୬ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) ବାଲିପାଟଣା :- ଭୁବନେଶ୍ୱରସ୍ଥିତ ଲୋହିଆ ଏକାଡେମୀ ଓ଼ ରବି ରାୟ ସ୍ମୃତି ସଂସଦ ମିଳିତ ଆନୁକୂଲ୍ୟରେ ଲୋକସଭା ପୂର୍ବତନ ବାଚସ୍ପତି ରବି ରାୟଙ୍କ ଅଷ୍ଟମ ଶ୍ରାଦ୍ଧ ବାର୍ଷିକୀ ତାଙ୍କର ଜନ୍ମସ୍ଥାନ ବାଲିପାଟଣା ବ୍ଲକ ଅନ୍ତର୍ଗତ ଭଅଁରା ନିଜିଗଡ଼ ଠାରେ ଗୁରୁବାର ଦିନ ଅନୁଷ୍ଠିତ ହୋଇଯାଇଛି। ସଂସଦ ସଭାପତି ଅଭିମନ୍ୟୁ ନାୟକଙ୍କ ସଭାପତିତ୍ୱରେ ଅନୁଷ୍ଠିତ ଏହି ଉତ୍ସବରେ ମୁଖ୍ୟ ଅତିଥିଭାବେ ପ୍ରାକ୍ତନ ଅଧ୍ୟକ୍ଷ କ୍ଷୀରୋଦ କୁମାର ରାୟ ମହାପାତ୍ର ଯୋଗ ଦେଇ ତାଙ୍କ ଅଭିଭାଷଣରେ କହିଲେ ଯେ ସାମ୍ୟବାଦୀ ଆନ୍ଦୋଳନରେ ରବି ରାୟ ଙ୍କର ସ୍ୱତନ୍ତ୍ର ପରିଚୟ ଥିଲା। ସେ ଏହି ମାଟିରେ ଜନ୍ମ ନେଇ ଆମକୁ ଧନ୍ୟ କରିଛନ୍ତି ।
ପରିବେଷବିତ ପ୍ରଫୁଲ ସାମନ୍ତରା ମୁଖ୍ୟ ବକ୍ତାଭାବେ ଯୋଗଦାନ କରି ରବି ରାୟଙ୍କ ଆଦର୍ଶ ରାଜନୈତିକ ଜୀବନ ଅନ୍ୟ ମାନଙ୍କ ପାଇଁ ଅନୁକରଣୀୟ ହୋଇ ରହିବ ବୋଲି କହିଥିଲେ। ସମ୍ମାନିତ ଅତିଥି ଶିକ୍ଷାବିତ ଅଧ୍ୟାପକ ଭାରତ ଭୂଷଣ ମହାନ୍ତି, ତାଙ୍କ ପାଇଁ ବାଲିପାଟଣା ଜାତୀୟ ସ୍ତରରେ ପରିଚିତ ଓ ସେ ଓଡ଼ିଆର ଅସ୍ମିତା ବୋଲି କହିଥିଲେ।ଅନ୍ୟତମ ଅତିଥିଭାବେ ରମେଶ ଚନ୍ଦ୍ର ସାହୁ, ଦେବୀ ପ୍ରସାଦ ରାୟ, ପିତାମ୍ବର ମହାପାତ୍ର , ଦିଲ୍ଲୀପ କୁମାର ଓଝା, ଦୁର୍ଯ୍ୟୋଧନ ପାତ୍ର, ଦିଲ୍ଲୀପ ବଳିୟାର ସିଂ, ମାଗୁଣି ଚରଣ ସେଠୀ, ପ୍ରଶାନ୍ତ କୁମାର ପାତ୍ର,
କାଶୀନାଥ ବାରିକ,ସଞ୍ଜୟ କୁମାର ବରାଳ ପ୍ରମୁଖ ନିଜ ବକ୍ତବ୍ୟରେ ରବି ରାୟଙ୍କ ସ୍ମୃତି ରକ୍ଷା ପାଇଁ ପ୍ରତିମୂର୍ତ୍ତି ସ୍ଥାପନ ଓ ତାଙ୍କ ନାମରେ ରାସ୍ତା ନାମକରଣ କରିବାକୁ ପ୍ରସ୍ତାବ ରଖିଥିଲେ। ସ୍ମୃତି ସଂସଦ ସମ୍ପାଦକ ଭଗବାନ ସାହୁ ସ୍ୱାଗତ ଭାଷଣ ଦେଇଥିଲାବେଳେ ସମ୍ବାଦର କ୍ରୀଡ଼ା ସଂପାଦକ ସାମ୍ବାଦିକ ସୁରେଶ ସ୍ୱାଇଁ ସମସ୍ତଙ୍କୁ ଧନ୍ୟବାଦ ପ୍ରଦାନ କରିଥିଲେ। ସୁଜାତା ଦାଶ ଓ଼ ତାଙ୍କ ସାଥି ପ୍ରାରମ୍ଭିକ ସଂଗୀତ ଓ ଭଜନ ଗାନ କରିଥିଲେ ।
ଏହି ଅବସରରେ ତାଙ୍କ ସମାଧି ପୀଠରେ ବୃକ୍ଷରୋପଣ କରାଯାଇଥିଲା। ଦଳିତ ବର୍ଗର ଜଣେ ମେଧାବୀ ଛାତ୍ରୀ ଅର୍ପିତା ପ୍ରିୟଦର୍ଶିନୀ ଭୋଇଙ୍କୁ ତାଙ୍କ ସ୍ତ୍ରୀଙ୍କ ନାମରେ ଡାକ୍ତର ସରସ୍ବତୀ ସ୍ୱାଇଁ ମେଧାବୃତ୍ତି ସମ୍ମାନ ସହିତ ପାଞ୍ଚ ହଜାର ଟଙ୍କା ପ୍ରଦାନ କରାଯାଇଥିଲା।ସ୍ଥାନୀୟ ଅଞ୍ଚଳର ବହୁ ଗ୍ରାମବାସୀ ଓ ନିମନ୍ତ୍ରିତ ବ୍ୟକ୍ତିମାନେ ଉକ୍ତ କାର୍ଯ୍ୟକ୍ରମରେ ଉପସ୍ଥିତ ରହି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।
