ପୁରୀ (ଓଡ଼ିଶା ତାଜା ନ୍ୟୁଜ୍) :- ପୁରୀଜିଲ୍ଲା ଓକିଲ ସଂଘ ନିର୍ବାଚନ ଚଳିତ ସପ୍ତାହ ଶନିବାର ୨୯ ତାରିଖ ଦିନ ଅନୁଷ୍ଠିତ ହେବ । ସକାଳ ୭ ଟା ୩୦ରୁ ଅପରାହ୍ନ ୩ଟା ପର୍ଯ୍ୟନ୍ତ ମତଦାନ ପ୍ରକ୍ରିୟା ଚାଲୁ ରହିବ । ନିର୍ବାଚନ ଅଧିକାରୀ ଭାବେ ଆଇନଜୀବୀ ପ୍ରଦୀପ କୁମାର ରଥ ଶାନ୍ତି ଶୃଙ୍ଖଳା ସହ ନିର୍ବାଚନ ପରିଚାଳନା ପାଇଁ ଚେଷ୍ଟା ଚଳାଇଛନ୍ତି । କଚେରି ଛକରେ ବିଭିନ୍ନ ବଡ ବଡ ଫ୍ଲେକ୍ସ ବ୍ଯାନର ହୋର୍ଡିଂ ଗୁଡିକ ଲଗାଯାଇଛି । ପ୍ରାର୍ଥୀମାନେ ଆଇନଜୀବୀ ମାନଙ୍କୁ ପୁସିଙ୍ଗକାର୍ଡ ବାଣ୍ଟିବା ସହ କେତେକ ପ୍ରାର୍ଥୀ ସାହି ଗଳିକନ୍ଦିରେ ଆଇନଜୀବୀଙ୍କ ଘରକୁ ଯାଇ ପ୍ରଚାର କରୁଥିବା ଦେଖିବାକୁ ମିଳୁଛି । ସଭାପତି ପଦ ପାଇଁ ଦ୍ବିମୁଖୀ ପ୍ରତିଦ୍ବନ୍ଦିତା ହେଉଛି । ପ୍ରେମାନନ୍ଦ ମହାନ୍ତି ପୂର୍ବରୁ ସଭାପତି ଥିବାବେଳେ ଚଳିତବର୍ଷ ପ୍ରାର୍ଥୀ ହୋଇ ତାଙ୍କ ନିଜସ୍ବ ଶୈଳୀରେ ପ୍ରଚାର କରୁଛନ୍ତି ।
ଅନ୍ୟତମ ସଭାପତି ପ୍ରାର୍ଥୀ ସାରଦା ପ୍ରସାଦ ସାମଲ ପ୍ରଥମ ଥର ପାଇଁ ଏହି ଦୌଡରେ ସାମିଲ ହୋଇଛନ୍ତି । ସେ ପୂର୍ବରୁ ସାଧାରଣ ସମ୍ପାଦକ ଭାବେ କାର୍ଯ୍ୟ ତୁଲାଇଥିଲେ । ନିର୍ବାଚନରେ କିପରି ଜିତିବା ପାଇଁ କଳା କୌଶଳ ଆବଶ୍ୟକ ତାହା ତାଙ୍କୁ ବେଶ ଜଣା । ଉପସଭାପତି ପାଇଁ ଦେବେନ୍ଦ୍ର ନାଥ ମିଶ୍ର ଓ ବିଭୂଦତ୍ତ ପଟ୍ଟନାୟକଙ୍କ ସହ ସିଧାସଳଖ ପ୍ରତିଦ୍ବନ୍ଦିତା ହେଉଛି । ସଂଘର ସବୁଠାରୁ ଗୁରୁତ୍ୱପୂର୍ଣ୍ଣ ପଦବୀ ସାଧାରଣ ସମ୍ପାଦକ ପାଇଁ ତିନି ଜଣ ପ୍ରାର୍ଥୀ ହୋଇଛନ୍ତି । ତିନିଜଣ ଯାକ ଯୁବ ସୁଲଭ ଶୈଳୀରେ ପ୍ରଚାର କରୁଛନ୍ତି । ନରେଶ କୁମାର ମହାନ୍ତି ବିଭିନ୍ନ ଗ୍ରୁପ ଜରିଆରେ ନୂଆ ଡିଜାଇନର ପୁସିଙ୍ଗକାର୍ଡ ଛାଡୁଥିବା ବେଳେ କୋର୍ଟ ପରିସର ଓ ଆଇନଜୀବୀଙ୍କ ଘରକୁ ଘର ଯାଇ ପ୍ରଚାର କରୁଛନ୍ତି ।
ଶରତ କୁମାର ରାୟଗୁରୁ ଚଳିତ ଥର ଭିନ୍ନ ଶୈଳୀରେ ଯୋରଦାର ପ୍ରଚାର କରୁଛନ୍ତି । ଅନ୍ଯତମ ପ୍ରାର୍ଥୀ ରମେଶ ଚନ୍ଦ୍ର ପ୍ରଧାନ କେତେକ ନିର୍ବାଚନ ଅଭିଜ୍ଞ ଆଇନଜୀବୀଙ୍କ ପରାମର୍ଶକ୍ରମେ ପ୍ରଚାରକୁ ଯୋରଦାର ଓ ଶାଣିତ କରୁଛନ୍ତି । କଣାସ, ସତ୍ଯବାଦୀ ଓ ବ୍ରହ୍ମଗିରିର ଥିବା ସଂଘର ସଭ୍ଯ ଓ ସଭ୍ଯା ମାନଙ୍କୁ ତାଙ୍କ ସପକ୍ଷରେ ଭୋଟ ଦେବା ପାଇଁ ଅନୁରୋଧ କରୁଛନ୍ତି । ୩ ଯୁଗ୍ମ ସମ୍ପାଦକ ପଦ ପାଇଁ ସାତଜଣ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତ୍ତୀର୍ଣ୍ଣ ହୋଇଛନ୍ତି । ସମସ୍ତେ ପ୍ରଚାର ପ୍ରସାର ଯୋରଦାର କରିବାରେ ଲାଗି ପଡିଛନ୍ତି । ପ୍ରାର୍ଥୀ ମାନଙ୍କ ମଧ୍ଯରେ ଅନିଲ କୁମାର ସାହୁ, ଭାଗବତ ପ୍ରସାଦ ପଟ୍ଟନାୟକ, ବିଚିତ୍ରାନନ୍ଦ ପରିଡା, ପ୍ରତାପ ଚନ୍ଦ୍ର ମହାପାତ୍ର, ପୂର୍ଣ୍ଣଚନ୍ଦ୍ର ମହାନ୍ତି, ସମୀର ଘୋଷ ଓ ସୋମନାଥ ରଣା ରହିଛନ୍ତି । ୫ଟି କାର୍ଯ୍ୟକାରୀ ସଭ୍ଯ ପଦ ପାଇଁ ୬ଜଣ ପ୍ରାର୍ଥୀ ନିର୍ବାଚନରେ ଅବତୀର୍ଣ୍ଣ ହୋଇଛନ୍ତି । ଜ୍ୟୋତିପ୍ରକାଶ ମହାନ୍ତି, କର୍ଣ୍ଣବୀର ମହାପାତ୍ର, ମନୋରଞ୍ଜନ ସାହୁ, ରାଜେଶ ମହାନ୍ତି,ରଞ୍ଜିତ ନାୟକ ଓ ତାପସ ରଞ୍ଜନ ବଳିଆରସିଂହ ପ୍ରମୁଖ ଯୋରଦାର ଚଳାଇଛନ୍ତି । ୨୯ ତାରିଖ ଦିନ ଭୋଟ ଗ୍ରହଣ ସରିବା ପରେ ସଂଧ୍ଯା ସମୟରେ ଗଣତି ଆରମ୍ଭ ହେବ ।
