ବୋଲଗଡ଼ (ଓଡ଼ିଶା ତାଜା ନ୍ୟୁଜ୍) :- ବୋଲଗଡ଼ ବ୍ଲକ କଳାଙ୍ଗ ପଞ୍ଚାୟତ ଅନ୍ତର୍ଗତ ଗୋବର୍ଦ୍ଧନପୁର ଉପରସାହିର ମୂରଲୀଧର ବେହେରାଙ୍କ ସାନପୁଅ ଲକ୍ଷ୍ମୀଧର(୩୨) ଅସ୍ବାଭାବିକ ଭାବେ ମୃତ୍ୟୁ ବରଣ କରିଛନ୍ତି। ସେ ସୋମବାର ରାତିରେ ଘରେ ରାତ୍ରୀ ଭୋଜନ ପରେ ଶୋଇଥିଲେ । ତେବେ ମଙ୍ଗଳବାର ସକାଳୁ ତାଙ୍କ ଶରୀର ନିଶ୍ଚଳ ଥିବା ଦେଖି ପରିବାର ଲୋକମାନେ ତାଙ୍କୁ ବୋଲଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ ।
ତେବେ ଦାୟିତ୍ୱରେ ଥିବା ଡ଼ାକ୍ତର ଅବଦୁଲ ମୂଜିବ ତାଙ୍କର ମୃତ୍ୟୁ ହୋଇ ସାରିଥିବା ସୂଚନା ଦେବା ସହ ବୋଲଗଡ଼ ଥାନାକୁ ରିପୋର୍ଟ କରିଥିଲେ।ପରେ ପୋଲିସ ପକ୍ଷରୁ ଏକ ଅପମୃତ୍ୟୁ ମାମଲା ରୁଜୁ କରାଯାଇ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟକୁ ଶବ ବ୍ୟବଚ୍ଛେଦ ପାଇଁ ପଠାଇଥିଲେ । ମାମଲାର ତଦନ୍ତଭାର ଗ୍ରହଣ କରିଥିବା ଏସଆଇ ହାଡିବନ୍ଧୁ ଦାସ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ସୂଚନା ଦେଇଛନ୍ତି ।
ଲକ୍ଷ୍ମୀଧରଙ୍କର ଏକ ଛୋଟ ଶିଶୁକନ୍ୟା ଥିବା ଜଣା ପଡିଛି। ଲକ୍ଷ୍ମୀଧରଙ୍କ ଅକାଳ ବିୟୋଗରେ ସରପଞ୍ଚଙ୍କ ପ୍ରତିନିଧି ରତିକାନ୍ତ ରାଉତରାୟ ,ସମିତିସଭ୍ୟ ରଶ୍ମିରଞ୍ଜନ ସାହୁ,କଳାଙ୍ଗ ଗ୍ରାମ କମିଟି ସଭାପତି ପ୍ରଶାନ୍ତ କୁମାର ହୋତା ଓ ଗ୍ରାମବାସୀମାନେ ଗଭୀର ଶୋକ ପ୍ରକାଶ କରିଛନ୍ତି l
