୯ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) ହିଞ୍ଜିଳିକାଟୁ :- ଅନ୍ତର୍ଜାତୀୟ ମହିଳା ଦିବସ ପାଳନ ଅବସରରେ ଶନିବାର ନିଖିଳ ଓଡ଼ିଶା ଜୀବିକା ମିଶନ ଇସି ସଂଘ ହିଞ୍ଜିଳିକାଟୁ ଶାଖା ପକ୍ଷରୁ ରାଜ୍ୟ ବ୍ୟାପି ପ୍ରତିବାଦ ଦିବସ ରୂପେ ପାଳନ କରଯାଇଛି । ହିଞ୍ଜିଳିକାଟୁ ବ୍ଳକ ଇସି ସଂଘ ସଭାପତି ରଶ୍ମିତା ବେହେରାଙ୍କ ଅଧ୍ୟକ୍ଷତାରେ ଆୟୋଜିତ କାର୍ଯ୍ୟକ୍ରମରେ ଶତାଧିକ ସଂଘ ସଦସ୍ୟ ଯୋଗ ଦେଇ ସହର ପରିକ୍ରମା କରି ପ୍ରତିବାଦ ସଭା ମାଧ୍ୟମରେ ବିଭିନ୍ନ ଦାବି ଉପସ୍ଥାପନ କରିଥିଲେ ।
ନୂତନ ସରକାର ଆସିବା ପରେ ରାଜ୍ୟ ସରକାରଙ୍କ ପକ୍ଷରୁ ଓଡ଼ିଶା ଜୀବିକା ମିଶନ ଓ ମିଶନ ଶକ୍ତିର କର୍ମଜୀବୀ ମହିଳାଙ୍କ ଉପରେ ପ୍ରତିହିଂସା ପରାୟଣ ହୋଇ ପୁନର୍ଗଠନ ଆଳରେ କରାଯାଇଥିବା ବହିଷ୍କାର ଆଦେଶ ପ୍ରତ୍ୟାହାର ପାଇଁ ପ୍ରତିବାଦ ଦିବସରେ ଦାବି କରିଥିଲେ । ଓଡ଼ିଶାରେ ଏନ୍ଆରଏଲଏମ କେନ୍ଦ୍ରୀୟ ସ୍କିମ ଅନ୍ତର୍ଗତ ଓଡ଼ିଶା ଜୀବିକା ମିଶନ ଏବଂ ଓଡ଼ିଶା ମିଶନ ଶକ୍ତି ଅଧୀନରେ କାର୍ଯ୍ୟରତ ପ୍ରମୁଖ ସ୍କିମ ୱାର୍କର୍ କାର୍ଯ୍ୟ ନିର୍ବାହୀ (ଇସି) ସଦସ୍ୟଙ୍କୁ ପୁନର୍ଗଠନ ଆଳରେ ବହିଷ୍କାର ଷଡଯନ୍ତ୍ର ଉଦ୍ଦେଶ୍ୟ ପ୍ରଣୋଦିତ ।
ଏଣୁ ବହିଷ୍କାର ଆଦେଶ ପରିବର୍ତ୍ତେ ନିୟମିତ ସ୍କିମ ୱାର୍କରଙ୍କୁ ନିୟମିତ କରାଇ ତାଙ୍କ ଦକ୍ଷତାକୁ ହିତାଧିକାରୀଙ୍କ ଉତ୍ତରୋତ୍ତର କ୍ରମବିକାଶକୁ ତ୍ୱରାନ୍ୱିତ କରିବାକୁ ଦାବି କରିଥିଲେ । ରାଜ୍ୟ ସରକାର ଏହି ଦାବି ପୂରଣ ନ କଲେ ଇସି ଏଵଂ ମହିଳା ସ୍ଵୟଂ ସହାୟକ ଗୋଷ୍ଠୀର ସଭାପତି ଓ ସମ୍ପାଦକ ଗାଁ ରୁ ରାଜଧାନୀ ପର୍ଯ୍ୟନ୍ତ ମହିଳା ସଂଘର୍ଷର ସଂଘର୍ଷ ଜାରି ରଖିବେ ଓ ଏଥିରୁ ଉତ୍ପନ୍ନ ପରିସ୍ଥିତି ପାଇଁ ରାଜ୍ୟ ସରକାର ଦାୟୀ ରହିବେ ବୋଲି ଅନ୍ତର୍ଜାତୀୟ ମହିଳା ଦିବସ ଅବସରରେ ସଂକଳ୍ପ ନେଇଥିଲେ । ଅନ୍ୟ ମାନଙ୍କ ମଧ୍ୟରେ ଶର୍ମିଳା ରାଉଳ, ସବିତା ପ୍ରଧାନ, ଏ .ସୁଶୀଳା ପାତ୍ର, ଦ୍ରୌପଦୀ ମୁର୍ମୁ, ସୁକାନ୍ତି ପ୍ରଧାନ ଓ ଡି ଦମୟନ୍ତୀ ପ୍ରମୁଖଙ୍କ ସମେତ ଶତାଧିକ ମହିଳା ଅଂଶ ଗ୍ରହଣ କରିଥିଲେ ।
