ପୁରୀ (ଓଡ଼ିଶା ତାଜା ନ୍ୟୁଜ୍) :- ଚଳିତବର୍ଷର ରଥଯାତ୍ରା ପାଇଁ ପ୍ରଥମ ସମନ୍ବୟ ବୈଠକ ଗୁରୁବାର ପୂର୍ବାହ୍ନରେ ଟାଉନହଲ ଠାରେ ଅନୁଷ୍ଠିତ ହୋଇଯାଇଛି । ବୈଠକରେ ସହର ରାସ୍ତାଘାଟ ଅବସ୍ଥା, ସ୍ବାସ୍ଥ୍ୟ ଅବ୍ଯବସ୍ଥା, ବିଦ୍ୟୁତ ବିଭ୍ରାଟ, ପୌରସଂସ୍ଥାର ପରିମଳ ବ୍ୟବସ୍ଥାକୁ ନେଇ ଗୃହରେ ପ୍ରବଳ ହଟ୍ଟଗୋଳ ଓ ଯୁକ୍ତିତର୍କ ଦେଖିବାକୁ ମିଳିଥିଲା । ଗୃହର ଦୃଶ୍ଯମାନ ଅବସ୍ଥା ଓ ସତ୍ଯ ବକ୍ତବ୍ୟକୁ ନେଇ ଗୃହ ଟ୍ରାକର କିଛି କଥା ଓ ବ୍ୟଥା ……… ମଞ୍ଚରେ ଖାଲି ପଡିଲା ଚେୟାର- ନୂଆ ବିଜେପି ସରକାରର ଏହା ପ୍ରଥମ ରଥଯାତ୍ରା ବୈଠକ । ଏହି ବୈଠକରେ ମଞ୍ଚ ଉପରେ ଅନେକ ଚେୟାର ଖାଲି ପଡିଥିବା ଦେଖିବାକୁ ମିଳିଥିଲା । ଏହା ସହ ହଲରେ ନିମନ୍ତ୍ରିତ ସଭ୍ଯଙ୍କ ସିଟ ଖାଲି ପଡିଥିଲା । ପୂର୍ବବର୍ଷ ବୈଠକରେ ସିଟ ଖାଲି ପଡିବା ଦେଖିବାକୁ ମିଳିନଥିଲା । ସଭା ମଞ୍ଚ ମଧ୍ଯ ପାହାଚ ପରି ଦୁଇ ଥାକ ପଡିଥିଲା । ଏହାକୁ ଦେଖି ସଭ୍ଯ ମାନଙ୍କ ମଧ୍ଯରେ ବେଶ ଆଲୋଚନା ମଧ୍ଯ ହୋଇଥିଲା ।
ଚପଲ ପିନ୍ଧି ବେକରେ ଖଣ୍ଡୁଆ ପକାଇଲେ-ମହାପ୍ରଭୁଙ୍କ ପ୍ରିୟ ଖଣ୍ଡୁଆ ପାଟ। ମହାପ୍ରଭୁଙ୍କ ଲାଗି ଖଣ୍ଡୁଆପାଟ ମହାପ୍ରସାଦ ପରି ଅତି ପବିତ୍ର । ଏହାକୁ ମୁଣ୍ଡରେ ଥୋଇବା ବିଧି ରହିଛି । ବୈଠକ ଆରମ୍ଭରୁ କିଛି ସେବାୟତ ଖାଲି ପାଦରେ ଖଣ୍ଡୁଆ ନେଇ ଅତିଥି ମାନେ ବସିଥିବା ଅବସ୍ଥାରେ ବେକରେ ପକାଇଥିଲେ। ଅତିଥି ମାନେ ଚପଲ ଓ ବୁଟ ପିନ୍ଧି ଚଉକିରେ ବସିଥିଲେ । ଏହାକୁ ଦେଖି ଜଗନ୍ନାଥ ସଂସ୍କୃତିପ୍ରେମୀ ମାନଙ୍କ ମଧ୍ଯରେ ଆଘାତ ଲାଗିଛି । ତଳେ ବୈଠକ ଉପର ସିଲିଂ ଅସୁରକ୍ଷିତ- ରଥଯାତ୍ରା ବୈଠକ ବିଧାନସଭା ପରି ସବୁ ପ୍ରସଙ୍ଗ ଉପରେ ଆଲୋଚନା ହୋଇଥାଏ । ସହରର ବର୍ଷକର ସମସ୍ଯା ସଭ୍ଯ ମାନେ ଏହି ବୈଠକରେ ଉପସ୍ଥାପନ କରନ୍ତି । ଆରଡିସି ଜିଲ୍ଲାପାଳଙ୍କ ସମେତ ଅନେକ ଅଧିକାରୀ ମଞ୍ଚରେ ବସିଥିଲେ ।
ଅନ୍ଯପଟେ ଟାଉନହଲ ଛପରତଳେ ସିଲିଂ ହୋଇଛି । ଏହାର ପୂର୍ବ ଦିଗ ଡାହାଣ ପାର୍ଶ୍ବ ଉପରେ ସିଲିଂ ର ଗୋଟିଏ ଦୁଇରେ ଦୁଇଫୁଟ ସିଲିଂ ଓହଳି ପଡିଥିବା ଦେଖିବାକୁ ମିଳିଥିଲା । ଏହାକୁ ଦେଖି ସଭ୍ଯ ମାନେ ଆଲୋଚନା କରୁଥିଲେ ବଡଦାଣ୍ଡରେ ଅସୁରକ୍ଷିତ କୋଠା ପ୍ରଶାସନ ଚିହ୍ନଟ କରୁଥିବା ବେଳେ ଟାଉନହଲ ଉପରେ ନଜର ନାହିଁ । ଭୋଳାନାଥ ପଲ୍ଲିଶ୍ରୀ ମେଳା ତାଳବଣିଆରେ ହେବ-ରଥଯାତ୍ରା ସମୟରେ ଗୁଣ୍ଡିଚା ମନ୍ଦିର ନିକଟ ଭୋଳାନାଥ ବିଦ୍ୟାପୀଠ ଠାରେ ପଲ୍ଲିଶ୍ରୀ ମେଳା ଦୀର୍ଘ ବର୍ଷ ହେବ ଅନୁଷ୍ଠିତ ହୋଇ ଆସୁଛି । ଚଳିତ ବର୍ଷ ତାଳବଣିଆ ଇଣ୍ଡୋର ଷ୍ଟାଡିୟମରେ ଅନୁଷ୍ଠିତ ହେବା ପାଇଁ ପ୍ରଶାସନ ସ୍ଥିର କରିଥିବା ଖବର ଶୁଣି ସଭ୍ଯ ମାନେ ଅସନ୍ତୋଷ ବ୍ୟକ୍ତ କରିଥିଲେ ।
ହଜାର ହଜାର ଭକ୍ତ ଶ୍ରୀଗୁଣ୍ଡିଚା ମନ୍ଦିରରେ ମହାପ୍ରଭୁଙ୍କ ଆଡପ ଦର୍ଶନ କରିବା ପରେ ଭୋଳାନାଥ ପଲ୍ଲିଶ୍ରୀ ମେଳା ବୁଲିଥାନ୍ତି । ଏହି ମେଳାରେ ପ୍ରାୟ ୧୨ କୋଟି ଟଙ୍କାର ବ୍ଯବସାୟ ହୋଇଥାଏ । ଏହି ମେଳା ତାଳବଣିଆକୁ ଉଠିଗଲେ ଭକ୍ତ ମାନେ ସେଠାକୁ ଯିବା ସମ୍ଭବ ପର ହେବ ନାହିଁ । ଶ୍ରୀମନ୍ଦିର ପରିଚଳନା କମିଟି ନାହିଁ-ଶ୍ରୀମନ୍ଦିର ପ୍ରଶାସନର ଗୁରୁତ୍ୱପୂର୍ଣ୍ଣ କାର୍ଯ୍ୟ ଓ ରଥଯାତ୍ରା ପାଇଁ ଶ୍ରୀମନ୍ଦିର ପ୍ରଶାସନର ପରିଚାଳନା କମିଟି ସମସ୍ତ ନିଷ୍ପତ୍ତି ନେଇଥାନ୍ତି । କମିଟି ଭାଙ୍ଗି ଯିବା ପରେ ଏହି ନିଷ୍ପତ୍ତି କିପରି ନିଆଯାଊଛି ସେ ସମ୍ପର୍କରେ ସେବକ ଦାମୋଦର ମହାସୁଆର ପ୍ରଶ୍ନ କରିଥିଲେ ।
