ପାରଳାଖେମୁଣ୍ଡି (ଓଡ଼ିଶା ତାଜା ନ୍ୟୁଜ୍) :- ଓଡ଼ିଶାର ଗଣ ପର୍ବ ରଜ ଏକ ଅପାର ସାଂସ୍କୃତିକ ଐତିହ୍ୟର ଅଙ୍ଗ ଭାବେ ପରିଚିତ । ଚଳିତ ବର୍ଷ ଗଜପତି ଜିଲ୍ଲାର ସମସ୍ତ ଆଙ୍ଗନୱାଡି କେନ୍ଦ୍ରରେ ଏହା କିଶୋରୀ ବାଳିକା, ଜନପ୍ରତିନିଧି, ସ୍ଵୟଂ ସହାୟକ ଗୋଷ୍ଠୀ ସଦସ୍ୟାଙ୍କ ସହଯୋଗରେ ଧୁମଧାମରେ ପାଳିତ ହୋଇଯାଇଛି । ଏହି ଉତ୍ସବ ଓଡ଼ିଶାର ନାରୀତ୍ୱ ଓ ପୃଥିବୀମାତା ବସୁମତୀଙ୍କ ନବ ଶକ୍ତିକୁ ଉତ୍ସର୍ଗ କରେ। ରଜ ଉତ୍ସବ ପାଳନ ଚଳିତ ବର୍ଷ ଜିଲ୍ଲା ସାମାଜ କଲ୍ୟାଣ ଅଧିକାରୀ ଶ୍ରୀମତୀ ମନୋରମା ଦେବୀଙ୍କ ନିର୍ଦ୍ଦେଶନାରେ ଓ ସମସ୍ତ ସିଡିପିଓ ଙ୍କ ନେତୃତ୍ୱରେ ବିଶେଷ ଭାବେ ଅନୁଷ୍ଠିତ ହେବା ସହ ବ୍ଲକ, ପଞ୍ଚାୟତ ଓ ଅଙ୍ଗନବାଡି କେନ୍ଦ୍ର ଆନୁକୁଲ୍ୟରେ ଏକ ଗଭୀର ପ୍ରଭାବ ସୃଷ୍ଟି କରି ପାରିଛି ।
ଏହି ତିନି ଦିନିଆ ପର୍ବରେ ପୃଥିବୀ ମାତାଙ୍କୁ ବିଶ୍ରାମ ଦିଆଯାଏ, ନାରୀ ଶକ୍ତିର ପ୍ରଶଂସା କରାଯାଏ ଓ ନବ ଚେତନାର ଆରମ୍ଭ କରାଯାଏ। ଏହି ପର୍ବରେ ଝିଅମାନେ ନୂଆ ଶାଡ଼ୀ ପିନ୍ଧି, ଅଳଙ୍କାର ଧାରଣ କରି ସ୍ୱଙ୍ଗୁନ ଚଢ଼ି ରଜ ଦୋଳାରେ ଝୁଲନ୍ତି, ଏବଂ ଅନେକ ପ୍ରତିଯୋଗିତାରେ ଅଂଶଗ୍ରହଣ କରି ସାମାଜିକ ମଞ୍ଚରେ ନିଜ ସ୍ଥାନ ତିଆରି କରନ୍ତି । ଗଜପତି ଜିଲ୍ଲାର ପ୍ରତ୍ୟେକ ଆଙ୍ଗନୱାଡି କେନ୍ଦ୍ରରେ ଏଥର ବିଭିନ୍ନ ପାରମ୍ପରିକ କାର୍ଯକ୍ରମ ସ୍ଥାନପାଇ କେନ୍ଦ୍ରମାନ ଉତ୍ସବ ମୁଖରିତ ହୋଇଥିଲା । ଅଙ୍ଗନୱାଡି ଦିଦି , ସ୍ୱାସ୍ଥ୍ୟ କର୍ମୀ, ଶିକ୍ଷକ, ବ୍ଲକ ଓ ପଞ୍ଚାୟତ ସ୍ତରର ଅଧିକାରୀମାନେ ଏହି କାର୍ଯ୍ୟକ୍ରମରେ ଯୋଗଦାନ କରିଥିଲେ । ଆକାଂକ୍ଷୀ ବ୍ଲକ ଗୁମ୍ମା ଓ ଆର.ଉଦୟଗିରିରେ ଆକାଂକ୍ଷୀ ବ୍ଲକ୍ ଫେଲୋମାନେ ସି ଡ଼ି ପି ଓ ଓ ଆଇ ସି ଡ଼ି ଏସ ଟିମ୍ ସହ ସମନ୍ୱୟ କରି ସମସ୍ଥ କାର୍ଯକ୍ରମଗୁଡ଼ାକୁ ସୂଚାରୁ ରୂପେ ପରିଚାଳନା କରିଥିଲେ ।
ଆକାଂକ୍ଷୀ ଜିଲ୍ଲା କାର୍ଯକ୍ରମ ତରଫରୁ ପିରାମଲ୍ ଫାଉଣ୍ଡେସନ୍ ର ଦେବବ୍ରତ ଆଚାର୍ଯ୍ୟ ଓ ଶ୍ରୀୟାଶ୍ରୀ ରାଣୀ ଏଥିରେ ସହଯୋଗ କରିବା ସହ ବିଭିନ୍ନ କାର୍ଯକ୍ରମରେ ଅଂଶଗ୍ରହଣ କରିଥିଲେ । କେନ୍ଦ୍ରମାନଙ୍କରେ ନାରୀ ମାନଙ୍କ ମାସିକ ଧର୍ମ, ବ୍ୟକ୍ତିଗତ ସ୍ବଚ୍ଛତା, ବିଭିନ୍ନ ଜୀବନ କୌଶଳ, ମୃତ୍ତିକା ପରୀକ୍ଷା ବିଷୟରେ ସୂଚନା ଦିଆଯିବା ପରେ ଚର୍ଚ୍ଚା କରାଯାଇଥିଲା ଓ ଏହାପରେ ଅନେକ ସଂସ୍କୃତିକ ଓ ସାମାଜିକ ପ୍ରତିଯୋଗିତା ମାନ ଯଥା ପୁଚି ଖେଳ, ରଜଗୀତ, ନୃତ୍ୟ, ଚିତ୍ରାଙ୍କନ, ପ୍ରଶ୍ନୋତ୍ତର, ଫ୍ୟାନ୍ସି ଡ୍ରେସ୍, ମୁଜିକାଲ୍ ଚେୟର ପ୍ରତିଯୋଗିତା ମାନ ଆୟୋଜନ କରାଯିବା ସହ , ପୋଡ଼ ପିଠା, ଚକୁଳି, ମଣ୍ଡା ଆଦି ବିଭିନ୍ନ ଘର ତିଆରି ଖାଦ୍ଯ ଆଦିର ପ୍ରଦର୍ଶନ ପ୍ରଦର୍ଶନ ଏବମ୍ ବଣ୍ଟନ ହୋଇଥିଲା ।
ଚଳିତ ବର୍ଷ ର ଆୟୋଜନକୁ ଆଖ୍ୟାନ କରି ଜିଲ୍ଲା ସମାଜ ମଙ୍ଗଳ ଅଧିକାରୀ ଶ୍ରୀମତୀ ମନୋରମା ଦେବୀ କହିଛନ୍ତି, “ରଜ ଉତ୍ସବ ପାଳନ ଆମ ପାଇଁ ଗର୍ବର ବିଷୟ । ଏହା ନାରୀଙ୍କ ପ୍ରତି ସମ୍ମାନ ଓ ସାମାଜିକ ଏକତାର ଅନୁପମ ଉଦାହରଣ । ସମସ୍ତ କେନ୍ଦ୍ରରେ ଏହାକୁ ଅତି ଆଦର ର ସହ ପାଳନ କରାଯାଇଛି ବୋଲି ରାୟଗଡ ସି ଡ଼ି ପି ଓ ବି.କୋମଲାଙ୍ଗି କହିଛନ୍ତି ଗଜପତି ଜିଲ୍ଲା – ସବୁଜ ସୁନ୍ଦର ପାହାଡ଼, ହରିତ ପ୍ରକୃତି ଓ ସଂସ୍କୃତିର ଜିଲ୍ଲା ଏଠି ରଜ ପର୍ବ- କେବଳ ଉତ୍ସବ ନୁହେଁ, ଏହା ହେଉଛି ନାରୀ ଶକ୍ତି, ଧରିତ୍ରୀ ମାତା ଓ ପାରମ୍ପରିକ ମୂଲ୍ୟବୋଧର ଉତ୍ସବ ।
ପିଠା ତିଆରି, ଝୁଲାର ମଜା, ଗୀତ-ନୃତ୍ୟ ଓ ମହିଳାମାନଙ୍କ ସମ୍ମାନର ଏହି ତିନିଦିନିଆ ଉତ୍ସବ ଗଜପତିର ପୁରପଲ୍ଲୀ ସହର- ଉଭୟ ଅଞ୍ଚଳକୁ ରଙ୍ଗୀନ କରେ । ପାରିବାରିକ ଏକତା, ପ୍ରେମ ଓ ନାରୀ ସଶକ୍ତିକରଣର ଏକ ଉତ୍ତମ ଦୃଷ୍ଟାନ୍ତ ହେଉଛି ଏହି ପର୍ବ । ଗଜପତି ଜିଲ୍ଲା ପକ୍ଷରୁ ସମସ୍ତଙ୍କୁ ଅନେକ ଶୁଭେଚ୍ଛା ! ଅନେକ ଅଭିଭାବକ ଓ ଗ୍ରାମବାସୀ ଏହି ଉତ୍ସବକୁ ଦେଖି ଅଭିଭୂତ ହୋଇଥିଲେ । ଝିଅମାନେ ଏଥିରେ ଅଂଶଗ୍ରହଣ କରି ସ୍ୱାଭିମାନ ଓ ଆତ୍ମବିଶ୍ୱାସ ବୃଦ୍ଧି କରିପାରିଥିଲେ।ରଜ ଉତ୍ସବ ମାଧ୍ୟମରେ ନାରୀ ସଶକ୍ତିକରଣର ପ୍ରୟାସ -ଗଜପତି ଜିଲ୍ଲାର ଏହି ଉଦାହରଣ ଓଡ଼ିଶାର ଅନ୍ୟାନ୍ୟ ଜିଲ୍ଲା ପାଇଁ ଏକ ପ୍ରେରଣା ସୂତ୍ର ହେବ ବୋଲି ଆଶା କରାଯାଉଛି ।
