ଫୁଲନଖରା (ଓଡ଼ିଶା ତାଜା ନ୍ୟୁଜ୍) :- ନିଆଳୀ ରାସ୍ତ ପାର୍ଶ୍ୱରେ ଥିବା ନଖରା ଗ୍ରାମର ଭାଗବତ ବାସୁଦେବ ମେଳନ ଓ ଯାତ୍ରା ବୁଧବାର ଠାରୁ ଆରମ୍ଭ ହୋଇଛି । ନଖରା ଗ୍ରାମ୍ୟ ପରିଚାଳନା କମିଟି ପକ୍ଷରୁ ଆୟୋଜିତ ଏହି ମେଳଣ ଏବଂ ଯାତ୍ରା ଶୁକ୍ରବାର ପର୍ଯ୍ୟନ୍ତ ଚାଲିବ । ବୁଧବାର ସନ୍ଧ୍ୟାରେ ନଖରା ଭାଗବତ ବାସୁଦେବଙ୍କ ପୀଠରୁ ଏକ ବିମାନ ବାହାର କରାଯାଇଥିଲା ।
ସେହିପରି ନଖରା ପଞ୍ଚୁସାହିରୁ ମଧ୍ୟ ଏକ ବିମାନ ଭାଗବତ ବାସୁଦେବଙ୍କ ପୀଠକୁ ଆସି ପହଞ୍ଚିବା ପରେ ସୁସଜ୍ଜିତ ଦୁଇ ବିମାନକୁ ଖୋଳ କର୍ତ୍ତାଳ ସଂକୀର୍ତ୍ତନ, ବାଜା ,ବାଣ ରୋଷଣୀ କରି ଶୋଭାଯାତ୍ରାରେ ନଖରା ଗ୍ରାମ ପରିକ୍ରମା କରି ମା,ଜାଗୁଳାଇଙ୍କ ପୀଠ ସ୍ଥଳରେ ରାତି ୧୦ଟାରେ ପହଞ୍ଚିଥିଲା ।
ସେଠାରେ ଦୁଇ ବିମାନକୁ ପୂଜକ ଫୁଲ ଚନ୍ଦନ ଧୂପ ଦେଇ ପୂଜା କରିସାରିବା ପରେ ଦୁଇ ବିମାନ ମାଙ୍କ ପୀଠରେ ଅବସ୍ଥାନ କରିଥିଲେ । ଦୁଇ ବିମାନ ଶୋଭାଯାତ୍ରାରେ ଆସିଲା ବେଳେ ଗ୍ରାମର ଯୁବକ ଏବଂ ପିଲାମାନେ ନାଚକୁଦ କରି ବିମାନ ଆଗେ ଆଗେ ଆସୁଥିବା ଦେଖିବାକୁ ମିଳିଥିଲା । ଶାନ୍ତି ଶୃଙ୍ଖଳା ରକ୍ଷା ପାଇଁ ପାହାଳ ଥାନା ପୋଲିସ ବିମାନ ଶୋଭାଯାତ୍ରୀଙ୍କ ସହିତ ଆସିଥିଲେ ।
ବିମାନ ପହଞ୍ଚିବା ପରେ ପାରମ୍ପରିକ ଯାତ୍ରା ଅପେରା ପାର୍ଟି ପକ୍ଷରୁ ରାତି ୧୨ ଟାରେ ଅପେରା ପରିବେଷଣ କାର୍ଯ୍ୟ ଆରମ୍ଭ ହୋଇଥିଲା । ଯାତ୍ରା ପଡିଆରେ ବହୁ ଉଠା ଦୋକାନୀ ସେମାନଙ୍କର ଦୋକାନ ଖୋଲିଥିଲେ । ଯାତ୍ରା ଦେଖିବା ପାଇଁ ବିଭିନ୍ନ ଗ୍ରାମରୁ ଲୋକେ ପିଲା ଛୁଆଙ୍କୁ ସାଥିରେ ଆଣି ଅପେରା ଦେଖିବା ସହିତ ଚଟପଟି ଖାଦ୍ୟ ଖାଇଥିଲେ ଏବଂ ଘରକରଣା ଜିନିଷ କିଣିବାର ସୁଯୋଗ ପାଇଥିଲେ ।
ଗୁରୁବାର ଅପରାହ୍ନ ୨ ଟାରୁ ଘୋଡ଼ା ନାଚ ଅରମ୍ଭ ହୋଇ ରାତୁ ୮ଟାରେ ଶେଷ ହେବ । ରାତି ୮ଟାରେ ସଂକୀର୍ତ୍ତନ ପରିବେଷଣ ସାଙ୍ଗକୁ ସମ୍ବର୍ଦ୍ଧନା କାର୍ଯ୍ୟ କରାଯିଵ । ନଖରା ଗ୍ରାମ୍ୟ କମିଟିର ସଭାପତି ସୁଦାମ ଚରଣ ସାହୁ ,ସଂପାଦକ ନିରଞ୍ଜନ ସାହୁ , ଉପ ସଭାପତି ସୁକାନ୍ତ କୁମାର ସାହୁ ଙ୍କ ସମେତ ନଖରା ଗ୍ରାମର ସମସ୍ତ ଯୁବକ , ବୟଜ୍ୟେଷ୍ଠ ବ୍ୟକ୍ତି ମାନେ ଉପସ୍ଥିତ ରହି ମେଳନ ଶୋଭାଯାତ୍ରା ଏବଂ ଯାତ୍ରାକୁ ସୁଚାରୁ ରୂପେ ପରିଚାଳନା କରିଥିଲେ ।
