ପୁରୀ (ଓଡ଼ିଶା ତାଜା ନ୍ୟୁଜ୍) :- ପଶ୍ଚିମବଙ୍ଗର ପୂର୍ବ ମେଦିନାପୁର ଜିଲ୍ଲାର ଦୀଘାରେ ନିର୍ମିତ ହୋଇଥିବା ଜଗନ୍ନାଥ ମନ୍ଦିରକୁ ମୁଖ୍ୟମନ୍ତ୍ରୀ ମମତା ବାନାର୍ଜୀ ଉଦଘାଟନ କରିବା ପରେ ଅନେକ ବିବାଦ ମୁଣ୍ଡ ଟେକିଛି । ଦୀଘାକୁ ଜଗନ୍ନାଥ ଧାମ ଭାବେ ପ୍ରଚାର କରିବା ,ଜଗନ୍ନାଥଙ୍କ ପଥରମୂର୍ତ୍ତି ବସାଇବା ଓ କାଠମୂର୍ତ୍ତି ବସାଇବା ଯୋଗୁ ପୁରୀରୁ ପଶ୍ଚିମବଙ୍ଗ ପର୍ଯ୍ୟନ୍ତ ଭକ୍ତ ଅସନ୍ତୋଷ ବୃଦ୍ଧି ପାଇଛି । ଦଇତାପତି, କିଛି ପଣ୍ଡିତ ଓ ବ୍ରାହ୍ମଣ ପୁରୀରୁ ଦୀଘା ଯାଇ ମନ୍ଦିର ପ୍ରତିଷ୍ଠାରେ ଅଂଶଗ୍ରହଣ କରିଥିଲେ । ଦଇତାପତି ନିଯୋଗର ସମ୍ପାଦକ ତଥା କତା ନିଗମର ପୂର୍ବତନ ଅଧ୍ୟକ୍ଷ ଓ ବିଜେଡି ନେତା ରାମକୃଷ୍ଣ ଦାସ ମହାପାତ୍ର (ଟିକି ପୁଅ) ଦୀଘାକୁ ଯାଇ ମନ୍ଦିର ପ୍ରତିଷ୍ଠା ଦାରୁଦିଅଁ ପ୍ରତିଷ୍ଠା ଓ ବିବାଦୀୟ ମନ୍ତବ୍ୟ ଯୋଗୁ ଦୁଇ ରାଜ୍ୟରେ ଆଲୋଚନା ଯୋର ଧରିଛି ।
ଦଇତାପତି ବଙ୍ଗଳା ଭାଷାରେ ବଙ୍ଗାଳି ଟିଭି ମାନଙ୍କୁ ଦେଇଥିବା ବୟାନ ଓ ପୁରୀରେ ରାତିରେ ପହଞ୍ଚିବା ପରେ ହଠାତ ସକାଳୁ ପ୍ରେସ ମିଟ୍ କରି ଅଲଗା ବୟାନ ଦେବା ଯୋଗୁ ତାହା ବିବାଦୀୟ ପ୍ରସଙ୍ଗ ହୋଇପଡିଥିଲା । ଶନିବାର ଓ ରବିବାର ଦୁଇ ଦିନ ଧରି ଶ୍ରୀମନ୍ଦିର କାର୍ଯ୍ଯାଳୟ ଠାରେ ମୁଖ୍ଯ ପ୍ରଶାସକ ଡ.ଅରବିନ୍ଦ ପାଢୀଙ୍କ ଅଧ୍ୟକ୍ଷତାରେ ତୁହାକୁ ତୁହା ବୈଠକ,ପ୍ରତି ନିଯୋଗର ସଭାପତି ଓ ସମ୍ପାଦକଙ୍କ ସହ ଘନ ଘନ ବୈଠକ ପରିସ୍ଥିତିକୁ ଗରମା ଗରମ କରିଛି । ବୟାନବାଜିରେ ତାଳମେଳ ରହୁନଥିବାରୁ ଓ ବିଭିନ୍ନ ସାମାଜିକ ଗଣମାଧ୍ୟମରରେ ଦଇତାପତିଙ୍କ କାର୍ଯ୍ଯକୁ ନିନ୍ଦା କରିବା ଯୋଗୁ ପରିସ୍ଥିତି ଭିନ୍ନ ମୋଡ ନେଇଛି ।
ଦଇତାପତି ସମ୍ପାଦକ ରାମକୃଷ୍ଣ ଦାସ ମହାପାତ୍ରଙ୍କୁ ମୁଖ୍ଯ ପ୍ରଶାସକ ଘନ ଘନ ପ୍ରଶ୍ନ ପଚାରି ଘାଇଲା କରିଦେଇଥିବା କୁହାଯାଉଛି । ଦୀଘାରେ ଜଗନ୍ନାଥ ଧାମ ପ୍ରଚାର କରିବାକୁ ନେଇ ଓ ଶ୍ରୀମନ୍ଦିର ଦଇତାପତି ପ୍ରତିଷ୍ଠାରେ ଭାଗ ନେବା, ଶ୍ରୀମନ୍ଦିର ଦାରୁ ଗୃହରୁ ଦାରୁ କିପରି ଗଲା ଏବଂ ନବକଳେବର ତିଥି ନଥାଇ ଅଦିନରେ ଜଗନ୍ନାଥଙ୍କ ବିଗ୍ରହ ପ୍ରତିଷ୍ଠା କିପରି କରାଗଲା ତାକୁ ନେଇ ଶ୍ରୀମନ୍ଦିର ମୁଖ୍ଯ ପ୍ରଶାସକଙ୍କୁ ସଠିକ ସମୟରେ ଆଇନମନ୍ତ୍ରୀ ଚିଠି କରିଛନ୍ତି । ଆଗକୁ ରଥଯାତ୍ରା ଥିବାରୁ ଏହି ଘନ ଘନ ବୈଠକ ଦିନରାତି ଟିଭିରେ ଗର୍ଜନ ,ସାମାଜିକ ଗଣମାଧ୍ୟମରେ ମତାମତ ପରିସ୍ଥିତିକୁ ଆବେଗପୂର୍ଣ୍ଣ କରିଛି ।
ସିଂହଦ୍ବାର ପାଖରେ ଜୈନିକ ବୃଦ୍ଧ ବୁଦ୍ଧିଜୀବୀ କହିଲେ ଘଡ ଘଡି ଚଡଚଡି ବିଜୁଳି ପବନ ଯୋର ହେବ ମାତ୍ର ବୁନ୍ଦେ ପାଣି ମାଟିରେ ପଡିବନି । ସେହି ନ୍ଯାୟରେ ରଥଯାତ୍ରା ଆସୁଥିବାରୁ ସେବକଙ୍କୁ ମନାଇବାକୁ ଯାଇ ପରିସ୍ଥିତି ଫୁସ ହେବ ବୋଲି କହିଥିଲେ । ଜଗନ୍ନାଥ ସଂସ୍କୃତିକୁ ବିପଥଗାମୀ କରାଯାଉଥିବାରୁ ସୂଚନାକର୍ମୀ ଜେ.କେ.ଦାସ ଓ ଶ୍ରୀଜଗନ୍ନାଥ ସେନାର ଆବାହକ ପ୍ରିୟଦର୍ଶନ ପଟ୍ଟନାୟକ ସିଂହଦ୍ବାର ଥାନାରେ ଦୁଇଟି ଏତଲା କରିଛନ୍ତି । ଏହି କାରବାରରେ ପଚାଶ କୋଟି ଟଙ୍କାର ଡିଲ ହୋଇଛି ବୋଲି ଶ୍ରୀଜଗନ୍ନାଥଙ ସେନାର ଆବାହକ ଗଣମାଧ୍ୟମକୁ ପତିକ୍ରିୟା ଦେଇଛନ୍ତି । କିଛିମାସ ତଳେ ଓଡ଼ିଶା ପଶ୍ଚିମବଙ୍ଗ ଭଲ ପଡୁଥିଲା । ନିର୍ବାଚନ ପରେ ଏବେ ଦୁଇରାଜ୍ଯ ମଧ୍ଯରେ କେତେକ ପ୍ରସଙ୍ଗକୁ ନେଇ ଟଣାଓଟରା ଚାଲିଛି ।
ଓଡିଶାକୁ ଆଳୁ ବନ୍ଦ କରିବା ପରେ ଏବେ ପର୍ଯ୍ୟଟକଙ୍କୁ ବନ୍ଦ କରିବା ପାଇଁ ଭିତିରି ଯୋଜନା ଚାଲିଥିବା କୁହାଯାଉଛି । ଅନ୍ଯପକ୍ଷରେ ଗୋଟିଏ ବିଦେଶୀ ଧାର୍ମିକ ଅନୁଷ୍ଠାନ ପୁରୀରେ ଦ୍ବିତୀୟ ଜଗନ୍ନାଥ ମନ୍ଦିର କରିବା ଫେଲ ମାରିଛି । ଶ୍ରୀମନ୍ଦିର ପରିକ୍ରମା ମାର୍ଗରେ ଶ୍ରୀମନ୍ଦିରର ଭିତର ଦୃଶ୍ଯକୁ ପଥର ଖୋଦେଇ ଆକାରରେ କରିବା ପାଇଁ ପ୍ରଭାବିତ କରି ଫେଲ ମାରିବା ପରେ ଏବେ ପଶ୍ଚିମବଙ୍ଗରେ ସଫଳ ହୋଇଛି । ଏ ସମ୍ପର୍କରେ ଶ୍ରୀଜଗନ୍ନାଥଙ୍କ ବାଡଗ୍ରାହୀ ଜଗନ୍ନାଥ ସ୍ବାଇଁ ମହାପାତ୍ର,ସୁଭଦ୍ରାଙ୍କ ବାଡଗ୍ରାହୀ ରାମଚନ୍ଦ୍ର ଦାସ ମହାପାତ୍ର, ବଳଭଦ୍ରଙ୍କ ବାଡଗ୍ରାହୀ ଶ୍ରୀମନ୍ଦିର ପ୍ରଶାସନଙ୍କ ନିକଟରେ ତାଙ୍କ ନିଜସ୍ବ ମତାମତ ଦେଇଛନ୍ତି ।
ନବକଳେବରେ ବଳକା ଥିବା ଦାରୁ କାହା ଦାୟିତ୍ବରେ ଥିଲା, କିଏ ନେଲା ଓ କେମିତି ନେଲା, ଚାବି କହା ପାଖରେ ଥିଲା ସେ ସମ୍ପର୍କରେ ମଧ୍ଯ ଖୋଳତାଡ ଚାଲିଛି । ଶ୍ରୀମନ୍ଦିର କୋଇଲି ବୈକୁଣ୍ଠରେ ଦାରୁଗୃହରେ ଦାରୁ ରଖାଯାଏ । ଦାରୁ ଗୃହର ଦାୟିତ୍ବ ସୁଆର ମହାସୁଆର ନିଯୋଗ ନେଇଥିଲା ଏବେ କିପରି ଦଇତାପତି ନିଯୋଗ ହାତକୁ ଆସିଛି ବୋଲି ଚର୍ଚ୍ଚା ହେଉଛି । ଜଗନ୍ନାଥ ସଂସ୍କୃତି ଓ ପରମ୍ପରାକୁ ନଷ୍ଟ କରିବା ପାଇଁ ଦିଆଯିବନାହିଁ ବୋଲି ଅନେକ ଭକ୍ତ ସାମାଜିକ ଗଣମାଧ୍ୟମରେ ମତାମତ ଦେଇଛନ୍ତି । ଭାରତରେ ଚାରିଧାମ ରହିଛି । ସେଥିମଧ୍ଯରୁ ଜଗନ୍ନାଥ ଧାମ ଅନ୍ଯତମ । ଚାରିଧାମରେ ଚାରି ଶଙ୍କରାଚାର୍ଯ୍ୟ ରହିଛନ୍ତି ଏ ସମ୍ପର୍କରେ ଶ୍ରୀଜଗନ୍ନାଥ ସଂସ୍କୃତି ଗବେଷକ ଡ.ନରେଶ ଚନ୍ଦ୍ର ଦାଶ କହିଛନ୍ତି ସ୍କନ୍ଧ ପୁରାଣ ଓ ବ୍ରହ୍ମ ପୁରାଣରେ ପୁରୁଷୋତ୍ତମ ଧାମ ବା ଜଗନ୍ନାଥ ଧାମ ସଂପର୍କରେ ଶ୍ଲୋକ ରହିଛି ।
ଜଗନ୍ନାଥ ସଂସ୍କୃତିକୁ ହାଇଜାକ କରିବା ପାଇଁ ଏହା ଏକ ନୂଆ ଯୋଜନା ବୋଲି ବୁଦ୍ଧିଜୀବୀମାନେ କହିଛନ୍ତି । ଶ୍ରୀମନ୍ଦିରରେ କେବଳ ଦାରୁବ୍ରହ୍ମରେ ବ୍ରହ୍ମ ସଂସ୍ଥାପନ କରାଯାଏ । ଶ୍ରୀମନ୍ଦିର କାର୍ଯ୍ୟାଳୟରେ ଚାଲିଥିବା ବୈଠକରେ ମୁଖ୍ୟ ପ୍ରଶାସକ ଡ. ଅରବିନ୍ଦପାଢୀ, ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ, ଶ୍ରୀମନ୍ଦିର କମାଣ୍ଡର, ସୁପରଭାଇଜର, ସମସ୍ତ ନିଯୋଗର ସଭାପତି ଓ ସମ୍ପାଦକଙ୍କ ସମେତ ବରିଷ୍ଠ ସେବାୟତ ଯୋଗ ଦେଇଥିଲେ । ଆଜି ସଂଧ୍ଯାରେ ଦଇତାପତି ରାମକୃଷ୍ଣ ଦାସ ମହାପାତ୍ରଙ୍କୁ ଶ୍ରୀମନ୍ଦିର ପ୍ରଶାସନ ପକ୍ଷରୁ କୈଫିୟତ ତଲବ ନୋଟିସ କରାଯାଇଛି ସାତ ଦିନ ଭିତରେ ସନ୍ତୋଷଜନକ ଉତ୍ତର ଦେଇ ନପାରିଲେ ମନ୍ଦିର ଆଇନ ଅନୁଯାଇ କାର୍ଯ୍ଯାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
