମୋଟ ପରିମାଣ ୮୫ ଲକ୍ଷ ୮୬ ହଜାର ଟଙ୍କା। ସୁନା ଋଣ ମଞ୍ଜୁର ହେବା ପରେ, ଅଭିଯୁକ୍ତ ପି. ସତ୍ୟରାମ ଆଚାରି ଜି. ସୀମାଞ୍ଚଳ ରେଡ୍ଡୀ, ମିସ୍ ରୁନୁବାଳା ପ୍ରଧାନ ଏବଂ ମିସ୍ ସୁଦୀପ୍ତ ନାୟକଙ୍କଠାରୁ ସମସ୍ତ ଟଙ୍କା ନେଇଯାଇଛନ୍ତି ।
ଅଭିଯୁକ୍ତ ପି. ସତ୍ୟରାମ ଆଚାରି ପ୍ରତାରଣାମୂଳକ ଉପାୟରେ ଋଣ ମଞ୍ଜୁର କରିବା ପାଇଁ ଅପରାଧିକ ଷଡ଼ଯନ୍ତ୍ର କରିଥିବାରୁ ତାଙ୍କୁ ଏହି ମାମଲାରେ ବାଲିଗୁଡ଼ା ଥାନା କେଶ ନଂ.-୧୬୨/ତା, ୨୧.୦୫.୨୦୨୫ ରିଖ ୟୁ/ଏସ୍-୪୨୦/ ୪୦୬/୩୪ ଆଇପିସିକୁ ୟୁ/ଏସ୍-୪୨୦/୪୦୬/୪୬୭/ ୪୬୮/ ୪୭୧/ ୧୨୦ ବି/୩୪ ଆଇପିସିରେ ଗିରଫ କରାଯାଇଛି। ଅନ୍ୟ ବ୍ୟକ୍ତିଙ୍କ ସମ୍ପୃକ୍ତି ଯାଞ୍ଚ କରାଯିବା ସହ ଉପଯୁକ୍ତ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଏସଆଇ ପ୍ରମୋଦ କୁମାର ଜେନାଙ୍କୁ ତଦନ୍ତ ଭାର ଦିଆଯାଇ ଥିବା ବିଷୟ ଏସଡିପିଓ ରାମେନ୍ଦ୍ର ପ୍ରସାଦ ପ୍ରକାଶ କରିଛନ୍ତି l
