. ୩୩ କେଭି ପାଲଲହଡ଼ା – ବାରକୋଟ ପାୱାର କଣ୍ଡକ୍ଟରର ଉଚ୍ଚତାକୁ ୪ ମିଟର ବଢ଼ାଇ ବିଦ୍ୟୁତ ଯୋଗାଣରେ ହେଉଥିବା ନିୟମିତ ବିଭ୍ରାଟରୁ ଆଶ୍ୱସ୍ତି ଦେଇଛି ।
ଓଡ଼ିଶା ତାଜା ନ୍ୟୁଜ (୧୫ ସେପ୍ଟେମ୍ବର ମଙ୍ଗଳବାର) ଭୁବନେଶ୍ୱର :- ବର୍ଷର ମୌସୁମୀ ସମୟରେ ବ୍ରାହ୍ମଣୀ ନଦୀର ଜଳ ସ୍ତର ବୃଦ୍ଧି ପାଇବା କାରଣରୁ ଓଡ଼ିଶାର ପାଲଲହଡ଼ା ଅଂଚଳରେ ଅତିକମ୍ରେ ଦୁଇ ମାସ ପର୍ଯ୍ୟନ୍ତ ବିଦ୍ୟୁତ ଯୋଗାଣ ବନ୍ଦ ରହିଥାଏ, ମାତ୍ର ଚଳିତ ବର୍ଷ ସେଥିରେ ବ୍ୟତିକ୍ରମ ଘଟିଛି । ଟାଟା ପାୱାର ଓ ଓଡ଼ିଶା ସରକାରଙ୍କ ଯୌଥ ଉଦ୍ୟୋଗ ଟିପି ସେଂଟ୍ରାଲ୍ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ (ଟିପିସିଓଡିଏଲ୍) ପକ୍ଷରୁ ବ୍ରାହ୍ମଣୀ ନଦୀ ଉପରେ ଥିବା ୩୩ କେଭି ପାଲଲହଡ଼ା-ବାରକୋଟ ପାୱାର କଣ୍ଡକ୍ଟରର ଉଚ୍ଚତାକୁ ତାହାର ବାସ୍ତବ ସ୍ଥିତିରୁ ଆଉ ୪ ମିଟର ଉପରକୁ ବୃଦ୍ଧି କରାଯିବା ପରେ ଏହି ସମସ୍ୟାର ସମାଧାନ ହୋଇଛି । ଏହି ପଦକ୍ଷେପ ପଛର ମୁଖ୍ୟ ଉଦ୍ଦେଶ୍ୟ ଥିଲା ପାଲଲହଡ଼ା ଗ୍ରାହକଙ୍କୁ ନିରବଚ୍ଛିନ୍ନ ବିଦ୍ୟୁତ ଯୋଗାଣ କରିବା ଏବଂ ସେମାନଙ୍କ ସମସ୍ୟାର ସମାଧାନ ପାଇଁ ନିହାତି ଦରକାର ହେଉଥିବା ଆଶ୍ୱସ୍ତି ପ୍ରଦାନ କରିବା ।
ଏହି ଅଂଚଳର ଗ୍ରାହକଙ୍କୁ ବିଦ୍ୟୁତ ବିତରଣ କରିବା ଲାଗି ପାଲଲହଡ଼ା ସବ୍ଷ୍ଟେସନକୁ ବାରକୋଟ୍ ଗ୍ରିଡ୍ରେ ଥିବା ୩୩ କେଭି ସ୍ତର ବିଦ୍ୟୁତ ଯୋଗାଇଥାଏ । ମୌସୁମୀ ସମୟରେ ନଦୀ ଜଳ ସ୍ତର ୩୩ କେଭି ପାୱାର କଣ୍ଡକ୍ଟର ପର୍ଯ୍ୟନ୍ତ ବୃଦ୍ଧି ପାଇଥାଏ । ବ୍ରାହ୍ମଣୀ ନଦୀ ଜଳ ସହ ପାୱାର କଣ୍ଡକ୍ଟର ସ୍ପର୍ଶ କରିବା ଯୋଗୁଁ ମୌସୁମୀ ସମୟରେ ଜଳ ସ୍ତର କଣ୍ଡକ୍ଟର ଠାରୁ ଏକ ସୁରକ୍ଷିତ ଦୂରତା ପର୍ଯ୍ୟନ୍ତ ହ୍ରାସ ନପାଇବା ପର୍ଯ୍ୟନ୍ତ ଫିଡର୍କୁ ବନ୍ଦ ରଖାଯାଏ । ଏହି ଅବସରରେ ଟିପି ଓଡ଼ିଶା ସେଂଟ୍ରାଲ୍ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ୍ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀଯୁକ୍ତ ଏନ୍ ସେନବାଗମ୍ କହିଛନ୍ତି ଯେ, “କୋଭିଡ୍-୧୯ ମହମାରୀ ପାଇଁ ରାଜ୍ୟରେ ଲକ୍ଡାଉନ୍ ଯୋଗୁଁ ଚାହିଦା ତୁଳନାରେ ଯୋଗାଣ ଅଧିକ ରହିଥିବା ସମୟରେ ପାଲଲହଡ଼ା ଅଂଚଳରେ ବିଦ୍ୟୁତ ବିଭ୍ରାଟର ମାତ୍ରା ଉଲ୍ଲେଖନୀୟ ସ୍ତରରେ ରହିଛି ।
ଏହାର ସମ୍ଭାବ୍ୟ ସମାଧାନ ଲାଗି ଦକ୍ଷ ଶ୍ରମ ଶକ୍ତି ଓ ନିବେଶ ଦରକାର ହେଉଥିବାରୁ ଏହି କାର୍ଯ୍ୟ ଦୀର୍ଘଦିନ ପର୍ଯ୍ୟନ୍ତ ପଡ଼ି ରହିଥିଲା ଏବଂ ସେଥିପାଇଁ ପାଲଲହଡ଼ା ଗ୍ରାହକଙ୍କ ସମେତ ୱେସକୋର କିଛି ଅଂଶର ଗ୍ରାହକ ନିୟମିତ ଭାବେ ଦୀର୍ଘ ସମୟ ପର୍ଯ୍ୟନ୍ତ ବିଦ୍ୟୁତ ଯୋଗାଣରୁ ବଂଚିତ ରହୁଥିଲେ ।’’ ବାରକୋଟ ଗ୍ରିଡର ସ୍ତରକୁ ଏକ ସୁରକ୍ଷିତ ସ୍ତର ପର୍ଯ୍ୟନ୍ତ ବୃଦ୍ଧି କରିବା ପରେ ଆମେ ଏହି ଗ୍ରାହକମାନଙ୍କୁ ଭରସାଯୋଗ୍ୟ ବିଦ୍ୟୁତ ଯୋଗାଣ କରିବାକୁ ଲକ୍ଷ୍ୟ ରଖିଛୁ । ନଦୀର ଉଭୟ ପାଶ୍ୱର୍ରେ ଠିଆ ହୋଇଥିବା ଟାୱାର ଫ୍ରେମ୍ୱର୍କାରେ ସ୍ୱତନ୍ତ୍ର ଇଞ୍ଜିନିୟରିଂ ପରିବର୍ତନ କରିଥିବାରୁ ଆମେ ଗର୍ବିତ ଯାହା ଏହି ସମସ୍ୟାକୁ ସୁଲଭ ମୂଲ୍ୟର ଖର୍ଚ୍ଚରେ ସମାଧାନ କରିପାରିଛି ଏବଂ ବ୍ୟାପକ ବିଦ୍ୟୁତ ବିଭ୍ରାଟ ସମୟରୁ ଗ୍ରାହକମାନଙ୍କୁ ଆଶ୍ୱସ୍ତି ଦେଇଛି ବୋଲି ସେ କହିଛନ୍ତି ।
