ପୁରୀ (ଓଡ଼ିଶା ତାଜା ନ୍ୟୁଜ୍) ନି.ପ୍ର :- ଅନ୍ତର୍ଜାତୀୟ ବାଲୁକା ଶିଳ୍ପୀ ସୁଦାମ ପ୍ରଧାନ ୟୁନାଇଟେଡ କିଙ୍ଗଡମ ର ଚେଷ୍ଟରଫିଲ୍ଡି ଠାରେ ସ୍ୟାଣ୍ଡ ଆନିମେସନ ଓ ଲାଇଭ ଶୋ କରି ଉଚ୍ଚ ପ୍ରଶଂସିତ ହୋଇଛନ୍ତି । ଏହି ଶୋ ଅକ୍ଟୋବର ୧୧ ରୁ ୧୪ ପର୍ଯ୍ୟନ୍ତ ଏସିଆନ ଅସୋସିଏସନ ଅଫ ଚେଷ୍ଟରଫିଲ୍ଡ ଦ୍ୱାରା ୱାଇନଡିଙ୍ଗ ହ୍ବିଲ ଥିଏଟର ଠାରେ ପ୍ରଦର୍ଶନୀ ଆୟୋଜିତ ହୋଇଥିଲା । ଏଥିରେ ସୁଦାମ ଦି ଷ୍ଟୋରୀ ଅଫ ଦୀପାବଳି ଉପରେ ୧୫ ମିନିଟ ସ୍ଯାଣ୍ଡ ଆନିମେସନ କରିଥିଲେ ।
ବାୟୁ ପ୍ରଦୂଷଣ ଓ ପ୍ଲାଷ୍ଟିକ ମୁକ୍ତ ପରିବେଶ ଜାଗୃତି ବିଷୟରେ ପୁଣି ୧୫ ମିନିଟ ସ୍ଯାଣ୍ଡ ଆନିମେସନ ପ୍ରଦର୍ଶିତ କରିଥିଲେ । ଦୀପାବଳି ସମ୍ପର୍କରେ ସ୍ଯାଣ୍ଡ ଆନିମେସନ କରି ବୁଝାଇଥିଲେ ଦୀପାବଳି ହେଉଛି ଆଲୋକର ପର୍ବ । ଅନ୍ଧାରକୁ ଆଲୋକ ଦୂରିଭୁତ କରିଥାଏ । ଅସତ୍ୟ ଉପରେ ସତ୍ୟର ବିଜୟକୁ ପ୍ରତିନିଧିତ୍ୱ କରେ। ଯେତେବେଳ ଶ୍ରୀରାମ ଶ୍ରୀଲଙ୍କାରେ ରାବଣକୁ ବଧ କରି ଅଯୋଧ୍ୟାକୁ ଫେରିଥିଲେ ସେତେବେଳ ଅଯୋଧ୍ୟାର ଜନତା ଦୀପ ଜଳାଇ ଶ୍ରୀରାମଙ୍କୁ ସ୍ବାଗତ କରିଥିଲେ ।
ଏହାକୁ ହଲରେ ଥିବା ତିନିଶହ ଦର୍ଶକ ଓ ଅତିଥିଙ୍କ ଉପସ୍ଥିତରେ ପଦର୍ଶିତ ହୋଇଥିଲା । ଏଥିରେ ଯୋଗ ଦେଇଥିବା ଅତିଥି ମାନେ ବ୍ଯାରି ଡାଇକ ମେୟର ଚେଷ୍ଟରଫିଲ୍ଡ ବରୋ କାଉନ୍ସିଲ , ମେୟୋରେସ ମାରି ଡ୍ୟୁକ୍, ଚେଷ୍ଟରଫିଲ୍ଡ ସଂସଦ ସଦସ୍ୟ ଟୋବି ପର୍କିନ୍ସ, ଡର୍ବିସାୟର କାଉନ୍ସିଲର ଲୁଇସ ହୁଇଟବ୍ରେଡ୍,ଉତ୍ତର ପୂର୍ବ ଡର୍ବିସାୟର କାଉନ୍ସିଲର ମାର୍ଟିନ ଥାକର୍, ଆଫ୍ରିକାନ କ୍ୟାରିବିୟାନ କମ୍ୟୁନିଟି ଅସୋସିଏସନର ପୂର୍ବତନ କାଉନ୍ସିଲର ଲୁଡ୍ ରାମସେ,ଏସିଆନ ଅସୋସିଏସନ ଚେଷ୍ଟରଫିଲ୍ଡ ଓ ନର୍ଥ ଡର୍ବିସାୟର ଅଧ୍ୟକ୍ଷ ଡା. ପର୍ଥସାରଥୀ ପୋଭାଥି,ଉପାଧ୍ୟକ୍ଷ ସୁଶ୍ରୀ ୱେଲ୍ସ,ସେଣ୍ଟର ମ୍ୟାନେଜର ଆଥିରା ଆଶୀର୍ବାଦ,ଅକାଉଣ୍ଟ ମ୍ୟାନେଜର ଏମା ହର୍ନେଟ୍ ଉପସ୍ଥିତ ଥିଲେ ।
ସୁଦାମ ୧୨ ତାରିଖରେ ଶିଶୁ ମାନଙ୍କ ପାଇଁ ସ୍ୟାଣ୍ଡ ଆର୍ଟ ୱାର୍କସପ୍ କରିଥିଲେ । ୧୩ ତାରିଖରେ ଚେଷ୍ଟରଫିଲ୍ଡ ଚର୍ଚ୍ଚରେ ବାଲୁକା କଳା ନିର୍ମାଣ କରିଥିଲେ । ପରେ ବେଲଫାଷ୍ଟ ରେ ଅନୁଷ୍ଠିତ ନର୍ଦ ରସ ଆଇଲଣ୍ଡ ଅକ୍ଟୋବର ଉତ୍ସବରେ ଯୋଗ ଦେଇଥିଲେ । ବେଲଫାଷ୍ଟ ର ଆଇସିସି ଥିଏଟର ଠାରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।ଏହି କାର୍ଯ୍ୟକ୍ରମକୁ ବେଲଫାଷ୍ଟ ର ସ୍ଥାପକଙ୍କ ଦ୍ବାରା ରିଦିମ ଅଫ ଇଣ୍ଡିଆ ଡ୍ୟାନ୍ସ ଆଣ୍ଡ ଫରଫରମିଙ୍ଗ ଆର୍ଟସ ବିଷୟବସ୍ତୁ ଉପରେ ଅନୁଷ୍ଠିତ ହୋଇଥିଲା ।
ଏହି ସ୍ଯାଣ୍ଡ ଆନିମେସନ ନର୍ଦନ ଆୟରଲ୍ୟାଣ୍ଡ ର ପର୍ଯ୍ୟଟନ ସ୍ଥଳୀ ଓ ଭାରତୀୟ ପର୍ଯ୍ଯଟନ ସ୍ଥଳୀ ସଂସ୍କୃତି ଓ ଐତିହ୍ୟ କୋଣାର୍କ ମନ୍ଦିର ସମ୍ପର୍କରେ ମଞ୍ଚରେ ପ୍ରଦର୍ଶିତ କରିଥିଲେ । ହଲରେ ପାଞ୍ଚ ଶହରୁ ଉର୍ଦ୍ଧ୍ବ ଦର୍ଶକ ଓ ଅତିଥି ଉପଭୋଗ କରିଥିଲେ । ଭାରତୀୟ ସଂସ୍କୃତି ଓ ୟୁକେ ସଂସ୍କୃତି ସମ୍ପର୍କରେ ସ୍ଯାଣ୍ଡ ଆନିମେସନ କରି ସୁଦାମ ବୁଝାଇ ଥିବାରୁ ଦର୍ଶକ ମାନେ ଆନନ୍ଦିତ ହୋଇଥିଲେ । ତାଙ୍କର ଏହି କଳାକୁ ୟୁକେ ଓ ଭାରତରେ ପ୍ରଶଂସା କରାଯାଇଛି ।
