୫ ମାର୍ଚ୍ଚ ୨୦୨୫ (ଓଡ଼ିଶା ତାଜା ନ୍ୟୁଜ୍) ଡମପଡ଼ା :- ବାଙ୍କୀ ଉପଖଣ୍ଡ ସରଣ୍ଡା ଗଡରେ ଚଳିତ ବର୍ଷ ସାଧାରଣତନ୍ତ୍ର ଦିବସ ପ୍ୟାରେଡରେ ଯୋଗଦାନ କରିବା ପାଇଁ ବାଙ୍କୀ ବ୍ଲକ ମାଳବିହାରପୁର ସରକାରୀ ଉଚ୍ଚବିଦ୍ୟାଳୟର ଛାତ୍ରଛାତ୍ରୀମାନେ ପୂର୍ବବର୍ଷ ଭଳି ଯାଉଥିବା ବେଳେ ଗାଡିଟି ଦୁର୍ଘଟଣା ଗ୍ରସ୍ତ ହୋଇ ୨୩ଜଣ ଛାତ୍ରଛାତ୍ରୀ ସଡକ ଦୁର୍ଘଟଣାର ଶିକାର ହୋଇଥିଲେ । ପ୍ରଥମେ ଆହାତ ଛାତ୍ରଛାତ୍ରୀଙ୍କୁ ସୁବର୍ଣ୍ଣପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରେ ଆଠଗଡ଼ ଉପଖଣ୍ଡ ଚିକିତ୍ସାଳୟକୁ ଚିକିତ୍ସା ପାଇଁ ପଠା ଯାଇଥିଲା । ସେମାନଙ୍କ ମଧ୍ୟରୁ ୧୩ଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ କଟକ ଶ୍ରୀରାମଚନ୍ଦ୍ର ଭଞ୍ଜ ଭେଷଜ ମହାବିଦ୍ୟାଳୟକୁ ଉତ୍ତମ ଚିକିତ୍ସା ପାଇଁ ସ୍ଥାନାନ୍ତର କରାଯାଇଥିଲା । ଆଠଗଡ଼ ଚିକିତ୍ସାଳୟରେ ଚିକିତ୍ସାଧିନ ଅବସ୍ଥାରେ ଆହତ ୧୦ମ ଶ୍ରେଣୀର ଛାତ୍ର ସୌମ୍ୟରଞ୍ଜନ ବେହେରା ମୃତ୍ୟୁ ବରଣ କରିଥିଲେ ।
ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତିବ୍ର ଉତ୍ତେଜନା ଲାଗି ରହିବା ସହିତ କ୍ଷତିପୂରଣ ଦାବୀରେ ଗ୍ରାମବାସୀମାନେ ସ୍କୁଲରେ ତାଲା ପକାଇଥିଲେ । ସରକାରଙ୍କ ପକ୍ଷରୁ ମୃତକଙ୍କ ପରିବାରକୁ ୫ଲକ୍ଷ ଓ ଗୁରୁତର ଆହତମାନଙ୍କୁ ୩୦ହଜାର ଟଙ୍କା କ୍ଷତିପୂରଣ ଦେବାପାଇଁ ଘୋଷଣା କରାଯାଇଥିଲା । ଶିକ୍ଷାବିଭାଗ ପକ୍ଷରୁ ପ୍ରଧାନ ଶିକ୍ଷକ ଓ ସହକାରୀ ଶିକ୍ଷକ ଶ୍ରୀନିବାସ ବେହେରାଙ୍କୁ ନିଲମ୍ବନ କରିବା ସହିତ ଅନ୍ୟ ୨ଜଣ ଶିକ୍ଷକଙ୍କୁ ଅନ୍ୟତ୍ର ବଦଳେଇ କରାଯାଇଥିଲା । ଏଥିରେ ଅଭିଭାବକମାନେ ଅସନ୍ତୁଷ୍ଟ ହେବାରୁ ପ୍ରଶାସନ ପକ୍ଷରୁ ଦୁଇ ଦୁଇଥର ବିଦ୍ୟାଳୟ ଖୋଲିବା ପାଇଁ ଚେଷ୍ଟା କରାଯାଇଥିଲେ ମଧ୍ୟ ବିଫଳ ହୋଇଥିଲେ । ଦୀର୍ଘ ୩୭ଦିନ ହେଲା ବିଦ୍ୟାଳୟ ବନ୍ଦ ଥିବାରୁ ଛାତ୍ରଛାତ୍ରୀମାନଙ୍କର ପାଠ ପଢ଼ାରେ ଘୋର ବ୍ୟାଘାତ ଦେଖାଯାଇଥିଲା ।
ଗତ ୨ତାରିଖ ରବିବାର ଦିନ ଆଠଗଡ଼ ଥାନା ଅନ୍ତର୍ଗତ ଖୁଣ୍ଟକଟା ପଂଚାୟତ ଅଧିନସ୍ଥ ମହାଦେବ ମନ୍ଦିର ପ୍ରାଙ୍ଗଣରେ ବାଙ୍କୀ ବ୍ଲକ ଶିକ୍ଷା ଅଧିକାରୀ ସନ୍ତୋଷ କୁମାର ସେଠୀଙ୍କ ପରାମର୍ଶ କ୍ରମେ ବରେନ୍ଦ୍ରକୃଷ୍ଣ ବିଦ୍ୟାପୀଠର ଭାରପ୍ରାପ୍ତ ପ୍ରଧାନ ଶିକ୍ଷକ ଗୋବିନ୍ଦ ଚନ୍ଦ୍ର ତ୍ରିପାଠୀ, ଆଦର୍ଶ ଶିକ୍ଷକ ବଳରାମ ପାଇକରାୟ, ଢ଼େଙ୍କାନାଳର ସରକାରୀ ଉଚ୍ଚବିଦ୍ୟାଳୟର କିରାଣୀ ବାବୁଲାଲ୍ ସାହୁଙ୍କ ଆବାହକତ୍ୱରେ ମାଳବିହାରପୁର ଗ୍ରାମର ସଭାପତି ତଥା ଅବସରପ୍ରାପ୍ତ ପ୍ରଧାନ ଶିକ୍ଷକ ବଂଶୀଧର ଜେନାଙ୍କ ଅଧ୍ୟକ୍ଷତାରେ କଦଳୀବାଡି ପଂଚାୟତର ସରପଂଚଙ୍କ ପ୍ରତିନିଧି ଜିତେନ୍ଦ୍ର କୁମାର ଖଟୁଆ,
ସମିତି ସଭ୍ୟ ଫକୀର ମୋହନ ସେଠୀ, ପୂର୍ବତନ ସରପଂଚ ପ୍ରକାଶ କୁମାର ବେଉରା, ସମାଜସେବୀ ପ୍ରଦୀପ କୁମାର ଜେନା ପ୍ରଭୃତିଙ୍କ ନେତୃତ୍ୱରେ ମାଳିବିହାରପୁର ଗ୍ରାମବାସୀ , ଛାତ୍ରଛାତ୍ରୀ, ଅଭିଭାବକ ଓ ସମସ୍ତ ଶିକ୍ଷକଙ୍କ ଉପସ୍ଥିତିରେ ବହୁ ଆଲୋଚନା ଓ ପର୍ଯ୍ୟାଲୋଚନା ପରେ ସ୍କୁଲ ଖୋଲିବା ପାଇଁ ନିଷ୍ପତ୍ତି ଗ୍ରହଣ ହୋଇଥିଲା । ଜିଲ୍ଲାପାଳଙ୍କ ନିର୍ଦ୍ଦେଶ ମୁତାବକ ବାଙ୍କୀ ବ୍ଲକ ଶିକ୍ଷା ଅଧିକାରୀ ସନ୍ତୋଷ କୁମାର ସେଠୀ ଓ ଅତିରିକ୍ତ ବ୍ଲକ ଶିକ୍ଷା ଅଧିକାରୀ ବଳରାମ ମୁଦୁଲିଙ୍କ ଉପସ୍ଥିତିରେ ଦୀର୍ଘ ୩୭ଦିନ ପରେ ସ୍କୁଲ ଖୋଲାଯାଇଛି । ଶାନ୍ତ ବାତାବରଣ ଭିତରେ ସ୍କୁଲର ପାଠପଢ଼ା ଆରମ୍ଭ ହୋଇଥିବା ଜଣାପଡିଛି ।
