କ୍ରୀଡା ଶରୀରକୁ ସୁସ୍ଥ ଓ ନୀରୋଗ ରଖିଥାଏ
୧୬ ଫ୍ରେବୁଆରି ୨୦୨୫ (ଓଡ଼ିଶା ତାଜା ନ୍ୟୁଜ୍ ) ବୋଲଗଡ :- ବୋଲଗଡ ଶିକ୍ଷାବ୍ଲକ ଅନ୍ତର୍ଗତ ୨୮ଟି ଉଚ୍ଚ ବିଦ୍ୟାଳୟର ଖେଳ ଶିକ୍ଷକ ମାନଙ୍କ ମିଳିତ ସହଯୋଗରେ ଓ କ୍ରୀଡା ସଂଗଠନର ସମ୍ପାଦକ ମାନସ କୁମାର ବେହେରାଙ୍କ ସଭାପତିତ୍ବରେ ରବିବାର ଦିନ ବ୍ଲକସ୍ତରୀୟ ବିଦ୍ୟାଳୟ ସମୂହ କ୍ରୀଡା ସଂଗଠନ କର୍ମଶାଳା ବୋଲଗଡସ୍ଥିତ ମା’ ଭୂଇଁଆଣୀ ଶକ୍ତିପୀଠରେ ଅନୁଷ୍ଠିତ ହୋଇ ଯାଇଛି । ଏହି କ୍ରୀଡା ସଂଗଠନ କର୍ମଶାଳାରେ ମୁଖ୍ଯଅତିଥି ଭାବେ ବୋଲଗଡ ଗୋଷ୍ଠୀ ଶିକ୍ଷାଅଧିକାରୀ ଗୋକୁଳ ଚନ୍ଦ୍ର ବଳବନ୍ତରାୟ, ମୁଖ୍ଯବକ୍ତା ଭାବେ ଅତିରିକ୍ତ ଗୋଷ୍ଠୀ ଶିକ୍ଷାଧିକାରୀ କୈଳାସନାଥ ସ୍ବାଇଁ ଓ ସମ୍ମାନୀତ ଅତିଥିଭାବେ ଖୋର୍ଦ୍ଧାଜିଲ୍ଲା ଶାରୀରିକ ଶିକ୍ଷାଧିକାରୀ ଦିଲ୍ଲୀପ କୁମାର ମୋଦୀ , ଖୋର୍ଦ୍ଧାଜିଲ୍ଲା ଖେଳ ସଂଗଠନ ସମ୍ପାଦକ କାଳିଚରଣ ମୁଖୀ , ଭୁବନେଶ୍ୱର ଖେଳ ସଂଗଠନ ସମ୍ପାଦକ ଅଜୟ କୁମାର ତୁଙ୍ଗସାମନ୍ତ, ବେଗୁନିଆ ଖେଳ ସଂଗଠନ ସମ୍ପାଦକ ପ୍ରଭାତ କୁମାର ନିଶଙ୍କ ପ୍ରମୁଖ ଯୋଗ ଦେଇଥିଲେ ।
କର୍ମଶାଳାର ପ୍ରାରମ୍ଭରେ ସଭାପତି ମାନସ କୁମାର ବେହେରା ସ୍ବାଗତ ଭାଷଣ ଦେଇ ଅତିଥି ପରିଚୟ ପ୍ରଦାନ କରିଥିଲେ । ଖେଳ ଶିକ୍ଷକ ରମେଶଚନ୍ଦ୍ର ପ୍ରଧାନ ବାର୍ଷିକ ବିବରଣୀ ପଠନ କରି ବିଦାୟୀ ଖେଳ ଶିକ୍ଷୟିତ୍ରୀ ମିନାକ୍ଷୀ ନନ୍ଦଙ୍କ ମାନପତ୍ର ପଠନ କରିଥିଲେ । କ୍ରୀଡା ଶରୀରକୁ ସୁସ୍ଥ ଓ ନୀରୋଗ ରଖିଥାଏ ବୋଲି ମୁଖ୍ଯ ଅତିଥି ଶ୍ରୀ ବଳବନ୍ତରାୟ ଖେଳ ଶିକ୍ଷକ ମାନଙ୍କୁ ପରାମର୍ଶ ଦେଇଥିଲେ । ବୋଲଗଡ ଶିକ୍ଷାବ୍ଲକ ଅଧିନରେ ବ୍ଲକ ସ୍ତରୀୟ ବିଦ୍ୟାଳୟ ସମୂହ କ୍ରୀଡା ସଂଗଠନ ସ୍ଥାପନ କରାଯାଇଥିବାରୁ ଅତିରିକ୍ତ ଗୋଷ୍ଠୀ ଶିକ୍ଷାଧିକାରୀ କୈଳାସନାଥ ସ୍ବାଇଁ ଉଚ୍ଚ ପ୍ରଶଂସା କରିଥିଲେ ।
ଯଦି ବୋଲଗଡ ଶିକ୍ଷାବ୍ଲକରେ ସମସ୍ତ ଖେଳ ଶିକ୍ଷକ ମାନଙ୍କର ଏକତା , ସହଯୋଗ , ସଂଗଠନ ଓ ସମନ୍ବୟ ରହିଲେ ପ୍ରତ୍ୟେକ କ୍ରୀଡାର ବିକାଶ ହୋଇପାରିବ ବୋଲି ମୁଖ୍ଯବକ୍ତା ଶ୍ରୀସ୍ବାଇଁ ସୂଚନା ଦେଇଥିଲେ । ଧଳାପଥର- କଳାପଥର ସରକାରୀ ବାଳିକା ଉଚ୍ଚ ବିଦ୍ୟାଳୟର ବରିଷ୍ଠ ଖେଳ ଶିକ୍ଷୟିତ୍ରୀ ମିନାକ୍ଷୀ ନନ୍ଦଙ୍କୁ ଫୁଲତୋଡା , ଉତ୍ତରୀୟ ଓ ମାନପତ୍ର ଦେଇ ବିଦାୟ କାଳୀନ ସମ୍ବନ୍ଧନା ଦିଆଯାଇଥିଲା । ଏହି କାର୍ଯ୍ୟକ୍ରମକୁ ଖେଳ ଶିକ୍ଷକ ଭଗବତ ପ୍ରସାଦ ପାଣ୍ଡେ , ରଜନୀ ପୃଷ୍ଟି , ପଦ୍ମଚରଣ ବିଶୋଇ ଓ ଖେଳ ଶିକ୍ଷୟିତ୍ରୀ ସୌଦାମିନୀ ବେହେରାଙ୍କ ସମେତ ୪୦ଜଣ ଖେଳ ଶିକ୍ଷକ ଓ ଶିକ୍ଷୟିତ୍ରୀମାନେ ସହଯୋଗ କରି ପରିଚାଳନା କରିଥିଲେ । ପରିଶେଷରେ ଖେଳ ଶିକ୍ଷକ ଉମେଶ ଚନ୍ଦ୍ର ସାହୁ ସମସ୍ତଙ୍କୁ ଧନ୍ଯବାଦ ଅର୍ପଣ କରିଥିଲେ ।
