୧୧ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) କଟକ :- କଟକ ସଦର ଥାନା ତେଲଙ୍ଗାପେଣ୍ଠ ନିକଟସ୍ଥ ନୂଆଗଡ଼ ଗ୍ରାମର ବାବା ବାଲୁଙ୍କେଶ୍ୱର ମହାଦେ ପୀଠରେ ଏବଂ କୁଦସାହି ଠାରେ ମଙ୍ଗଳବାର ଦିନ ଫାଲଗୁନ ଦ୍ୱାଦଶୀ ଦୋଳ ମେଳଣ ଅନୁଷ୍ଠିତ ହୋଇଯାଇଛି । ଅପରାହ୍ନ ଗୋଟାଏ ସମୟରେ ଆଖପାଖ ଅଞ୍ଚଳର ୨୫ ଗୋଟି ଦୋଳ ବିମାନ ଅନନ୍ତା ବଳିଆ କଲେଜ ନିକଟସ୍ଥ ମା’ ଦୁଲାଦେଈ ପୀଠ ଠାରେ ଏକତ୍ରିତ ହୋଇଥିଲେ ।
ଦିନ ସାଢ଼େ ଗୋଟାଏ ସମୟରେ ଦୋଳ ବିମାନ ଗୁଡିକ ପଛକୁ ପଛ ବାଜା ବାଣ ରୋଷଣୀ କରି ପୁରୁଣା ନୂଆଗଡ଼ ସାହି ପରିକ୍ରମା କରି ବାଲୁଙ୍କେଶ୍ୱର ମନ୍ଦିର ନିକଟରେ ପହଞ୍ଚି ମନ୍ଦିର ଚାରିପାଖ ପରିକ୍ରମା କରି ସାରିବା ପରେ ନିଜ ନିଜ ଆସନରେ ଅବସ୍ଥାନ କରିଥିଲେ । ଏହି ମେଳଣ ଉପଲକ୍ଷେ ୪୮ ସଂକୀର୍ତ୍ତନ ମଣ୍ଡଳର ମହନ୍ତ ବନମାଳୀ ଦାସଙ୍କ ନେତୃତ୍ୱରେ ବିଭିନ୍ନ ଗ୍ରାମର ସଂକୀର୍ତ୍ତନ ମଣ୍ଡଳୀ ଓଡ଼ଶୀ ସଂକୀର୍ତ୍ତନ ପରିବେଷଣ କରିଥିଲେ ।
ଏହି ମେଳଣକୁ ନୁଆଗଡ଼ ଗ୍ରାମ୍ୟ କମିଟିର ସମସ୍ତ ସଦସ୍ୟ, ମହନ୍ତ , ଅଧିକାରୀ ,ବ୍ରାହ୍ମଣ ସମାଜ ,ବାରିକ ସମାଜ , ବେହେରା ସମାଜର ସଦସ୍ୟମାନେ ଏବଂ ନୁଆଗଡ଼ ଗ୍ରାମବାସୀ ଯୁବକମାନେ ପରିଚାଳନା କରିଥିଲେ ।ଶାନ୍ତି ଶୃଙ୍ଖଳା ରକ୍ଷାପାଇଁ କଟକ ସଦର ଥାନା ପକ୍ଷରୁ ପୋଲିସ କର୍ମଚାରୀ ମୂତ୍ତୟନ କରାଯାଇଥିଲା ।
ବାଲୁଙ୍କେଶ୍ୱର ପୀଠରେ ଅପରାହ୍ନ ୫ଟାରେ ମେଲଣ କାର୍ଯ୍ୟ ଶେଷ ହେବାପରେ ମେଳଣରେ ଯୋଗ ଦେଇଥିବା ଦୋଳ ବିମାନ ଗୁଡିକୁ ଭୋଗହାଣ୍ଡି ପ୍ରଦାନ କରାଏ । ମେଳଣ ଶେଷ ହେବାପରେ ଉକ୍ତ ଦୋଳ ବିମାନ ଗୁଡିକ ସନ୍ଧ୍ୟାରେ କୁଦସାହି ମେଳଣରେ ଯାଇ ପହଞ୍ଚିଥିଲେ । ଏହି ମଳଣ ଦେଖିବା ପାଇଁ ପ୍ରବଳ ଜନ ସମାଗମ ହୋଇଥିଲା ।
