ପୁରୀ (ଓଡ଼ିଶା ତାଜା ନ୍ୟୁଜ୍) ନି.ପ୍ର :- ପାଣିପାଗ ବିଭାଗର ପୂର୍ବାନୁମାନ ଅନୁଯାଇ ବାତ୍ଯା ମୋନ୍ଥା ଓଡ଼ିଶାରେ ହେବାର ଆଶଙ୍କା ନଥିଲେ ମଧ୍ଯ ଏହାର ପ୍ରଭାବରେ ପ୍ରବଳ ବର୍ଷାର ଆଶଙ୍କା ରହିଛି । ସମ୍ଭାବ୍ୟ ବାତ୍ୟା ମୋନ୍ଥା ମୁକାବିଲା ପାଇଁ ପୁରୀ ଜିଲ୍ଲା ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି । ବାତ୍ୟା ପ୍ରଭାବ ପୁରୀରେ ନପଡ଼ିବା ସମ୍ଭାବନା ଥିବା ବେଳେ ପ୍ରବଳ ବର୍ଷା ସମ୍ଭାବନା ରହିଛି। ମତ୍ସ୍ୟଜୀବୀ ମାନଙ୍କୁ ସମୁଦ୍ର ଭିତରକୁ ନଯିବା ପାଇଁ ନିର୍ଦ୍ଦେଶ ଦିଆଯାଇଛି ।
ଜିଲ୍ଲାର ସମସ୍ତ ଅଧିକାରୀ ଓ କର୍ମଚାରୀଙ୍କ ଛୁଟି ବାତିଲ କରାଯାଇଛି । ସଦର ମହକୁମା ନଛାଡିବାକୁ ଜିଲ୍ଲାପାଳ ଦିବ୍ଯ ଜ୍ୟୋତି ପରିଡା ନିର୍ଦ୍ଦେଶ ଦେଇଛନ୍ତି । ସତର୍କ ଓ ସଚେତନ ରହିବାକୁ କହିଛନ୍ତି । ବାତ୍ଯାକୁ ମୁକାବିଲା ପାଇଁ ପୁରୀ ଜିଲ୍ଲା ପ୍ରଶାସନ ସମ୍ପୂର୍ଣ ପ୍ରସ୍ତୁତ ରହିଛି । ଆସନ୍ତା ୩୦ ତାରିଖ ପର୍ଯ୍ୟନ୍ତ ସବୁ ସରକାରୀ ଅଧିକାରୀଙ୍କ ଛୁଟି ବାତିଲ କରାଯାଇଛି । ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା ଘନ ଘନ ସମୀକ୍ଷା କରୁଛନ୍ତି। ବାତ୍ୟା ମୁକାବିଲାରେ କୌଣସି ଅଧିକାରୀ କାର୍ଯ୍ୟରେ ଅବହେଳା ନକରିବାକୁ ଜିଲ୍ଲାପାଳ ତାଗିଦ୍ କରିଛନ୍ତି।
ଜିଲ୍ଲାର ସବୁ ତହସିଲରେ ୮୯୨୪ ଟି ପଲିଥିନ ପ୍ୟାକେଟ ରଖାଯାଇଛି। ଜିଲ୍ଲା ଗୋଦାମରେ ୩୧୭୬ ପଲିଥିନ ମହଜୁଦ ଅଛି । ୧୮୭ କୁଇଁଣ୍ଟାଲ ଚୁଡ଼ା, ୧୭୨ କୁଇଁଣ୍ଟାଲ ଗୁଡ, ୧୨୦ କୁଇଁଣ୍ଟାଲ ଅନ୍ୟ ଖାଦ୍ୟ ମହଜୁଦ ରହିଛି । ମୋଟ ୧୭୯ ଟି ଆଶ୍ରୟସ୍ଥଳୀ ବ୍ୟବସ୍ଥା ରହିଛି । କୌଣସି ସମସ୍ୟା ହେଲେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ରହିଥିବା ବେଳେ ସମସ୍ୟା ବିଷୟରେ ୧୦୭୭ / ୦୬୭୫୨- ୨୨୩୨୩୭ ରେ ଯୋଗାଯୋଗ କରିବାକୁ ଲୋକଙ୍କୁ କୁହାଯାଇଛି ।
୨୭ ତାରିଖରୁ ୨୯ ତାରିଖ ପର୍ଯ୍ୟନ୍ତ ବାତ୍ଯା ଆଶଙ୍କା ରହିଥିବାରୁ ବର୍ଷାର ସମ୍ଭାବନା ରହିଛି । ତଳିଆ ଅଞ୍ଚଳରେ ବର୍ଷାଜଳ ଜମିବାର ସମ୍ଭାବନା ରହିଛି । ଏଥିପାଇଁ ଅଗ୍ନିଶମ ବିଭାଗ ପକ୍ଷରୁ ୧୯ଟି ହେଭି ମୋଟର ପମ୍ପ ମହଜୁଦ ରଖାଯାଇଛି । ପବନ ଦ୍ବାରା ଗଛ ଭାଙ୍ଗି ପଡ଼ିବାର ଆଶଙ୍କା ରହିଛି ।
ଗଛ ହଟାଇ ରାସ୍ତା ଅବରୋଧ ହଟାଇବା ପାଇଁ ପାୱାର ସ ରଖାଯାଇଛି । ବଡ ବଡ ଟାୱାର ଭାଙ୍ଗି ପଡିଲେ ଏହାକୁ ହଟାଇବା ପାଇଁ ପ୍ଲାଜମା କଟର ରଖାଯାଇଛି । ବେଳାଭୂମିରେ ଏହି ତିନି ଦିନ ଅଗ୍ନିଶମ ବାହିନୀ ସଜାଗ ରହିବା ସହ ସମୁଦ୍ର ସ୍ନାନ ନକରିବା ପାଇଁ ନାଲି ପତକା ସହ ପାଣି ଭିତରକୁ ନଯିବା ପାଇଁ ଡାକ ବାଜି ଯନ୍ତ୍ର ଦ୍ବାରା ଘୋଷଣା କରାଯାଉଛି ।
