କନ୍ଧମାଳ (ଓଡ଼ିଶା ତାଜା ନ୍ୟୁଜ୍) :- ଖରିଫ ଧାନ ବିକ୍ରି ପାଇଁ କନ୍ଧମାଳ ଜିଲ୍ଲାରେ ରାଜ୍ୟର ସର୍ବନିମ୍ନ ଚାଷୀ ସେମାନଙ୍କ ନାମ ପଞ୍ଜୀକରଣ କରିଛନ୍ତି। ଓଡ଼ିଶାର ବରଗଡ଼ ଜିଲ୍ଲାରେ ସର୍ବାଧିକ ୧ ଲକ୍ଷ ୫୦ ହଜାର ୨୦୬ ଜଣ ଚାଷୀ ଓ କନ୍ଧମାଳରେ ସର୍ବନିମ୍ନ ୩,୭୯୭ଜଣ ଚାଷୀ ନାମ ପଞ୍ଜୀକରଣ କରିଥିବା ସୂଚନା ମିଳିଛି। ଅନଲାଇନ୍ ପଞ୍ଜୀକରଣ କମିବା ପଛରେ ଜିଲ୍ଲାରେ ଦୁର୍ବଳ ମୋବାଇଲ୍ ନେଟୱର୍କ ହିଁ ମୁଖ୍ୟ କାରଣ ବୋଲି କୁହାଯାଇଛି। ଅନ୍ୟପଟେ ଜିଲ୍ଲା କୃଷି ଓ ସମବାୟ ବିଭାଗର ସୂଚନା ଅନୁସାରେ, କନ୍ଧମାଳରେ ଧାନଚାଷ ଉପଯୋଗୀ ଜମିର ପରିମାଣ ଅତି କମ୍l ଏହା ଏକ ମାଳଭୂମି ଅଞ୍ଚଳ ହୋଇଥିବାରୁ ଏଠାରେ ଧାନଚାଷ କମ୍ ହୋଇଥାଏ ।
ତେବେ ଗତବର୍ଷ ତୁଳନାରେ ଚାଷୀଙ୍କ ପଞ୍ଜୀକରଣ ସଂଖ୍ୟା କିଛି ମାତ୍ରାରେ ବଢ଼ିଛି। ଗତବର୍ଷ ସର୍ବାଧିକ ୨୮୩୪ ଜଣ ଚାଷୀ ପଞ୍ଜୀକରଣ ନାମ ପଞ୍ଜୀକରଣ କରିଥିଲେ | ସମଗ୍ର କନ୍ଧମାଳ ଜିଲ୍ଲାରେ ମୋଟ ୨୩ଟି ସୋସାଇଟି ଜରିଆରେ ଚାଷୀ ନାମ ପଞ୍ଜୀକରଣ କରିଥିଲେ l ସୁତ୍ରା ଲ୍ୟାମ୍ପ୍ସରେ ୪୨୭ ଜଣ ଚାଷୀ ପଞ୍ଜିକୃତ ହୋଇଛନ୍ତି। ସେହିପରି ବାଲିଗୁଡ଼ା ଲ୍ୟାମ୍ପ ରେ ୧୫୧ ଜଣ, ଚକାପାଦରେ ୩୭୧ ଜଣ, ଶଙ୍କରାଖୋଲରେ ୨୭୯ ଜଣ, ବ୍ରାହ୍ମଣୀଗାଁରେ ୭୪ ଜଣ, ଘୁ.ଉଦୟଗିରିରେ ୧୬୧ ଜଣ,
ଲିଙ୍ଗାଗଡ଼ରେ ୯୧ ଜଣ, କ.ନୂଆଗାଁରେ ୯୬ ଜଣ, ଗୁଞ୍ଜିବାଡ଼ିରେ ୬୮ ଜଣ, ସାରଙ୍ଗଡ଼ରେ ୧୨୧ ଜଣ, ଖଜୁରୀପଡ଼ାରେ ୧୩୮ ଜଣ, ଦୁତିପଡ଼ାରେ ୧୧୦ ଜଣ, କୋଟଗଡ଼ରେ ୧୮୧ ଜଣ, ଗୋଛାପଡ଼ାରେ ୯୬ ଜଣ, ଫିରିଙ୍ଗିଆରେ ୧୦୯ ଜଣ, ନୂଆପଦରରେ ୫୦ ଜଣ, ଫୁଲବାଣୀରେ ୧୭୩ ଜଣ, ଇନ୍ଦ୍ରଗଡ଼ରେ ୨୭୫ ଜଣ, ରାଇକିଆରେ ୧୩୩ ଜଣ, ଗଡ଼ଗୁଡ଼ାରେ ୧୨୩ ଜଣ, ଟିକାବାଲିରେ ୨୮୬ ଜଣ, ତୁମୁଡ଼ିବନ୍ଧରେ ୨୧୩ ଜଣ ଓ ଝାବାରାଫା ଲ୍ୟାମ୍ପ୍ସରେ ୯୩ ଜଣ ଚାଷୀ ନାମ ପଞ୍ଜୀକରଣ କରିଥିବା ସୂଚନା ମିଳିଛି ।
