ପୁରୀ (ଓଡ଼ିଶା ତାଜା ନ୍ୟୁଜ୍) :- ପୁରୀଜିଲ୍ଲା ଅଦାଲତ କୋଠା ତାଳବଣିଆ ବାଲୁଖଣ୍ଡ ଜଙ୍ଗଲକୁ ଉଠିଯିବା ପ୍ରସଙ୍ଗକୁ ନେଇ ପୁରୀଜିଲ୍ଲା ଓକିଲ ସଂଘର ନୂତନ କର୍ମକର୍ତ୍ତା ମାନେ ମୁଖ୍ଯମନ୍ତ୍ରୀ ମୋହନ ଚରଣ ମାଝୀଙ୍କୁ ତାଳବଣିଆ ସଭାସ୍ଥଳରେ ସାକ୍ଷାତ କରି ଆଲୋଚନା କରିଛନ୍ତି । ୧୬୦ ବର୍ଷ ତଳର ଏହି କୋଠାକୁ କାହିଁକି ସ୍ଥାନାନ୍ତର କରାଯିବ, କିଏ ଏହି ଯୋଜନା କରିଥିଲା, କି ଉଦ୍ଦେଶ୍ଯ ନେଇ କରାଯାଇଥିଲା ସେ ସଂପର୍କରେ ମୁଖ୍ଯମନ୍ତ୍ରୀ ପଚାରି ବୁଝିଥିଲେ । ସଂଘ ଏ ସଂପର୍କରେ ଏକ ଦାବିପତ୍ର ପ୍ରଦାନ କରିଛନ୍ତି ।
ଏ ସଂପର୍କରେ ସଂଘର ସଭାପତି ପ୍ରେମାନନ୍ଦ ମହାନ୍ତି ଓ ସମ୍ପାଦକ ଶରତ କୁମାର ରାୟଗୁରୁ କହିଲେ ସେହି ଅଞ୍ଚଳରେ କୋର୍ଟ ସ୍ଥାପିତ ହେଲେ ଓକିଲ ଓ ମହକିଲ ଅଧିକ ଖର୍ଚ୍ଚାନ୍ତ ହେବେ । ସେହି ଅଞ୍ଚଳ ମଧୁରଜଳ ଓ ଜଙ୍ଗଲ ଜମି ବିବାଦରେ ରହିଛି । ଏ ସଂପର୍କରେ ପୁରୀ ଲୋକସଭା ସାଂସଦ ସମ୍ବିତ ପାତ୍ର କହିଲେ ଏହି ଐତିହ୍ଯ ନ୍ଯାୟପାଳିକାକୁ ସ୍ଥାନାନ୍ତର କଲେ ଆଇନଜୀବୀଙ୍କ ସହ ପୁରୀବାସୀଙ୍କ ଅସନ୍ତୋଷ ବୃଦ୍ଧି ପାଇବ ।
ପୁରୀ ବିଧାୟକ ସୁନିଲ ମହାନ୍ତି ଆଇନଜୀବୀ ମାନଙ୍କ ଦାବିକୁ ସମର୍ଥନ କରି ସ୍ଥାନାନ୍ତର କରିବା ଠିକ ନୁହେଁ ବୋଲି କହିଥିଲେ । ଉପମୁଖ୍ଯମନ୍ତ୍ରୀ ପ୍ରଭାତି ପରିଡା କହିଲେ ଏହା ଏକ ସମ୍ବେଦନଶୀଳ ପ୍ରସଙ୍ଗ । ଏସଂପର୍କରେ ନୂଆ ସରକାର ନୂଆ ପଦକ୍ଷେପ ନେବେ । ଏହି ଆଲୋଚନାରେ ସହ ସଂପାଦକ ସମୀର ଘୋଷ, ଅନିଲ କୁମାର ସାହୁ,ସଭ୍ୟ ଜ୍ୟୋତି ପ୍ରକାଶ ମହାନ୍ତି,କର୍ଣ୍ଣଵୀର ମହାପାତ୍ର ମଧ୍ୟ ଉପସ୍ଥିତ ରହିଥିଲେ । ବରିଷ୍ଠ ଓକିଲ ସୋମନାଥ ଦାସ, ବିଶ୍ବଜିତ ସେନାପତି ଓ ଦିଗଦର୍ଶନ ପଟ୍ଟନାୟକ ମଧ୍ୟ ଉପସ୍ଥିତ ରହି ଓକିଲ ମାନଙ୍କର ଦାବିକୁ ସମର୍ଥନ କରିବା ସହ ପୁରୀବାସୀଙ୍କ ଅସୁବିଧା କଥା ମୂଖ୍ୟମନ୍ତ୍ରୀଙ୍କୁ ବୁଝାଇଥିଲେ ।
