ପୁରୀ (ଓଡ଼ିଶା ତାଜା ନ୍ୟୁଜ୍) :- ଅଗ୍ରଣୀ ବୌଦ୍ଧିକ ଅନୁଷ୍ଠାନ ବୋଧିଚକ୍ର ଆନୁକୁଲ୍ୟରେ ଭଗବାନ ବୁଦ୍ଧଙ୍କ ୨୫୮୯ତମ ଜୟନ୍ତୀ ଭକ୍ତିମୟ ପରିବେଶରେ ସମ୍ପନ୍ନ ହୋଇଯାଇଛି । ପ୍ରଭାତରେ ସ୍ଥାନୀୟ ଗାନ୍ଧୀ ସ୍ମୃତି ପୀଠ ପରିସରରେ ଅବସ୍ଥିତ ବୋଧିଦ୍ରୁମ ଓ ବୁଦ୍ଧଙ୍କ ପ୍ରତିମୂର୍ତ୍ତିଙ୍କ ଦୀପ ଧୂପ ନୈବେଦ୍ୟ ସହ ପୂଜାର୍ଚ୍ଚନା କରାଯାଇଥିଲା । ପୂର୍ବାହ୍ନ ୮ ଘଟିକା ସମୟରେ ବଳିଆପଣ୍ଡା ସ୍ଥିତ ଭାରତ ଯୋଗ କେନ୍ଦ୍ରରେ ‘ଯୁଦ୍ଧ ନୁହେଁ ବୁଦ୍ଧ’ ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହେଇଥିଲା ।
ଏଥିରେ ଅନୁଷ୍ଠାନର ସଭାପତି ଇଂ ଗିରିଜା ଶଙ୍କର ପାଢ଼ୀ ଅଧ୍ୟକ୍ଷତା କରିଥିଲେ । ସଭାପତି କହିଲେ ଯେ ମାନବଜାତି ଯେତେବେଳେ ଜ୍ଞାନ- କର୍ମ-ଭକ୍ତି ର ଶାନ୍ତିପ୍ରଦ ମାର୍ଗରୁ ବିଚୁତ୍ୟ ହେଇଥିଲା ସେତେବେଳେ ପରମ କାରୁଣିକ ବୁଦ୍ଧ ଆବିର୍ଭୁତ ହୋଇ ଜଗତରେ ଶାନ୍ତି ଓ ସଦଭାବନା ପ୍ରତିଷ୍ଠା କରିଥିଲେ । ସନ୍ଥ କବି ଭୀମଭୋଇଙ୍କ ଜୟନ୍ତୀ ଅବସରରେ ମହିମାଧର୍ମର ପ୍ରାସଙ୍ଗିକତା ସମ୍ପର୍କରେ ଉପାସକ ଉମେଶ ଚନ୍ଦ୍ର ଦାସ ବକ୍ତବ୍ୟ ଉପସ୍ଥାପନ କରିଥିଲେ ।
ଉପସ୍ଥିତ ବୁଦ୍ଧପ୍ରେମୀ ମାନେ ବିପାସନା ପଦ୍ଧତିରେ ସମୂହ ଧ୍ୟାନ କରିଥିଲେ । ସମ୍ପାଦକ ରମାବଲ୍ଲଭ ମହାପାତ୍ର ସ୍ବାଗତ ଭାଷଣ ଓ ଏକଲବ୍ୟ ଅନୁଷ୍ଠାନର ଛାତ୍ରଛାତ୍ରୀମାନେ ବୁଦ୍ଧବନ୍ଦନା ଓ ତ୍ରିଶରଣ ଗାନ କରିଥିଲେ । ଅନ୍ୟମାନଙ୍କ ମଧ୍ୟରେ ସମାଜସେବୀ ରବିନାରାୟଣ ସାହୁ, ଜ୍ୟୋତିର୍ବିଦ ଅନାମ ଚନ୍ଦ୍ର ସାହୁ, ଜ୍ୟୋତ୍ସ୍ନା ନାୟକ, ସରସ୍ଵତୀ ପାତ୍ର, ଏମ୍ କୋଟେଶ ଚଦ୍ର ପାତ୍ର, ଅଭିଜିତ ମହାପାତ୍ର ପ୍ରମୁଖ ଆଲୋଚନାରେ ଅଂଶ ଗ୍ରହଣ କରିଥିଲେ । ପରିଶେଷରେ ‘ ଶିଶୁ ସମାଚାର ‘ ସମ୍ପାଦକ ସୁକାନ୍ତ କୁମାର ପଣ୍ଡା ଧନ୍ୟବାଦାର୍ପଣ କରିଥିଲେ ।
