୧୧ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) ପୁରୀ :- ଶ୍ରଦ୍ଧା ଶୁଦ୍ଧତା ଓ ପବିତ୍ରତା ପାଇଁ ସଚେତନତା ସୃଷ୍ଟି ।ପୁରୀ ବ୍ରହ୍ମଗିରି ରାସ୍ତାର ଗିରଳ ଛକ ହୁଡକ ରାସ୍ତା ପାର୍ଶ୍ବରେ ନବଦିନାତ୍ମକ ଶ୍ରୀ ଶ୍ରୀ ଅଷ୍ଟଲକ୍ଷ୍ମୀ ମହାଯଜ୍ଞ ସମ୍ପନ୍ନ ହୋଇଯାଇଛି । ପୂଜାନନା ଯଜ୍ଞ ଫାଉଣ୍ଡେସନ ଓ ପରିବର୍ତ୍ତନ ଓଡିଶା ପକ୍ଷରୁ ଏହି ଯଜ୍ଞ ଆୟୋଜିତ ହୋଇଥିଲା । ୫ଟି ଯଜ୍ଞ ସାଲାରେ ୨୫ଟି ଯଜ୍ଞ କୁଣ୍ଡରେ ଆହୂତି ପ୍ରଦାନ କରାଯାଇଥିଲା । ପ୍ରାୟ ୨୫ କ୍ବିଣ୍ଟାଲ ଶୁଦ୍ଧ ଗାଇ ଘିଅରେ ଯଜ୍ଞ ହୋମ କରାଯାଇଥିଲା । ବାୟୁ ମଣ୍ଡଳର ଶୁଦ୍ଧତା ପାଇଁ ଏହି ଶୁଦ୍ଧ ଘୃତ ଯଜ୍ଞ ବେଶ ଉପକାରିତା ଥିବା ପ୍ରମାଣିତ ହୋଇଛି । ବାୟୁ କୋଣ ଓ ଅଗ୍ନି କୋଣରେ ପରିବେଶ ସୁଦ୍ଧତା ମାପକ ଯନ୍ତ୍ର ବ୍ୟବହାର କରାଯାଇଥିଲା ।
ବାୟୁ ମଣ୍ଡଳରେ ଶୁଦ୍ଧତା ଆସିଥିବା ଆୟୋଜକ କମିଟି ସୂଚନା ଦେଇଛନ୍ତି । ବାୟୁ ମଣ୍ଡଳ ପରିବେଶ ଶୁଦ୍ଧିକରଣ ହେଲେ ମଣିଷର ମନରେ ଶୁଦ୍ଧତା ଓ ସଦବୁଦ୍ଧି ଉଦୟ ହେବ । ୧୨ ଲକ୍ଷ ଶ୍ରୀ ମହାଲକ୍ଷ୍ମୀଙ୍କ ମନ୍ତ୍ର ଯପ କରାଯାଇଥିଲା । ଏକ ଲକ୍ଷ କୋଡିଏ ହଜାର ଆହୂତି ପ୍ରଦାନ କରାଯାଇଥିଲା । ଯଜ୍ଞ ହୋମ ଓ ଦୀପରେ ପ୍ରଭୁଙ୍କ ପାଇଁ ଶୁଦ୍ଧ ଘିଅ ବ୍ୟବହାର ଉପରେ ସଚେତନତା ସୃଷ୍ଟି କରାଯାଇଥିଲା । ବାଉଁଶ କାଠି ଓ ରସାୟନିକ ପ୍ରଲେପ ଧୂପକାଠି ନ ଜାଳିବା ପାଇଁ ଶ୍ରଦ୍ଧାଳୁଙ୍କୁ ପରାମର୍ଶ ଦିଆଯାଇଥିଲା ।
ଏହି ଯଜ୍ଞରେ ବହୁ ଅନୁଷ୍ଠାନ, ଗିରଳ ,ପୋଖରିପଡା ସମେତ ଆଖପାଖ ଅଞ୍ଚଳବାସୀ ସହଯୋଗ କରିଥିଲେ । ଗୋ ସେବା ପାଇଁ ସାଧୁସନ୍ଥ ପରାମର୍ଶ ଦେଇଥିଲେ । ପୃଜାନନା ଯଜ୍ଞ ଫାଉଣ୍ଡେସନର ଅଧ୍ୟକ୍ଷ ଗୁରୁଚରଣ ପଣ୍ଡା, ପରିବର୍ତ୍ତନ ଓଡିଶାର ଅଧ୍ୟକ୍ଷ ଜିତେନ୍ଦ୍ର ମହାପାତ୍ର, ଛତିଶା ନିଯୋଗ ନାୟକ ଜନାର୍ଦ୍ଦନ ପାଟ୍ଟଯୋଶୀ ମହାପାତ୍ର, ବିଭିନ୍ନ ମଠର ମଠାଧୀଶ, ଶତାଧିକ ସାଧୁସନ୍ଥ ଓ ଭକ୍ତ ମାନେ ଯୋଗ ଦେଇଥିଲେ । ଯଜ୍ଞ ପୂର୍ଣ୍ଣାହୁତି ପରେ ସହଯୋଗି ଅନୁଷ୍ଠାନ, ଗ୍ରାମବାସୀ, ଗଣମାଧ୍ୟମ ପ୍ରତିନିଧି ଓ ସାଧୁସନ୍ଥ ମାନଙ୍କୁ ସମ୍ବର୍ଦ୍ଧିତ କରାରାଇଥିଲା ।
