ପୁରୀ (ଓଡ଼ିଶା ତାଜା ନ୍ୟୁଜ୍) :- ବିଶ୍ବସ୍ତରୀୟ ସହର ହେବ ପୁରୀ ସହର । ସହର ଚାରିପଟେ ହେବ ରିଙ୍ଗ ରୋଡ । ଅଥଚ ସମୁଦ୍ରକୂଳ ଦିଗବାରେଣି ଠାରୁ ଷ୍ଟ୍ରଲିନ ପର୍ଯ୍ୟନ୍ତ ନିର୍ମିତ ହୋଇଥିବା ରାସ୍ତା ନିମ୍ନମାନର ବୋଲି ଅଭିଯୋଗ ହେଉଛି । କେଉଁଠି ପିଚୁ ଉଠି ଗଲାଣି ତ କେଉଁଠି ଫ୍ଲେବର ଇଟା ଫାଟି ଖାଲ ସୃଷ୍ଟି ହେଲାଣି । ଚଲାପଥରେ ପଡିଥିବା ଗ୍ରାନାଇଟ ପ୍ଲେଟ ଅତି ନିମ୍ନମାନର ହୋଇଥିବାରୁ କେତେକ ଯାଗାରେ ତାହା ଫାଟି ଦୁଇଖଣ୍ଡ ହୋଇ ଗଲାଣି । ଅଳ୍ପ ବର୍ଷା ହେଲେ ସେହି ପ୍ଲେଟ ଚିକଣିଆ ଯୋଗୁ ପର୍ଯ୍ୟଟକଙ୍କ ଗୋଡ ଖସି ଆହତ ହେଉଛନ୍ତି । ପ୍ରାୟ ୭ କୋଟି ଟଙ୍କାର ଟେଣ୍ଡର ହୋଇଥିବା ଏହି ରାସ୍ତାର ଗୁଣବତ୍ତା ଯାଞ୍ଚ ହେଉନଥିବା ଅଭିଯୋଗ ହେଉଛି ।
ପୂର୍ତ୍ତ ବିଭାଗରେ ଥିବା ପୂର୍ବ ଅଧିକାରୀ ଏ ସଂପର୍କରେ ଆଖି ମୁଜି ବିଲେଇ ଖୀର ପିଇବା ନ୍ଯାୟରେ ଏଠାରୁ ଖସି ଯାଇଥିବା ଶୁଣିବାକୁ ମିଳୁଛି । କାମ ସମୟରେ ପୂର୍ତ୍ତ ବିଭାଗର କ୍ବାଲିଟ କଣ୍ଟ୍ରୋଲ ୟୁନିଟ ଏହାର ଗୁଣବତ୍ତା ଯାଞ୍ଚ ନକରି ଠିକାଦାରଙ୍କୁ ବିଲ ପେମେଣ୍ଟ କରି ଦେଇଥିବା ଶୁଣିବାକୁ ମିଳୁଛି । ଲୋକଙ୍କ ଟିକସରେ ନିର୍ମିତ ଏହି ରାସ୍ତାରେ ଦୁର୍ନୀତିର ଦୁର୍ଗନ୍ଧ ରହିଥିବା ଆପର ଜିଲ୍ଲା ସଭାପତି ସଂଜୀବ କୁମାର ମହାନ୍ତି ନିର୍ବାହୀ ଯନ୍ତ୍ରୀଙ୍କୁ ଦାବିପତ୍ର ଦେଇଛନ୍ତି । କାର୍ଯ୍ଯାଳୟରେ ଅଧିକାରୀ ପୁରୀରେ ଚାକିରି କରିଥିଲେ ମଧ୍ଯ ଅଧିକାଂଶ ସମୟ ଭୁବନେଶ୍ଵରରେ ରହୁଥିବା ଅଭିଯୋଗ କରିଛନ୍ତି । ଏହି ସମୁଦ୍ରକୂଳ ରାସ୍ତା ଦୁର୍ନୀତି ସଂପର୍କରେ ଭିଜିଲାନ୍ସ ବିଭାଗ, ପୂର୍ତ୍ତ ବିଭାଗର ସର୍ବୋଚ୍ଚ ଯନ୍ତ୍ରୀ, ପୂର୍ତ୍ତ ମନ୍ତ୍ରୀ, ପୂର୍ତ୍ତ ସଚିବ, ମୁଖ୍ଯ ଶାସନ ସଚିବ ଓ ମୁଖ୍ଯମନ୍ତ୍ରୀ ଦୃଷ୍ଟି ଦେବା ପାଇଁ ଅନୁରୋଧ କରିଛନ୍ତି ।
