କଟକ (ଓଡ଼ିଶା ତାଜା ନ୍ୟୁଜ୍) ନି.ପ୍ର :- କଟକ ଦୂର୍ଗା ପୂଜା ଭଷାଣୀ ଶୋଭାଯାତ୍ରା ସମୟରେ ଦରଘାବଜାର ଠାରେ ହୋଇଥିବା ଟେକାପଥର ମାଡରେ କଟକ ଡିସିପି ଙ୍କ ସମେତ ୬ ଜଣ ଆହତ ହୋଇଥିଲେ । ଏହାକୁ କେନ୍ଦ୍ରକରି ବିଶ୍ବହିନ୍ଦୁ ପକ୍ଷରୁ ସୋମବାର କଟକ ବନ୍ଦ ଡାକରା ଦିଆଯିବା ସହିତ ରବିବାର ବାଇକ୍ ଶୋଭାଯାତ୍ରା କରିଥିଲେ । ସହରରେ ଶାନ୍ତି ଶୃଙ୍ଖଳା ରକ୍ଷା ପାଇଁ କମିଶନରେଟ ପୋଲିସ ପକ୍ଷରୁ ଦରଘାବଜାର ଏବଂ ଅନ୍ୟ ଅଞ୍ଚଳରେ ଫ୍ଲାଗ ମାର୍ଚ୍ଚ କରିଥିଲା ।
ରବିବାର ଦିନ ବିଶ୍ବହିନ୍ଦୁର ସଦସ୍ୟ ମାନେ ଏକ ବିରାଟ ମଟର ସାଇକେଲ ଶୋଭାଯାତ୍ରାରେ ଗଣ୍ଡଗୋଳ ଘଟିଥିବା ସ୍ଥାନକୁ ଆସିଥିଲେ । ଶୋଭାଯାତ୍ରା କାରିଙ୍କୁ ପୋଲିସ ଅଟକାଇବା ପାଇଁ ଚେଷ୍ଟାକରି ଥିଲା । ପୋଲିସ କୁ ଖାତିରି ନକରି ଶୋଭାଯାତ୍ରା କାରିମାନେ ବ୍ୟାରିକେଡ଼ ଭାଙ୍ଗି ଧସେଇ ବସିଥିଲେ । ଯାହାଫଳରେ ପୋଲିସ ବାଧ୍ୟହୋଇ ଲାଠିଚାଳନା କରିଥିଲା । ପୋଲିସ ଲାଠି ଚାଳନାର ପ୍ରତିବାଦରେ ଶୋଭାଯାତ୍ରା କାରିମାନେ ଦୋକାନ ,
ଗାଡି ମଟର ଭଙ୍ଗା ରୁଜା କରିବା ସହିତ କେତେକ ସ୍ଥାନରେ ନିଆଁ ଲଗାଇ ଦେବା ସହିତ ଟେକାପଥର ପୋଲିସ ଉପରକୁ ଫିଙ୍ଗିଥିଲେ ଯାହାଫଳରେ ଅନେକ ପୋଲିସ କର୍ମଚାରୀ ଏବଂ ଗଣମାଧ୍ୟମର ପ୍ରତିନିଧି ଆହତ ହୋଇଥିଲେ । ସୋମବାର ଦିନ ଯେଭଳି ଅଘଟଣ ନଘଟେ ସେଥିପାଇଁ କମିଶନରେଟ ପୋଲିସ ପକ୍ଷରୁ ୧୩ ଟି ଥାନା ଅଞ୍ଚଳରେ କର୍ଫ୍ୟୁଜାରି କରାଯାଇଛି । କଟକ ଭାଇଚାରା ସହରରେ ଦଙ୍ଗା ସୃଷ୍ଟି କରିବାକୁ ଉଦ୍ୟମ କରୁଥିବା ବ୍ୟକ୍ତିମାନଙ୍କୁ ଦମନ କରିବା ପାଇଁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି ।
ପରିସ୍ଥିତିକୁ ସୁଧାରିବା ପାଇଁ ପୋଲିସ ଡିଜି ୱ।ଇବି ଖୁରାନିଆ , ପୋଲିସ କମିଶନର ଦେବଦତ୍ତ ସିଂ ଙ୍କ ସମେତ ବରିଷ୍ଠ ପୋଲିସ ଅଧିକାରୀ ମାନେ କଟକରେ ଉପସ୍ଥିତ ରହି ପରିସ୍ଥିତି ପ୍ରତି ନଜର ରଖିଛନ୍ତି । ରବିବାର ରାତି ୧୨ ଟା ପରଠାରୁ ୧୩ ଟା ଥାନା ଅଞ୍ଚଳର ସମସ୍ତ ଇଣ୍ଟରନେଟ ସେବାକୁ ବନ୍ଦ କରିଦିଆଯାଇଛି ।
