ପୁରୀ (ଓଡ଼ିଶା ତାଜା ନ୍ୟୁଜ୍) ନି.ପ୍ର :- ସୋମବର କାଳୀପୂଜା । ଶ୍ରୀକ୍ଷେତ୍ରରେ ଥିବା ଅଷ୍ଟକାଳୀ ମନ୍ଦିର ସମେତ ଅନ୍ଯ କାଳୀ ମନ୍ଦିରରେ ପୂଜା ପାଇଁ ପ୍ରସ୍ତୁତି ଶେଷ ପର୍ଯ୍ଯାୟରେ । ଗଛମୂଳେ ବିଜେ ମା ଗଛକାଳୀ । କାଳିକାଦେବୀ ସାହି ଓ ଖୁଣ୍ଟିଆ ସାହି ସଂଯୁକ୍ତ ରାସ୍ତାର ପାର୍ଶ୍ବରେ ମା ଗଛକାଳୀଙ୍କ ମନ୍ଦିର । ମା’ଙ୍କ ଆବାହନି ପାଇଁ ପ୍ରସ୍ତୁତି କାର୍ଯ୍ୟ ଯୋରସୋରରେ ଚାଲିଛି । ମହାକାଳୀ ବେଶରେ ଦର୍ଶନ କରିବା ପାଇଁ ଭକ୍ତ ଅପେକ୍ଷାରତ । ଅଷ୍ଟକାଳୀ ମଧ୍ଯରେ ଗଛକାଳୀ ମା ରହିଛନ୍ତି ।
ମାଙ୍କ ମୂର୍ତ୍ତି ନିର୍ମାଣ କରାଯାଇନାହିଁ । ମା ସ୍ବୟଂ ଆବିର୍ଭୂତା । ମା ପୂର୍ବମୁଖା ହୋଇ ବିରାଜମାନ କରିଛନ୍ତି । ଏହି ତିନି କୋଣିଆ ଛକରେ ଆମ୍ବ, କଇଁଆ, ପୋଲାଙ୍ଗ, ଜାମୁ , ଝାଉଁଗଛ, ବରଗଛ ଓ ଓସ୍ତଗଛ ବହୁଳ ମାତ୍ରାରେ ରହିଥିଲା । ସଞ୍ଜ ନଇଁଲେ ଚିଂ ଚିଂ ଶଦ୍ଦ ଶୁଣାଯାଉଥିଲା । ପ୍ରେତ ପିଚାସ ବାସ କରୁଥିବାରୁ ସେହି ରାସ୍ତା ଦେଇ ରାତିରେ କୌଣସି ଲୋକ ଯାଆଆସ କରନ୍ତି ନାହିଁ । ଶହ ଶହ ବଡ ବଡ ଚେମେଣି ସଂଧ୍ଯାରେ ଉଡୁଥିବା କଥା ପୁରୁଖା ଲୋକ କହୁଥିବା ଜନଶ୍ରୁତି ରହିଛି ।
କାଳକ୍ରମେ ଗଛମୂଳରେ ଦୁଇସାହି ଓ ବଦାନ୍ୟ ଭକ୍ତଙ୍କ ସହଯୋଗରେ ମନ୍ଦିର ନିର୍ମାଣ କରାଯାଇଥିଲା । କାଳୀପୂଜା ପାଇଁ ଧୂପଦୀପ ନୈବେଦ୍ୟ ପ୍ରସ୍ତୁତ କରାଯାଉଛି । କାଳୀପୂଜା ଦିନ ସକାଳଧୂପ, ମଙ୍ଗଳଆଳତି, ଅବକାଶ ପରେ ମାଙ୍କୁ ମହାକାଳୀ ବେଶରେ ସଜ୍ଜିତ କରାଯିବ । ମଧ୍ୟାହ୍ନ ଧୂପରେ ମାଙ୍କ ନିକଟରେ ପୋଡା ବଳି ମାଛ ଭୋଗ ଲଗାଯିବ । ମାଙ୍କ ଭୋଗରେ ଘିଅଅନ୍ନ, ଖେଚେଡି,କାନିକା, ଡାଲି, ଶାଗ, ମାଛବେସର ,ସାଧାବେସର ଓ ମାଛ ପୋଡାବଳି ଭୋଗ ଅର୍ପଣ ବିଧି ରହିଛି । ମା’ଙ୍କ ବାମପଟେ ପୁରୁଣା ଗଛକାଳୀ, ଡାହାଣ ପାର୍ଶ୍ବରେ ଶ୍ଯାମାକାଳୀ, ଭୁବନେଶ୍ୱରୀ , ଦୁର୍ଗା, ପାତାଳେଶ୍ବରୀ, ଦଶଭୂଜା କାଳୀ ବିରାଜମାନ କରିଛନ୍ତି ।
ମନ୍ଦିର ବେଢା ଭିତରେ ମା ଭୈରବୀ, ଧୂମାବତୀ, ବଗଳା, ମାତଙ୍ଗୀ, କମଳା, କାଳୀ,ତାରା, ଶୋଡଷୀ ଓ ଛିନ୍ନମସ୍ତା ପୂଜା ପାଉଛନ୍ତି । ମନ୍ଦିର ଭିତରେ କୈଳାଶେଶ୍ବର ମହାଦେବ ପୂଜା ପାଉଛନ୍ତି । ମାଙ୍କୁ ଦୈନନ୍ଦିନ ପୂଜକ ରମେଶ ଚନ୍ଦ୍ର ଦାଶ ପୂଜାର୍ଚ୍ଚନା କରୁଛନ୍ତି । ମାଙ୍କ ମୁଖ୍ଯ ପର୍ବପର୍ବାଣୀ ମଧ୍ଯରେ ଆଶ୍ବିନ ମାସ ସପ୍ତମୀରେ ମହାଲକ୍ଷ୍ମୀ ବେଶ ,ଅଷ୍ଟମୀରେ କାଳୀବେଶ, ନବମୀରେ ସରସ୍ଵତୀ ବେଶ ଓ ଦଶମୀରେ ଦୁର୍ଗାବେଶ ଅନୁଷ୍ଠିତ ହୁଏ । କୁମାର ପୂର୍ଣ୍ଣିମାରେ ଗଜଲକ୍ଷ୍ମୀଙ୍କ ବେଶ ଅନୁଷ୍ଠିତ ହୁଏ । ମଙ୍ଗଳବାର, ଶନିବାର ଓ ସଂକ୍ରାନ୍ତିରେ ଭକ୍ତଙ୍କ ଗହଳି ଲାଗିରହିଥାଏ । ପ୍ରତିଦିନ ମାଙ୍କ ନିକଟରେ ସାହିବାସିନ୍ଦାଙ୍କ ସମେତ ଆଖପାଖ ସାହିର ଭକ୍ତ ମାନେ ମାଙ୍କୁ ଦର୍ଶନ କରି ଆଶିଷ ଲାଭ କରିଥାନ୍ତି ।
