ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) ଭୁବନେଶ୍ୱର :- ‘ଓଡ଼ିଶା ବୁକ୍ଷ୍ଟୋର୍’ ଦ୍ୱାରା ପ୍ରକାଶିତ ଓ ଗାଳ୍ପିକ ବିଜୟାନନ୍ଦ ସିଂହଙ୍କ ରଚିତ ପଞ୍ଚମ ଗଳ୍ପ ସଂକଳନ “ଅଶେଷ ଅନୁରାଗ”କୁ ଆନ୍ଧ୍ର ପ୍ରଦେଶ ଓ ଛତିଶଗଡ଼଼ର ପୂର୍ବତନ ରାଜ୍ୟପାଳ ଶ୍ରୀ ବିଶ୍ୱଭୂଷଣ ହରିଚନ୍ଦନଙ୍କ କରକମଳରେ ଆଜି ସଂଧ୍ୟାରେ, ନୀଳକଣ୍ଠନଗର, ଭୁବନେଶ୍ୱର ଠାରେ ଉନ୍ମୋଚନ କରାଯାଇଅଛି । ଉକ୍ତ ଉତ୍ସବରେ ଶ୍ରୀ ହରିଚନ୍ଦନ ଆଜିର ଗଳ୍ପଗୁଡ଼ିକୁ ସମାଜନିଷ୍ଠ ଅନୁଭବର ପ୍ରତିଲିପି ବୋଲି ଅଭିହିତ କରିଥିଲେ । ଅଶେଷ ଅନୁରାଗରେ ସ୍ଥାନିତ ଗଳ୍ପଗୁଡ଼ିକ ସମ୍ବେଦନଶୀଳ ଦୃଷ୍ଟି ଭଙ୍ଗିରେ ରଚିତ ହୋଇଥିବାରୁ ତାହା ପାଠକକୁ ଗଳ୍ପ ପ୍ରତି ଆକୃଷ୍ଟ କରିବ ବୋଲି ଶ୍ରୀ ହରିଚନ୍ଦନ ଆଶା ପ୍ରକାଶ କରିଥିଲେ ।
ବିଶିଷ୍ଟ ଅତିଥି ଭାବରେ ଶ୍ରୀମତୀ ସୁପ୍ରଭା ହରିଚନ୍ଦନ ଉକ୍ତ ଉତ୍ସବରେ ଉପସ୍ଥିତ ରହି ଲେଖକଙ୍କୁ ଶୁଭେଚ୍ଛା ଜଣାଇ ଥିଲେ ଏବଂ ଗଳ୍ପଗ୍ରନ୍ଥ ପାଠକୀୟ ଆଦୃତି ଲାଭ କରି ଉଚ୍ଚ ପ୍ରଶଂସିତ ହେବ ବୋଲି କହିଥିଲେ । ବିଶିଷ୍ଟ ସାହିତ୍ୟିକ ତଥା ଗାଳ୍ପିକ ଗୌରହରି ଦାସ ଉକ୍ତ ଉତ୍ସବରେ ସମ୍ମାନୀତ ଅତିଥି ଭାବେ ଯୋଗଦେଇ କହିଥିଲେ ଯେ, ଡକ୍ଟର ସିଂହଙ୍କ ରଚିତ ପ୍ରବନ୍ଧ, ସମାଲୋଚନା ଓ ଅନ୍ୟାନ୍ୟ ରଚନା ବ୍ୟତିତ ତାଙ୍କର ଗଳ୍ପ ସମ୍ଭାର ସମାଜକୁ ନୂତନ ଦିଗ୍ଦର୍ଶନ ଦେବାକୁ ସମର୍ଥ ।
ସଂପ୍ରତି ସାହିତ୍ୟର ଅନ୍ୟାନ୍ୟ ବିଭାଗ ତୁଳନାରେ ଗଳ୍ପ ପାଠକ ମହଲରେ ଅଧିକ ଆଦରଣୀୟ ହୋଇପାରିଛି । ପ୍ରଫେସର ବିଜୟ କୁମାର ଶତପଥୀ ସଂକଳନରେ ସ୍ଥାନ ପାଇଥିବା ଗଳ୍ପଗୁଡ଼ିକର କଳାତ୍ମକ ସ୍ୱାତନ୍ତ୍ର୍ୟ ରହିଛି ବୋଲି କହିଥିଲେ । ଉତ୍ସବର ପ୍ରାରମ୍ଭରେ ଅଧ୍ୟାପକ କମଳ ମାହୁନ୍ତ ପୁସ୍ତକ ଉନ୍ମୋଚନ ସଂପର୍କରେ ପ୍ରାରମ୍ଭିକ ସୂଚନା ଦେଇଥିଲେ । ଗାଳ୍ପିକ ଡକ୍ଟର ବିଜୟାନନ୍ଦ ସିଂହ ତାଙ୍କର ସ୍ୱକୀୟ ଅନୁଭୂତି ପ୍ରଦାନ କରିଥିଲେ । ପରିଶେଷରେ ପ୍ରକାଶକ ଇଂ. ସାର୍ଥକ ଶଙ୍କର ପାତ୍ର ଧନ୍ୟବାଦ ଅର୍ପଣ କରିଥିଲେ । କବି ସୁଶିର କୁମାର ସ୍ୱାଇଁ ଉକ୍ତ ଉନ୍ମୋଚନ ଆସରକୁ ପରିଚାଳନ କରିଥିଲେ ।
