ପୁରୀ (ଓଡ଼ିଶା ତାଜା ନ୍ୟୁଜ୍) :- ଏସସିଏସ କଲେଜ ସମ୍ମୁଖ ରାସ୍ତା ପାର୍ଶ୍ୱରେ ରହିଛି ଅନେକ ଔଷଧୀୟ ଅର୍ଜୁନ ଗଛ । ଏହି ଗଛର ଛାଲି ବ୍ୟବହାରରେ ଅନେକ ପୁରାତନ ରୋଗ ଭଲ ହୋଇଥାଏ । ଏହି ବିରାଟ ଧ୍ରୁମକାୟ ଗଛ ସହର ମଧ୍ୟରେ ବାଡି ବଗିଚାରେ ନଥିବା ବେଳେ କଲେଜ ଛକରେ ରହିଛି । ଏବେ କିଛିଦିନ ଧରି ଅନେକ ଲୋକ ଗଛର ଛାଲି ଗୁଡିକ ଚାଞ୍ଛି ନେବା ଫଳରେ ଗଛ ମରିଯିବାର ସମ୍ଭାବନା ଦେଖାଦେଲାଣି । ଗଛ ଗୁଡିକ ଛାଇ ପ୍ରଦାନ କରିବା ସହ ପରିବା ପସରା ଓ ଠେଲା ଗାଡି ବ୍ୟବସାୟୀମାନେ ଛାଇ ତଳେ ବସି ବ୍ୟବସାୟ କରୁଛନ୍ତି ।
ପୁରୀ ପୌରସଂସ୍ଥା ପକ୍ଷରୁ ଏହି ଗଛମୂଳ ସୁରକ୍ଷା କରି ସରୁଲୁହା ଜାଲି ଦ୍ୱାରା ଆବଦ୍ଧ କରିବା ପାଇଁ ବୃକ୍ଷପ୍ରେମୀ ବୁଦ୍ଧିଜୀବୀମାନେ ମତ ଦେଇଛନ୍ତି । ଏହି ଔଷଧୀୟ ବୃକ୍ଷରେ ମାର୍ଚ୍ଚରୁ ଜୁନ ମଧ୍ୟରେ ଫୁଲ ଫୁଟୁଥିବା ବେଳେ ସେପ୍ଟେମ୍ବର ରୁ ନଭେମ୍ବର ମଧ୍ୟରେ ଫଳ ଧରିଥାଏ । ଏହାର ଫୁଲ, ଫଳ, ପତ୍ର, ଛେଲି ଓ ଚେର ବହୁ ରୋଗ ଉପଶମ କରିଥାଏ । ଏହାର ଇଂରାଜୀ ନାମ ଟର୍ମିନାଲିଆ ଅର୍ଜୁନ । ଏହାର ଛେଲି ଗରମ ପାଣିରେ ସିଝାଇ ଛାଣିବା ସହ ନଖ ଉଷୁମ ଥାଇ ପିଇଲେ ହୃଦରୋଗ, ରକ୍ତଜମାଟ, ମୋଟାପଣ, କଫ, ପିତ, ପ୍ରମେହ ରକ୍ତପିତ, ରକ୍ତ ଦୋଷ ଓ ମୁହଁରୁ ବ୍ରଣ ଭଲ ହୋଇଥାଏ ।
ଏହାର ଛେଲିକୁ ଚୂର୍ଣ୍ଣ କରି ସେବନ କଲେ ବହୁମୂତ୍ର ରୋଗ ଭଲ ହୋଇଥାଏ । ଏହାର ଫୁଲ, ପତ୍ର ବାଟି ଦେହରେ ଲଗାଇଲେ ଚମ ଉକୁଣୀ ନାଶ ହୋଇଥାଏ । ଛେଲି ପାଣି ସହ ଗାଇ ଦୁଧ ମିଶାଇ ସେବନ କଲେ ପୁରାତନ ହୃଦରୋଗ ଭଲ ହୋଇଥାଏ । ହାର୍ଟ ଓ ଲିଭର ସମସ୍ୟା ଦୂର କରେ । କୋଲେଷ୍ଟ୍ରଲ ଓ ଉଚ୍ଚ ରକ୍ତଚାପ ପାଇଁ ଏହା ରାମବାଣ ପରି କାମ ଦିଏ । ରାଜଯକ୍ଷ୍ମା (ଟିବି) ରୋଗରୁ ଉପଶମ ମିଳିଥାଏ । ଛେଲି ଗୁଣ୍ଡ ସହ ମେହେନ୍ଦି ମିଶାଇ ମୁଣ୍ଡ କେଶରେ ଲଗାଇଲେ ଧଳାବାଳ କଳା ହୋଇଥାଏ ।.
ଏହାର ପାଣି ହାର୍ଟ ବିଟକୁ ନର୍ମାଲ କରେ । ପୋଡା ଘାରେ ଛାଲି ଗୁଣ୍ଡ ଲଗାଇଲେ ଘା ଶିଘ୍ର ଶୁଖି ଯାଇଥାଏ । ପ୍ରସୂତି ପରେ ମହିଳାଙ୍କ ପେଟରେ ମାଂସପେଶୀର ଢିଲା ପଣକୁ ଏହାର ଛାଲି ପେଷ୍ଟ ଲଗାଇଲେ ଚର୍ମ ଟାଇଟ ହୋଇଥାଏ । ଲିଭର ପାଇଁ ଏହି ପାଣି ଅମୃତ ପରି କାମ ଦିଏ । ପୌରସଂସ୍ଥା ଏହି ଗଛର ସୁରକ୍ଷା ନକଲେ ସହର ମଧ୍ୟରେ ଥିବା ଏହି ବହୁ ମୂଲ୍ୟ ଔଷଧୀୟ ଗଛ ଲୋପ ପାଇବାର ସମ୍ଭାବନା ଦେଖାଦେବା ସହ କଲେଜ ଛକ ରୁ ବୃକ୍ଷ ଛାଇ ଲୋପ ପାଇଯିବ ବୋଲି ସହରବାସୀ ମତ ଦେଇଛନ୍ତି ।
