ବାଙ୍କୀ (ଓଡ଼ିଶା ତାଜା ନ୍ୟୁଜ୍ ) ବାଙ୍କୀ :- ବାଙ୍କୀ ଉପଖଣ୍ଡରେ ଓଡ଼ିଶାର ବଡ ନଦୀ ମହାନଦୀ ୪୨କି.ମି. ଅତିକ୍ରମ କରି ବାଙ୍କୀ ଅଞ୍ଚଳରେ ବହି ଯାଇଛି । ଏହି ମହାନଦୀରୁ ରଣ ଓ ଚନ୍ଦ୍ରପା ନଦୀ ସୃଷ୍ଟି ହୋଇଛି । ଏହି ରଣନଦୀଟି ନିସ୍ତିପୁର ଓ କୁଶୁପଙ୍ଗି ମଧ୍ୟ ଦେଇ ପ୍ରବାହିତ ହୋଇ ବାଘମାରୀ-ଖୋର୍ଦ୍ଧା ଦେଇ ମାଲାଗୁଣି ନଦୀ ପର୍ଯ୍ୟନ୍ତ ବହିଯାଇଛି । ଅତୀତରେ ରଣନଦୀକୁ ଖନନ କରାଯାଇ ଚିଲିକା ହ୍ରଦରେ ମିଶାଇବା ପାଇଁ ଏକ ଯୋଜନା ପ୍ରସ୍ତୁତ ହୋଇଥିଲା । ଏହାଫଳରେ ବନ୍ୟା ନିୟନ୍ତ୍ରଣ ହେବା ସହ ଆଖପାଖ ଅଞ୍ଚଳରେ ଚାଷ କାର୍ଯ୍ୟ ହେବା ସହ କୃଷକମାନଙ୍କର ଜୀବନଜୀବିକା ଉପରେ ପ୍ରଭାବ ପକାଇବ ବୋଲି ଆଶା କରାଯାଉଥିଲା ।
ଏବେ ରଣନଦୀଟି ବାଲି ଓ ବିଭିନ୍ନ ଦଳ ଯୋଗୁଁ ପୋତି ହୋଇଗଲାଣି । ଏହା ଫଳରେ ରଣନଦୀ ଶୁଖିଲା ପଡିବା ସହିତ ଜଳଧାରଣର କ୍ଷମତା ଆସ୍ତେ ଆସ୍ତେ କମିଯିବାକୁ ବସିଲାଣି । ବର୍ଷସାରା ପାଣି ରହିବାକୁ କୃଷକମାନେ ଦାବୀ କରିଛନ୍ତି । ରଣନଦୀର ଦୁଇ ପାଶ୍ୱର୍ରେ ବହୁ ଚାଷଜମି ରହିଛି ଓ ପୂର୍ବରୁ ଏହି ଚାଷଜମିରେ ଧାନ ଏବଂ ପନିପରିବା ଫସଲ ଉତ୍ପାଦନ ହେଉଥିଲା । ଏବେ ପାଣି ବହୁସ୍ଥାନରେ ଶୁଖିଯିବା ଫଳରେ ଆଉ ଫସଲ ହେଉନାହିଁ ।
ଏହି ପରିପ୍ରେକ୍ଷୀରେ ରଣନଦୀ ମୁହାଣ ଖନନ କରାଗଲେ ବର୍ଷସାରା ପାଣି ରହିପାରିବ ବୋଲି ପରିବେଶବିତ୍ ପ୍ରାଧ୍ୟାପକ ମନୋଜ କୁମାର ମହାପାତ୍ର ପ୍ରକାଶ କରିଛନ୍ତି । ବିଶେଷ କରି ଏବେ ଜଳବାୟୁ ପରିବର୍ତ୍ତନ ହେବା ଯୋଗୁଁ ନଦୀର ଶର୍ଯ୍ୟା ପୋତି ହୋଇ ପଡୁଥିବାର ଦେଖାଯାଇଛି । ବିଶେଷ କରି ପୂର୍ବତନ ପ୍ରଧାନମନ୍ତ୍ରୀଙ୍କ ଅଟଳ ବିହାରୀ ବାଜପେୟୀଙ୍କ ନଦୀ ସଂଯୋଗିକରଣ ପ୍ରସ୍ତାବ ହୋଇପାରିଲେ ରଣନଦୀକୁ ଖନନ କରାଯାଇ ଚିଲିକା ହ୍ରଦ ସହିତ ମିଶାଯାଇ ଏହାର ଜଳକ୍ଷମତା ବୃଦ୍ଧି ପାଇବା ସଂଗେ ସଂଗେ କୃଷି ଓ କୃଷକର ସମସ୍ୟା ସମାଧାନ ପରିବେଶବିତ୍ ପ୍ରାଧ୍ୟାପକ ମହାପାତ୍ର ଉଲ୍ଲେଖ କରିଛନ୍ତି ।
